މިއަހަރު އަޅުވާ ފުރަތަމަ ފިލްމު، "މަލިކާ މިރޭ އޮލިމްޕަހުގައާއި ދެ ރަށެއްގައި ޕްރިމިއާ ކުރާނެއެވެ. މާލޭގައި ފިލްމު ޕްރިމިއާ ކުރާއިރު، ރެޑްކާޕެޓަށް ފިލްމުން ދަނީ ތައްޔާރުވަމުންނެވެ.
ބިންމާ އިބްރާހީމް ވަހީދުގެ އަސަރުގަދަ ސްކްރީންޕްލޭ އަކަށް މައްލާ ނާސިރު (މައްލާ ނާބެ) އާއި އިބްރާހިމް ރަޝީދު (މަހުރަބު އިއްބެ) ޕްރޮޑިއުސްކޮށްފައިވާ "މަލިކާ"ގެ ރެޑްކާޕެޓް، އެހެން ފިލްމުތަކާ ތަފާތުވާނޭ ކަމަށް ފިލްމުގެ ޓީމުން ބުނެއެވެ.
މާލޭގެ އޮލިމްޕަހުގައި މިއަދު ފިލްމު އަޅުވާއިރު، އެއް ވަގުތެއްގައި ހދ. ކުޅުދުއްފުއްޓާއި ށ. މިލަންދޫގައި ވެސް ފިލްމު މިރޭ ޕްރިމިއާ ކުރާނެއެވެ. އަދި މީޑިއާތަކަށް ޚާއްސަކޮށްގެން ފިލްމުގެ ޕްރީ ޝޯވ ރޭ ވަނީ ބާއްވާފައެވެ. މިއީ ރާއްޖޭގެ ފިލްމަކުން ނޫސްވެރިންނަށް ހާއްސަކޮށްގެން ބޭއްވި ފުރަތަމަ އެފަދަ ޝޯވއެވެ.
އަލީ މުސްތަފާ (ސެމީ) އާއި މޫމިން ފުއާދު އަދި އިސްމާއިލް ރަޝީދު (ކޮޕީ އިއްސެ) ޑައިރެކްޓްކޮށްފައިވާ ފިލްމު "މަލިކާ" އަކީ ރާއްޖޭގައި މިހާރު ފާހަގަވެފައިވާ ބޮޑު އިޖްތިމާއީ މައްސަލައެއްގެ މައްޗަށް ހަދާފައިވާ ބޮޑު ކާސްޓެއް ހިމެނޭ ފިލްމެކެވެ.
ފިލްމު މަލިކާގެ މައި ރޯލުން ފެނިގެންދާނީ ކުރީގެ މަޝްހޫރު ފިލްމީ ތަރި އިސްމާއިލް ޒާހިރާއި ފިލްމީ ދާއިރާއަށް މުޅިން އަލަށް ނުކުންނަ މޫނެއް ކަމަށްވާ، ނުޒުހަތު ޝުއެއިބު (ނުޒޫ) އެވެ.
އޭގެ އިތުރުން، ފިލްމުގައި އަލީ އާޒިމް (ދޮން އައްޔަ) އާއި މިއަހަރުގެ ގައުމީ ފިލްމު އެވޯޑްސްގެ އެންމެ މޮޅު ސަޕޯޓިން އެކްޓުރެސްގެ އެވޯޑް ހޯދި ޒުވާން ބަތަލާ ފާތިމަތު އަޒީފާ (އަޒޫ)، ޖުމައްޔިލް ނިމާލް އަދި އަހުމަދު ޝާކިރު (ޝާކް އައްމަޑޭ)ގެ އިތުރުން އަހުމަދު އާސިމް އަދި ނީނާ ސަލީމް ފެނިގެންދާނެ އެވެ.
މަލިކާގެ ޝޯތައް މިރެއިން ފެށިގެން މިމަހުގެ 20 ވަނަ ދުވަހާ ހަމައަށް އޮލިމްޕަހުގައި ދެއްކުމަށް ވަނީ ހަމަޖެހިފައެވެ.