އިލެކްޓްރޯނިކް ވޯޓިން ސިސްޓަމްތައް ގެނެސް، މިއަހަރު ބައެއް ޕާޓީތަކުގެ އެތެރޭގެ އިންތިހާބުތަކުގައި އެ ސިސްޓަމްތައް ބޭނުންކުރަން ފަށާނެ ކަމަށް އިލެކްޝަން ކޮމިޝަންއިން ބުނެފިއެވެ.
އިލެކްޝަން ކޮމިޝަންގެ މެމްބަރު އަހުމަދު އަކްރަމް މިއަދު ސަން އަށް ވިދާޅުވީ، ވަރަށް އަހަހަށް އީވޯޓިން ސިސްޓަމްތައް ގެނެސް ބައެއް ކުދިކުދި އިންތިހާބުތަކުގައި ބޭނުންކުރަން ނިންމާފައިވާ ކަމަށެވެ.
"ޕާޓީތަކުގެ އެތެރޭގެ އިންތިހާބުތަކާއި އަންހެނުން ކޮމެޓީ ތަކާއި ސުކޫލްތަކުގައި ބާއްވާ އެކިއެކި އިންތިހާބުތަކުގައި ބޭނުންކުރާނީ. ރައްޔިތުން ރަނގަޅަށް އަހުލުވެރިކޮށްގެން ނޫނީ އީވޯޓިން ބޭނުންކުރާކަށް ނުފަށާނަން،" އަކްރަމް ވިދާޅުވިއެވެ.
ކުރިން ނިންމާފައިވަނީ ލޯކަލް ކައުންސިލް އިންތިހާބުގައި ބައެއް ވޯޓްފޮށިތަކުގައި އީވޯޓިން ބޭނުން ކުރުމަށެވެ. ނަމަވެސް ފަހުން ނިންމާފައިވަނީ އާންމުން ހޭލުންތެރިކޮށް އީވޯޓިންއަށް ދިއުމަށެވެ.