"މަލިކާ"ގެ ވާހަކަ ދެކެވެން ފެށި ހިސާބުން ބެލުންތެރިން ދިޔައީ ފިލްމު ބަލާލަންދާން އިންތިޒާރު ކުރަމުންނެވެ. ފިލްމުގެ ޕޯސްޓަރުތަކާއި ޓްރެއިލާތައް އާންމު ކުރަން ފެށުމުން ދިވެހި ފިލްމަށް ލޯބިކުރާ ފަރާތްތަކުން ތިބީ "މަލިކާ" ބަލާލަން ކެތްމަދުވެފައެވެ. އިންތިޒާރުގެ ނިމުން ވަރަށް ވެސް ފޮންޏެވެ. ފިލްމުގެ ތަރިން ބައިސްކަލްތަކެއްގައި ބައިސްކޯފަށް އައިސް ރޭ ވަނީ ފިލްމު ޕްރިމިއާ ކޮށްފައެވެ.
ބިންމާ އިބްރާހީމް ވަހީދުގެ ސްކްރީންޕްލޭ އަކަށް ލިލީގެ ޗެއާމަން މައްލާ ނާސިރު (މައްލާ ނާބެ) އާއި އިބްރާހިމް ރަޝީދު (މަހުރަބު އިއްބެ) ޕްރޮޑިއުސްކޮށްފައިވާ "މަލިކާ" ސްކްރީނަށް ގެންނަން ފިލްމުގެ ޓީމުން ވަނީ ބުރަ މަސައްކަތްތަކެއް ކޮށްފައެވެ. ކާމިޔާބު ޕްރޮމޯޝަން ތަކަކާއެކު މިރޭ ފިލްމު އޮލިމްޕަހުގައި އަޅުވާފައި ވަނީ މީގެ ކުރިން ފިލްމުތައް ޕްރިމިއާ ކުރުމަށް ނުކުރާފަދަ ކަންތައްތަކެއް ކުރުމަށް ފަހު އެވެ.
ފިލްމުގެ މާކެޓިން ކަންތައްތަކާ ހަވާލުވެ ހުންނަ ހުސައިން ނޫރައްދީން (ނޫރު) ބުނީ، ރޭ ފިލްމު ޕްރިމަިއާ ކުރަން ކުރެވުނު ކަންތައްތަކަކީ ވަރަށް ދުރާލާ ރޭވިގެން ކުރެވުނު ކަންތައްތަކެއް ކަމަށެވެ. ބެލުންތެރިން ހިތްހަމަ ޖެހޭނެ ގޮތަކަށް އެކަން ކުރަން ވިސްނީ ކަމަށެވެ.
2 މާރްޗް 2017: ދިވެހި ފިލްމް މަލިކާ ޕްރިމިއާރ ނައިޓް---ސަން ފޮޓޯ/ މުހައްމަދު އަފްރާހް
"އަސްލު މި ފިލްމުގެ ޕްރޮމޯޝަން މަސައްކަތްތައް ފެށުނު ހިސާބުން ނިންމީ ރެޑް ކާޕެޓްގައި ވެސް ތަފާތު ކަމެއް ކުރަން. އެގޮތުން ބައިކް މޯލްޑިވްސްއާ ގުޅިގެން ނިންމީ ހުރިހާ ތަރިން ބައިސްކަލް ތަކެއްގައި އޮލިމްޕަހަށް އަންނަން. އެބޭފުޅުންގެ ފުރިހަމަ އެއްބާރުލުން ލިބުން. ތަފާތު ކަމެއް މި ކުރެވުނީ. އުންމީދު ކުރަނީ ބެލުންތެރިން ވެސް ވަރަށް ހިތްހަމަޖެހުން ކަމަށް،" ނޫރު ބުންޏެވެ.
އަލީ މުސްތަފާ (ސެމީ) އާއި މޫމިން ފުއާދު އަދި އިސްމާއިލް ރަޝީދު (ކޮޕީ އިއްސެ) ޑައިރެކްޓްކޮށްފައިވާ މި ފިލްމަކީ ރާއްޖޭގައި ދިމާވާ ބޮޑު އިޖްތިމާއީ މައްސަލައެއްގެ މައްޗަށް ހަދާފައިވާ ފިލްމެކެވެ.
"މަލިކާ" ބަލާލަން ގިނަ އަދަދެއްގެ ބަޔަކު ރޭ އޮލިމްޕަހަށް ވަދެފައިވާއިރު އެ ފިލްމުން ރަނގަޅު އިބްރަތެއް ހާސިލް ވެގެން ދާނެއެވެ. އަސަރު ގަދަ މަންޒަރުތަކެއް ދައްކާލައި ފިލްމު ބަލާލަން އޮލިމްފަހަށް ވަދެ ތިބި މީހުންގެ ލޯތަކުން ކަރުނަ ގެނުވިއެވެ. ފިލްމު ބަލާފައި ނުކުތް މީހުންގެ ފަރާތުންވެސް އެކަން ފާހަގަ ވިއެވެ.
"މިހާތަނަކަށް މި ސިނަމާ އަކުން ނުބަލަން މިހާ ރީތި ދިވެހި ފިލްމެއް. ވަރަށް ރަނގަޅު އިބްރަތެއް ހާސިލް ވާނެ. ވަރަށް ހިތަށް އަސަރު ކޮށްލައިފި" ފިލްމު ބަލާފައި ނުކުން ފަރާތްތަކުގެ ޝުއޫރު ހުރީ މިހެންނެވެ.
"މިއީ ވަރަށް ރަނގަޅު އިބްރަތެއް ހާސިލްވި ފިލްމެއް. މިޒަމާނުގައި ޕަބްލިކް ޓީވީ ގައިވެސް މިފިލްމު ދެއްކުން ރަނގަޅު. ރަނގަޅަށް ވެސް ރޮވުނު ހަމަ. ވަރަށް ރީތި ފިލްމެއް މި،" ފިލްމު ބަލާގެން ނުކުން މީހުން ބުންޏެވެ.
2 މާރްޗް 2017: ދިވެހި ފިލްމް މަލިކާ ޕްރިމިއާރ ނައިޓް---ސަން ފޮޓޯ/ މުހައްމަދު އަފްރާހް
ފިލްމުގެ 20 ޝޯ ދައްކާ ގޮތަށް ހަމަޖެހިފައިވާއިރު ފިލްމު ވަނީ އަތޮޅުތެރޭ ދެ ރަށެއްގައި ވެސް ރޭ އަޅުވާފައެވެ. އަދި އިތުރު ރަށްތަކުގައި ވެސް ވަރަށް އަވަހަށް ފިލްމު އަޅުވަން ފަށާނެއެވެ.
މުޖުތަމައުގައި ހިނގާ އެކަހަލަ ނޭދެވޭ މައްސަލަތަކަށް ހައްލެއް ހޯދައިދޭނެ "މަލިކާ" ބަލާލަން 100 ރުފިޔާގެ ޓިކެޓެއް ގެނެގެން އޮލިމްޕަހަށް ވަދެލުމަކީ ބޭކާރު ކަމަށް ނުވާނެއެވެ.