ބަންޖުލް (ފެބްރުއަރީ 15): ގެމްބިއާއިން ވަރަށް އަވަހަށް ކޮމަންވެލްތާ ގުޅޭނެ ކަމަށް އިނގިރޭސި ފޮރިން މިނިސްޓަރު ބޯރިސް ޖޯންސަން ވިދާޅުވެއްޖެ އެވެ.
ގެމްބިއާއަށް ކުރެއްވި ދަތުރުފުޅެއްގައި އެގައުމުގެ ރައީސް އެޑަމާ ބަރޯއާ ބައްދަލުކުރެއްވުމަށް ފަހު ޖޯންސަން ވަނީ އިނގިރޭސިވިލާތުން ގެމްބިއާއަށް އެއްބާރުލުން ފޯރުކޮށްދޭނެ ކަމަށް ވިދާޅުވެފަ އެވެ.
މީގެ ތިން އަހަރު ކުރިން ކޮމަންވެލްތުން ގެމްބިއާ ވަކިވީ ކުރީގެ ރައީސް ޔަހުޔާ ޖަމޭހްގެ ވެރިކަމުގަ އެވެ. އޭގެ ފަހުން އެގައުމުން ވަނީ ބައިނަލްއަގުވާމީ ޖިނާއީ ކޯޓު (އައިސީސީ)ން ވެސް ވަކިވެފަ އެވެ. ނަމަވެސް މިދިޔަ މަހު ގެމްބިއާގެ ވެރިކަމަށް ވަޑައިގެންނެވި ބަރޯ ވަނީ ޖަމޭހްގެ ނިންމެވުންތައް ބަދަލު ކުރައްވާނެ ކަމަށް ވިދާޅުވެފަ އެވެ.
ޖޯންސަން އެފަދައިން ވިދާޅުވުމާ ގުޅިގެން ކޮމަންވެލްތް ސެކްރެޓޭރިއެޓުން ވަނީ ގެމްބިއާއަށް މަރުހަބާ ކިޔާ ކަމަށް ބުނެފަ އެވެ. ނަމަވެސް ކޮމަންވެލްތާ ގުޅުމުގެ ރަސްމީ މަރުހަލާތައް ކުރިއަށް ގެންދެވޭނީ އެ ޖަމިއްޔާގައި ހިމެނޭ 52 ގައުމުގެ ސަރުކާރުން އެއްބަސްވުމުން ކަމަށް ބުނެފަ އެވެ. (ބީބީސީ)