އަސުންސިއޮން (އޭޕްރިލް 2): ޕެރެގުއާއީގައި ކުރިއަށް ދިޔަ މުޒާހަރާތަކެއްގައި އެގައުމުގައި ގާނޫނު ހަދާ މަޖިލީހުގައި ރޯކުރުމާ ގުޅިގެން ގައުމުގެ ދާޚިލީ ވަޒީރާއި ފުލުހުންގެ ވެރިޔާ މަގާމުން ވަކިކޮށްފި އެވެ.
ޕެރެގުއާއީގައި މުޒާހަރާތައް ފެށުނީ އެގައުމުގެ ރައީސް ހޮރަކްޓިއޯ ކާޓެސްއަށް ދެވަނަ ދައުރަކަށް ވާދަކުރެވޭ ގޮތަށް ގާނޫނު އަސާސީ އިސްލާހު ކުރުމަށް ގާނޫނު ހަދާ މަޖިލީހަށް ބިލެއް ހުށަހެޅުމުންނެވެ.
ޕެރެގުއާއީގައި އޮތް 35 އަހަރުގެ ހުދުމުހުތާރު ވެރިކަމަށް ފަހު 1995ގައި އެކުލަވާލި ގާނޫނު އަސާސީގައިވާ ގޮތުން އެގައުމުގެ ރައީސަކަށް ވެރިކަން ކުރެވޭނީ ފަސް އަހަރުގެ އެއް ދައުރަށެވެ.
ޕެރެގުއާއީގެ ސެނެޓުންނާއި ތިރީގެއިން އެބިލަށް ރުހުން ދީފައިވާ އިރު، ބިލު ގާނޫނަކަށް ހެދުމަށްޓަކައި އެގައުމުގައި އަދި ފެންނަ ނުފެންނަ ވޯޓެއް ބާއްވަން ޖެހޭނެ އެވެ.
އެބިލާ ދެކޮޅަށް ކުރިއަށް ގެންދިޔަ މުޒާހަރާތަކުގައި ބައެއް މީހުން ވަނީ ގާނޫނު ހަދާ މަޖިލީހުގެ ކުޑަދޮރުތަކާއި ފެންސުތައް ހަލާކުކޮށް، މަޖިލިސް ތެރޭގައި ރޯކޮށްފައެވެ. އަދި އެބިލަށް ތާއިދު ކުރާ މަޖިލިސް މެމްބަރުންގެ އޮފީސްތަކަށް ގެއްލުންދީ ލޫޓުވައިފައެވެ.
އެމުޒާހަރާތައް ރޫޅާލުމަށްޓަކައި ފުލުހުން ވަނީ ރަބަރު އުންޑައާއި ވޯޓާ ކެނަން ބޭނުންކޮށްފައެވެ. އަދި މުޒާހަރާ ރޫޅާލުމުގެ ތެރޭގައި މުޒާހަރާގެ ބައިވެރިއަކު މަރުވުމާ ގުޅިގެން ކަމާ ބެހޭ ފަރާތްތަކުން ވަނީ ހަތަރު ފުލުހުން ހައްޔަރުކޮށްފައެވެ. (ބީބީސީ)