އިންޓަރ ސްކޫލު ވޮލީބޯޅަ މުބާރާތުގެ ފައިނަލް މެޗުތައް ކުރިއަށް ގެންދަން ނިންމީ މި މެޗުތަކުގައި އަތޮޅު ތެރެއަށް ނިސްބަތްވާ ޓީމު ތަކެއް ކުޅޭތީ، މުބާރާތް ލަސްކޮށްފިނަމަ އެ ޓީމުތަކަށް ދިމަވެދާނެ ތަކްލީފު ތަކަށް ރިއާޔަތްކޮށް ކަމަށް ވޮލީ ބޯޅަ އެސޯސިއޭޝަނުގެ ރައީސް މުހައްމަދު ލަތީފް ވިދާޅުވެއްޖެއެވެ.
ސަން ސްޕޯޓްސްއަށް މައުލޫމަތު ދެއްވަމުން ލަތީފް ވިދާޅުވީ، މުބާރާތުގައި ބާކީ އޮތީ އުމުރުފުރާތަކުގެ ފައިނަލް މެޗުތައް އެކަނި ކަމަށާއި އެ މެޗުތައް ކެންސަލް ކޮށްފިނަމަ، ބޮޑެތި ހަރަދުކޮށްގެން މާލެ އައިސް ތިބި އަތޮޅުތެރޭގެ ޓީމު ތަކަށް ދަތިވާނެ ކަމަށް ގަބޫލުކުރެވޭތީ އެ މެޗުތައް ކުރިއަށް ގެންދިޔުމަށް ނިންމީ ކަމަށެވެ.
އޭނާ ވިދާޅުވީ، މެޗުތައް ކުރިއަށް ގެންދިޔަ ނަަމަވެސް މެޗުތައް ބަލަން ސަޕޯޓަރުން ނުދިއުމަށް އިލްތިމާސް ކުރައްވާކަަަމަށެވެ.
"ގިނަ ޚަރަދުތަކެއް ކޮށްގެން އަތޮޅުތަކުގެ ސްކޫލްތަކުގެ ޓީމުތައް މާލެއައިސް ތިބީ. ފައިނަލްގައި އެކުދީން ކުޅެން ޖެހޭއިރު، ހަމަ އެކަނި ފައިނަލް މެޗް ފަސްކުރުމުން ވަރަށް ބޮޑު ދަތިތަކެއް ކުރިމަތިވާނެ. އެހެންކަމުން އަޅުގަނޑު އެދެނީ، ފައިނަލް މެޗު ކުޅުނު ކަމުގައިވީ ނަމަވެސް މެޗު ބަލަން އެތަނަށް ސަޕޯޓަރުން ނުދިއުން. މިއީ ރައްކާތެރިކަމުގެ ފިޔަވަޅު އެޅުމުގެ ގޮތުން އަޅުގަނޑު ކުރާ އިލްތިމާސެއް." ލަތީފް ވިދާޅުވިއެވެ.
ވޮލީބޯޅަ އެސޯސިއޭޝަނުން މިހާރު ނިންމާފައިވަނީ މި މުބާރާތުަގައި ބައިވެރިވި 408 ދަރިވަރުން ހިމެނޭގޮތަށް ބާއްވަން އުޅުނު، މުބާރަތް ނިންމުމުގެ ރަސްމިއްޔާތު ކެންސަލް ކުރުމަށެވެ.
އެ އެސޯސިއޭޝަނުން ނެރެފައިވާ އިއުލާނެއްގައި ބުނެފައިވަނީ މުބާރާތް ނިންމުމުގެ ރަސްމިއްޔާތު ފަހުން ބާއްވާނެ ކަމަށާއި ފައިނަލް މެޗުތައް މިހާރުވެސް ކުރިއަށްދާ ގޮތަށް ކުރިއަށްދާނެ ކަމަށެވެ.