ރާއްޖޭގައި ހަލުވިކަމާ އެކު ފެތުރެމުންދާ އެޗް1އެން1 އިންފުލުއެންޒާ ރޯގާއާ ގުޅިގެން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން 10،000 އިންފްލުއެންޒާ ވެކްސިން ހަދިޔާކޮށްފިއެވެ.
ވެކްސިންގެ އިިތުރުން ޑަބްލިއުއެޗުއޯއިން ވަނީ 4،000 ވައިރަސް ޓްރާންސްޕޯޓް މީޑިއަމް އިއްޔެ ހެލްތް މިނިސްޓްރީއާ ހަވާލުކޮށްފައެވެ.
ޑަބްލިއުއެޗުއޯއިިން ގިނަ އަދަދެއްގެ ވެކްސިން ރާއްޖެއަށް ހަދިޔާކޮށްފައިވާއިރު މިހާރު އެ ވެކްސިން ދެމުންދަނީ މާބަނޑު މީހުނަށާއި ހަށިގަނޑުގެ ގުނަވަން ބަދަލުކޮށްފައިވާ މީހުންގެ އިތުރުން ކެންސަރު ބައްޔަށް ފަރުވާ ހޯދާފައިވާ ފަރާތްތަކާއި ނޭވާލާ ނިޒާމުގެ ބަލިތަކަށް ފަރުވާހޯދާ ތިން އަހަރުން މަތީ މީހުންގެ އިތުރުން ޑައިލަސިސް ހަދާ ފަރާތްތަކާއި އުމުރުން 65 އަހަރުން މަތީ ފަރާތްތަކަށެވެ.
މިއަހަރުގެ މިހާތަނަށް 460 މީހަކު އެޗް1އެން1 އަށް ޓެސްޓްކޮށްފައިވާއިރު، އެ ރޯގާއަށް ޕޮޒިޓިވް ވެފައިވާ މީހުންގެ އަދަދު މިހާރު ވަނީ 169 އަށް އަރައިފައެވެ. އަދި ޕޮޒިޓިވްވި މީހުންގެ ތެރެއިން 33 މީހަކަށް ހޮސްޕިޓަލުގައި އެޑްމިޓްކޮށް ދަނީ ފަރުވާ ދެމުންނެވެ.
އެޗް1އެން1 ޖެހިގެން މިހާތަނަށް ރާއްޖެއިން ތިން މީހަކުވަނީ މަރުވެފައެވެ. އޭގެ ތެރޭގައި ހިމެނެނީ ދެ ދިވެހިންނާއި ބިދޭސީއެކެވެ.