އަންނަ މަހުގެ ދެ ވަނަ ދުވަހު އޮލިމްޕަސް ސްކްރީނަށް އަންނަ ފިލްމް "މަލިކާ" އަށް ވަރަށް ބޮޑު ތަރުހީބެއް ލިބެމުންދާ ކަމަށާއި ފުރަތަމަ ފަސް ޝޯގެ ގިނަ ޓިކެޓް މިހާރު ވިކިފައިވާކަމަށް ފިލްމުގެ މާކެޓިން ޓީމުން މިއަދު ބުނެފިއެވެ.
ފިލްމުގެ މާކެޓިން ކަންތައްތަކާ ހަވާލުވެ ހުންނަ، ޕްރޮޑިއުސަރު އަދި އެކްޓަރު ހުސައިން ނޫރައްދީން (ނޫރު) ބުނީ، ފުރަތަމަ ވިއްކަނީ ފުރަތަމަ ފަސް ޝޯގެ ޓިކެޓް ކަމަށާއި ތަރުހީބު ވަރަށް ރަނގަޅު ކަމަށެވެ. އެގޮތުން މިހާރު ފުރަތަމަ ތިން ޝޯގެ ޓިކެޓްގެ ބޮޑު ބައެއް ވިކިފައިވާއިރު ބާކީ އޮތް ދެ ޝޯ ގެ ޓިކެޓްވެސް ވަރަށް އަވަހަށް ފުލް ވާނެ ކަމަށް އޭނާ ބުންޏެވެ.
" ފިލްމަށް ލިބޭ ތަރުހީބު ވަރަށް ރަނގަޅު. އަޅުގަނޑުމެން ފުރަތަމަ މި ވިއްކަނީ ފުރަތަމަ ފަސް ޝޯ ގެ ޓިކެޓް. އޭގެ ތެރެއިން މިހާރުވަނީ ފުރަތަމަ ތިން ޝޯގެ ގިނަ ޓިކެޓް ތަކެއް ވިކި ހުސްވެފައި. އަނެއް ދެ ޝޯގެ ޓިކެޓް ވެސް ވަރަށް އަވަހަށް ފުލްވާނެ،" ނޫރު ބުންޏެވެ.
"މަލިކާ" ގެ 20 ޝޯ އޮލިމްފަހުގައި އަޅުވަން ހަމަޖެހިފައިވާއިރު ދެން ހުރި ހުރިހާ ޝޯ އެއްގެ ޓިކެޓް އަންނަ ހަފްތާއިން ވިއްކަން ފަށާނެއެވެ.
ފިލްމު "މަލިކާ"ގެ ޕޯސްޓަރެއް--
ނޫރު ބުނީ، އަދިވެސް އެޑްވާންސްކޮށާއި އޮންލައިންކޮށް ޓިކެޓް ބުކް ކުރުމުގެ އިންތިޒާމު އެބަ އޮތް ކަމަށާއި ނަމަވެސް ދީފައިވާ ޑެޑްލައިންގެ ތެރޭގައި ބުކްކޮށްފައި ހުރި ޓިކެޓްތައް ނުނަގައިފިނަމަ ކެންސަލްކޮށް އެ ޓިކެޓް ތައް ވެސް ވިއްކާނެ ކަމަށެވެ.
"އަދިވެސް ހަމަ އެބަ އޮތް އޮންލައިންކޮށާއި އެޑްވާންކޮށް ޓިކެޓް ބުކް ކުރުން. އެކަމަކު އަޅުގަނޑުމެން ދީފައިވާ ޑެޑްލައިންގެ ތެރޭގައި ޓިކެޓް ނުނަގައިފިއްޔާ އެ ޓިކެޓް ތައް ކެންސަލް ކޮށްލާނެ. އަދި އެ ޓިކެޓް ތައް ވެސް ވިއްކާލެވޭނެ،" ނޫރު ބުންޏެވެ.
"މަލިކާ" ފްރޮމޯޓު ކުރުމަށް ގިނަ ކަންތައްތަކެއް ރާވާފައިވާ ކަމަށް ނޫރު ބުންޏެވެ. އެގޮތުން ފިލްމުގެ އާ ޕޯސްޓަރެއް ނެރެފައިވާނެ ކަމަށާއި ވަރަށް އަވަހަށް ފިލްމުގެ ޓްރެއިލާއެއް ނެރޭނެ ކަމަށް އޭނާ ވަނީ ބުނެފައެވެ.
ފިލްމު ފްރޮމޯޓު ކުރުމަށް ހިންގާ ހަރަކާތް ތަކުގެ ތެރެއިން ވަރަށް ހާއްސަ ފޮޓޯ ކޮންޓެސްޓެއް ކުރިޔަށްދާނެއެވެ.
މަލިކާ އެޅުވުމަށް އަންނަ މަހުގެ 1-20 އަށް އޮލިމްޕަސް ނަގާފައިވާއިރު، ޕްރިމިއާ ޝޯގެ ޓިކެޓް ވިއްކާނީ 200 ރުފިޔާއަށެވެ. ދެން ހުރި ޝޯތަކުގެ ޓިކެޓް ވިއްކާނީ 100 ރުފިޔާއަށެވެ.
ބިންމާ އިބްރާހީމް ވަހީދުގެ އަސަރުގަދަ ސްކްރީންޕްލޭ އަކަށް، ލިލީގެ ޗެއާމަން މައްލާ ނާސިރު (މައްލާ ނާބެ) އާއި އިބްރާހިމް ރަޝީދު (މަހުރަބު އިއްބެ) ޕްރޮޑިއުސްކޮށްފައިވާ "މަލިކާ" އަކީ ޒުވާން ތަރިންތަކެއް ފެނިގެންދާނެ ފިލްމެކެވެ. މުހައްމަދު ޖުމައްޔިލް އާއި ފާތިމަތު އާޒިފާ އަދި އަލީ އާޒިމް އާއި ނީނާ ސަލީމުގެ އިތުރުން އިސްމާއީލް އާއި މަރިޔަމް ޝަކީލާގެ މޮޅު އެކްޓިން ފެނިގެންދާނެ މި ފިލްމުގެ ލީޑު ރޯލުން ފެނިގެންދާނީ ފިލްމް އިންޑަސްޓްރީއަށް މުޅިން އަލަށް ތަޢާރަފްވި ނުޒުހަތު ޝުއައިބް (ނުޒޫ) އެވެ.