ފޯ ސީޒަން މޯލްޑިވްސްއިން ކުރިއަށް ގެންދާ އެޕްރެންޓިސްޝިޕް ޕްރޮގްރާމުން 47 ދަރިވަރަަކު ދަސްވެނިވެއްޖެ އެވެ.
ނޭޝަނަލް އާޓް ގެލެރީގައި އިއްޔެ ބޭއްވި ހަފްލާގައި ކޯސްތަކުން ފާސްވި ދަރިވަރުންނަށް ސެޓްފިކެޓް ހަވާލުކޮށްދެއްވީ އެންވަޔަރަންމެންޓް މިނިސްޓަރު ޠާރިޤު އިބްރާހިމެވެ.
ފޯ ސީޒަންއިން ކުރިއަށްގެންދާ އެ ޕްރޮގްރާމަކީ ރާއްޖޭގައި ހިންގާ އެފަދަ އެންމެ ދުވަސްވީ އެއް ޕްރޮގްރާމެވެ. އެޕްރޮގްރާމް ހިންގާތާ މިހާރު 16 އަހަރުވެފައިވާއިރު އެޕްރޮގްރާމުގެ ދަށުން 400 އަށްވުރެ ގިނަ ދަރިވަރުން ވަނީ ތަމްރީން ހާސިލްކޮށްފައެވެ.
އެ ޕްރޮގްރާމުގެ ދަށުން މިދިޔަ އަހަރު ޖުމްލަ ނުވަ ކޯހެއް ހިންގާފައިވާއިރު، އޭގެ ތެރޭގައި ހިމެނެނީ ފުޑް އެންޑް ބެވަރެޖަސް ޕްރިޕަރޭޝަން އާއި ޚިދުމަތް ދިނުމުގެ ކޯހާއި، ސޭފް މެރިޓައިމް ޓްރާންސްޕޯޓް ކޯހާއި، އިންޖިނިއަރިން، ހައުސްކީޕިން، ގެސްޓް ސަރވިސް މީގެއިތުރުން ފްރަންޓް އޮފީސް މެނޭޖްމެންޓާއި ޕަޑީ ޑައިވް މާސްޓަރ ކޯހާއި ވޯޓަރ ސްޕޯޓްސް ކޯހާއި މެރިން ބަޔޮލޮކީ ކޯހެވެ.
ފޯ ސީޒަން މޯލްޑިވްސް އިން ކުރިއަށްގެންދާ އެ ޕްރޮގްރާމަކީ ޓިވެޓް ސެޓިފައިޑް ކޯސްތަކެކެވެ. މި ޕްރޮގްރާމްގެ ދަށުން މިއަހަރު ފަށާ ކޯސްތަކުގައި ރާއްޖޭގެ 58 ރަށަކުން 17 އަހަރާއި 20 އަހަރާއި ދެމެދުގެ 63 ޒުވާނުން ބައިވެރިވެއެވެ.
މިދިޔަ އަހަރުގެ ކޯސްތަކުން ދަސްވެނިވި 47 ދަރިވަރުންގެ ތެރޭގައި ހަތަރު އަންހެނުން ހިމެނޭ އިރު، މި ޕްރޮގްރާމަކީ ފިރިހެނުންގެ އިތުރުން އަންހެނުންނަށްވެސް ހުޅުވާލާފައިވާ ޕްރޮގްރާމެކެވެ. މިއަހަރު ކުރިއަށް ގެންދާ ކޯސްތަކަށް ހޮވިފައިވާ މީހުންގެ ތެރޭގައިވެސް އަންހެނުން ހިމެނެއެވެ.
މި ކޯހަށް ކުދިން ނަގަނީ ފޯ ސީޒަންގެ މުވައްޒަފުން އެކި ރަށްތަކަށް ގޮސް ކުރާ އިންޓަވިއުތަކުންނެވެ. އެގޮތުން މިއަހަރުގެ ކޯސްތަކަށް ދަރިވަރުން ހޯދުމަށްޓަކައި އެ ރިސޯޓުން ވަނީ 58 ރަށަކަށް ގޮސް 282 މީހަކު އިންޓަވިއުކޮށްފައެވެ.