ޓޯކިޔޯ (މާޗް 6): އުތުރު ކޮރެއާއިން ހަތަރު ބެލިސްޓިކް މިސައިލް ޖަޕާން ކަނޑާ ދިމާލަށް ލޯންޗުކޮށްފި އެވެ.
ޖަޕާނުގެ ބޮޑުވަޒީރު ޝިންޒޯ އަބޭ ވިދާޅުވި ގޮތުގައި 1000 ކިލޯމީޓަރަށް ދަތުރުކުރި އެމިސައިލްތަކުގެ ތެރެއިން ތިން މިސައިލް ވެއްޓުނީ ޖަޕާނުގެ އިގުތިސާދީ ސަރަހައްދު ތެރެއަށެވެ.
ދެކުނު ކޮރެއާގެ އަސްކަރިއްޔާއިން ބުނި ގޮތުގައި އެމިސައިލްތައް ލޯންޗުކޮށްފައި ވަނީ އުތުރު ކޮރެއާ އާއި ޗައިނާއާ ގުޅޭ ބޯޑަރު ކައިރީ އޮންނަ ޓޮންގްޗަންގް ރީ ސަރަހައްދުންނެވެ. އެއީ ކޮންބާވަތެއްގެ މިސައިލެއްތޯ ބެލުމަށް ތަހުގީގު ކުރަމުންދާ ކަަމަށް ދެކުނު ކޮރެއާއިން ބުންޏެވެ.
ުއުތުރު ކޮރެއާއިން އެ މިސައިލްތައް ލޯންޗުކޮށްފައި ވަނީ ދެކުނު ކޮރެއާ އާއި އެމެރިކާއިން ގުޅިގެން އަސްކަރީ ތަމްރީނުތަކެއް ފަށާފައި ވަނިކޮށެވެ. އުތުރު ކޮރެއާއިން ގަބޫލު ކުރާ ގޮތުގައި ކޮންމެ އަހަރަކު ކުރިއަށްގެންދާ އެ ޑްރިލްތަކަކީ އެގައުމަށް އަރައިގަތުމަށް ތައްޔާރުވުމަށް އެ ދެގައުމުން ކުރިއަށްގެންދާ ތަމްރީނުތަކެކެވެ.
މީގެ ކުރިން މިދިޔަ މަހު އުތުރު ކޮރެއާއިން ވަނީ އެގައުމުގެ ލީޑަރު ކިމް ޖޮންގް އުންގެ ބެއްލެވުމުގެ ދަށުން އާ ބާވަތެއްގެ މެދު ރާސްތާ މިސައިލެއް ޓެސްޓު ކުރި ކަމަށް ބުނެފައެވެ. (ބީބީސީ)