ދިވެހި ފިލްމީ ދާއިރާގައި މަގުބޫލު ފިލްމުތަކެއް ގެނެސް ދީފައިވާ މަޝްހޫރު ޑައިރެކްޓަރު އަލީ މުސްތަފާ ނުވަތަ އާންމު ނަމުން ނަމަ ސެމީގެ މިފަހަރުގެ ފިލްމު މަލިކާ މިވަނީ ރޭ އޮލިމްޕަހުގައި އަޅުވާފަ އެވެ. ސެމީގެ އިތުރުން މޫމިން ފުއާދު އަދި ކޮޕީ އިއްސެވެސް ޑައިރެކްޝަނުގައި ހަރަކާތްތެރިވާ މި ފިލްމުގައި އެންމެ ފާހަގަކޮށްލެވޭ ކަމަކީ ބަތަލާއެއްގެ މަގާމު އާ ތަރިއަކަށް ދިނުމެވެ.
ފިލްމުގެ ތަރިން:
އިސްމާއިލް ޒާހިރު، ނުޒުހަތު ޝުއައިބް (ބަތަލާ)، ޖުމައްޔިލް ނިމާލް، މަރިޔަމް ޝަކީލާ، އަހުމަދު އާސިމް، އަލީ އާޒިމް، ސުޖީތާ އަބްދުﷲ، ފާތިމަތު އާޒިފާ، ނީނާ ސަލީމް، އަހުމަދު ޝާކިރު
މައިގަނޑު ވާހަކަ
މިއީ ބިންމާ އިބްރާހީމް ވަހީދުގެ އަސަރު ގަދަ ވާހަކައަކަށް ތައްޔާރު ކޮށްފައިވާ ފިލްމެކެވެ. ފިލްމް ބިނާކޮށްފައި އޮތީ ދަރީން ދެކެ އިންތިހާ އަށް ލޯބިވާ ބައްޕަ އެއްގެ މައްޗަށެވެ. އެ ބައްޕަގެ ވިސްނުމުގައި އަދި ގަބޫލުކުރުމުގައި އަންހެން ދަރީންނަކީ ޢާއިލާ އަށް އެހާ ބޭނުންތެރި ބައެއް ނޫނެވެ. މުހިންމީ ފިރިހެން ދަރީންނެވެ. އެ ބައްޕަގެ ވިސްނުމުގައި މައިންބަފައިގެ އުމުރުން ދުވަސްވެ، ގައިބާރު ނެތޭ ދުވަހު އެ މީހުންނަށް އެހީތެރިވެދޭން ތިބޭނީ ހަމައެކަނި ފިރިހެން ދަރީންނެވެ. އަޅައިލާނީ ފިރިހެން ދަރީންނެވެ. އަންހެން ދަރީން ކޮންމެވެސް މީހަކާ އިނދެގެން އުޅޭނީ ކޮންމެވެސް އެހެން ތަނެއްގަ އެވެ. ކިޔަވާން ޖެހޭނީ ވެސް ޒިންމާދާރު ވަޒީފާ ތަކަށް ދާން ޖެހޭނީ ވެސް ފިރިހެން ދަރީންނެވެ.
ޢާއިލާގައި ހުރި ހަމައެކަނި އަންހެން ދަރިފުޅާ މެދު ބައްޕަ އަމަލުކުރާ ނިކަމެތި ގޮތް އަދި ބާކީ ކުރާ މިންވަރު މި ފިލްމުގައި ދައްކުވައިދެ އެވެ. ފިރިހެން ދަރީންނަށް ކިޔަވައިދީ މީހުނަށް ހަދަ އެވެ. އަންހެން ދަރިފުޅު ކިޔަވާން ދާން އަމިއްލައަށް ފުރުސަތު ހޯދައި އެކަމަށް އެދުމުން ވެސް ބައްޕަގެ ފަރާތުން ހިތްހަމަނުޖެހުން ފިޔަވައި އިތުރު ކަމެއް އަންހެން ދަރިފުޅަކަށް ނުލިބެ އެވެ.
އެހެން ނަމަވެސް ދިމާވާ ކުއްލި ހާދިސާއެއްގައި މަންމަ ނިޔާވެ، ބައްޕަގެ ބަލި ހާލަތު ބޮޑުވެ ދަރީންގެ އެހީތެރިކަމަށް ބޭނުންވާ ވަގުތު ފިރިހެން ދަރީންގެ ފަރާތުން ބައްޕައަށް އެއްވެސް އެހީތެރިކަމެއް ނުލިބެ އެވެ. އޭގެ ބަދަލުގައި ބައްޕަ އަށް ކާންދީ ބަލަހައްޓަން ޖެހުމުން ބޮޑު އުނދަގުލަކަށް ވެ ބައްޕަ ނެތް ތަނުގައި ބައްޕައަށް އެއްޗެހި ކިޔައި ހަދާ މަންޒަރުތަކުން ފިލްމު ބަލަން ދިޔަ ގިނަ ބައެއްގެ ލޮލުން ކަރުނަ އައެވެ. އެއްކަލަ ބައްޕަ ލޯބިވި ފިރިހެން ދަރީންގެ ބިޒީ ޝެޑިއުލްގެ ސަބަބުން ބައްޕަ ގޮވައިގެން ހޮސްޕިޓަލަށް ދާނެ ވަގުތެއް ވެސް ނުލިބެ އެވެ. ފިރިހެން ދަރީންގެ އަނބީންގެ ފަރާތުން ފެނިގެން ދަނީ ބައްޕަ އަށް އަޅައި ނުލުމުގެ އިތުރުން ބައްޕައަށް ނަފުރަތު ކުރުވުމުގެ ސިފަ ތަކެވެ.
އެންމެ ފަހު ވަގުތު މި ހުރިހާ ކަމެއް ރަށުން ބޭރުގައި ތަމްރީނުގައި ހުރި އަންހެން ދަރިފުޅަން އެނގެ އެވެ. އެހާ ހިސާބުން އެ ދަރިފުޅުގެ ފަރާތުން ފެނިގެން ދަނީ ނަމޫނާ ދަރިއެއްގެ މިސާލެވެ. ހުރިހާ ކަމެއް ދޫކޮށްލައި ބައްޕަ ކަރިއަށްދެ އެވެ. އަދި ބައްޕަގެ ހުރިހާ ޒިންމާ އަކާ އަމިއްލަ އަށް ހަވާލުވެ އެވެ.
2 މާރްޗް 2017: ދިވެހި ފިލްމް މަލިކާ ޕްރިމިއާރ ނައިޓް---ސަން ފޮޓޯ/ މުހައްމަދު އަފްރާހް
މަލިކާގެ ރޯލުކުޅެފައިވާ ނުޒޫ އަށް ސާބަސް
ނުޒޫގެ ހުނަރަށް އައްސަރި ބަހާއި ސާބަސް ދޭހައިވެ އެވެ. ނުޒޫގެ މޮޅު ހުނަރުން ވަނީ ބެލުންތެރިން އެތައް ފަހަރަކު ރޮއްވައިލައިފައެވެ. ނުޒޫގެ އެކްޓިން ވަރަށް ވެސް ފުރިހަމައެވެ. ބެލުންތެރިންގެ ހިތްތަކާ ކުޅެލައެވެ. ފުރަތަމަ ފިލްމުގައި ނުޒޫ ދައްކުވައިދީފައިވާ ހުނަރަށް ހުރިހާ ބެލުންތެރިންގެ ތައުރީފު ހައްގެވެ.
ފިލްމުގެ ކެމެރާ ކޮށްދީފައިވާ މޫމިން ފުއާދުގެ މަސައްކަތަށް ސަތޭކަ ދޭންޖެހެއެވެ. މުހައްމަދު ފުއާދުގެ ބެކް މިޔުޒިކް ވަރަށް ފުރިހަމަ އެވެ. ފިލްމުގައި އުޅޭ ތަރިންގެ މޭކަޕް ކޮށްދީފައިވާ، ހަފްސާ ސައީދަށް ވެސް ތައުރީފު ހައްގެވެ. ފިލްމުގެ އެޑިޓިންގެ މަަސައްކަތް ކޮށްފައިވާ އަހުމަދު އާސިމް ވަނީ އޭނާގެ އެންމެ ފުރިހަމަ މަަސައްކަތް ދައްކުވައިދީފަ އެވެ.
މަލިކާ" ބެލުމުން ލޮލުން ކަރުނަ ނާންނަ މީހަކު މަދުވާނެއެވެ. ފިލްމު ބެލި ހިތްވަރު ގަދަ ބައެއް ފިރިހެނުން ބުނީ އެމީހުނަށް ވެސް އެތައް ފަހަރަކު ރޮވުނު ކަމަށެވެ. އެއީ މި ފިލްމުގައި ދައްކުވައިދީފައިވާ ގިނަ ކަންކަމަކީ ދިވެހީންގެ ދިރިއުޅުމުން މަދުން ނަމަވެސް ފެންނަ ކަންތައްތައް ކަމަށް ވާތީ އެވެ. ފިލްމު ބަލަން ތިބި ގިނަ މީހުން އިރު އިރު ކޮޅުން ލޮލުން ކަރުނަ ފުހޭ މަންޒަރު ފެނުނެވެ.
މި ފިލްމަކީ އާއިލީ ދިރިއުޅުމަށް ލޯބިކުރާ އާއިލީ ލޯތްބަށް އިހުތިރާމު ކޮންމެ މީހަކު ވެސް ބަލައިލުން ކޮންމެހެން ބޭނުންތެރި ފިލްމެކެވެ.