ރަށެއްގެ ނުވަތަ ގައުމެއް ޒީނަތްތެރިކަން މުޒާހަރާ ކުރުމަކުން ދައްކުވައި ނުދޭ ކަމަށް ރައީސް އަބްދުﷲ ޔާމީން އަބްދުލަގައްޔޫމް ވިދާޅުވެއްޖެ އެވެ.
މ. ދިއްގަރުގެ ފެނުގެ ނިޒާމު އިފްތިތާހު ކުރުމަށް މިއަދު އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްވަމުން ރައީސް ޔާމީން ވިދާޅުވީ ރަށެއްގެ ޒީނަތްތެރިކަން ފެނިގެންދަނީ ކުދިންނަކީ އަހުލާގު ރަނގަޅު ކުދިންތަކަކަށް ވެގެން ކަމަށާއި ޒުވާނުންނަކީ ބޭކާރު ބަޔަކަށް ނުވެ މުޖުތަމައަަށް ހިދުމަތް ކުރާ ބަޔަކަށް ވުމުން ކަމަށެވެ.
"ޒީނަތްތެރިކަން ފެންނަނީ ޒުވާނުންނަކީ ވަޒީފާ ހޯދައިގެން އާމްދަނީ ހޯދައިގެން މައިންބަފައިން ބަލަހައްޓައިދޭ ބަޔަކަށް ވެގެން ދިޔައިމާ. ސަރުކާރަކީ އެންމެ ނިކަމެތި މީހާ އަށް ވެސް އާސަންދައިގެ ތެރެއިން ސިއްހީ ފަރުވާ ހޯދައިދޭ ކެޕޭސިޓީ ހުރި ސަރުކާރަކަށް ވެގެން ދިޔައިމާ،" ރައީސް ޔާމީން ވިދާޅުވި އެވެ.
މ. ދިއްގަރުގެ ފެނުގެ ނިޒާމު އިފްތިތާހު ކުރުމަށް މިއަދު އެރަށުގައި ބޭއްވި ރަސްމިއްޔާތުގެ ތެރެއިން --- ފޮޓޯ// އެންވަޔަރަމެންޓް މިނިސްޓްރީ
ރާއްޖޭން ބޭރުގެ ހިމާޔަތް ހޯދައިގެން ރާއްޖެ އަށް ހިދުމަތް ކޮށްދޭނެ ކަމަށް ބުނާ މީހުންގެ ވާހަކަ ގަބޫލު ނުކުރެވޭ ކަމަށް ރައީސް ޔާމީން ވަނީ ވިދާޅުވެފަ އެވެ. ރައީސް ޔާމީން ވިދާޅުވީ އެންމެ އިސް ހާދިމެއްގެ ގޮތުގައި ރައްޔިތުންނަށް ހިދުމަތް ކުރަން ބޭނުން ނަމަ ރާއްޖޭގައި އަމަލުކުރާ ގާނޫނުތަކަށް ބޯލަނބަން ޖެހޭ ކަމަށެވެ.
ރައީސް އެހެން ވިދާޅުވެފައިވާ އިރު ކުރީގެ ރައީސް މުހައްމަދު ނަޝީދު ދާދި ފަހުން ބޭރުގެ ނޫހަކަށް ދިން އިންޓަވިއުއެއްގައި ވިދާޅުވެފައި ވަނީ ރާއްޖެ އަށް ހިދުމަތް ކުރުމުގައި ދެމި ހުންނާނެ ކަމަށެވެ.
ރައީސްގެ ވާހަކަފުޅުގައި އިތުރަށް ވިދާޅުވީ ރާއްޖޭގެ ރަށްރަށުގައި އެންމެ ކްލާސް ރޫމެއް އަޅާ ވާހަކަ މިހާރު ނުދައްކާނެ ކަމަށެވެ. އޭގެ ބަދަލުގައި 10 ކްލާސް ރޫމް ނުވަތަ މަލްޓި ޕާޕާސް ހޯލް ފަދަ ބޮޑެތި ޕްރޮޖެކްޓްތަކުގެ ވާހަކަ މިހާރު ދައްކާނެ ކަމަށް ރައީސް ވިދާޅުވި އެވެ. އެހެންވީމާ އެކަންކަމުން އުފުލަން ޖެހޭ ދަރަނީގެ ބޮޑުކަމުން "ހީކަރުވާ" ބަޔަކު ވެރިކަމަށް ޝަރުތު ފުރިހަމަ ނޫން ކަމަށް ރައީސް ޔާމީން ވިދާޅުވި އެވެ.
މ. ދިއްގަރުގެ ފެނުގެ ނިޒާމު އިފްތިތާހު ކުރުމަށް މިއަދު އެ ރަށުގައި ބޭއްވި ރަސްމިއްޔާތުގެ ތެރެއިން --- ފޮޓޯ// އެންވަޔަރަމެންޓް މިނިސްޓްރީ
"އެހެންވީމާ މިކަންކަމުން އުފުލަން ޖެހޭ ދަރަނީގެ ބޮޑުކަމުން ހީކަރުވާ ބަޔަކު ހީކަރުވަންވީ. އަޅުގަނޑުމެން މި ދަރަންޏާ އެކު މި ކުރިއަށް ދަނީ އަޅުގަނޑުމެން އެކަންކަމާ މެދު ހީ ނުކަރުވާތީ. ކުރިއަށް ދެވޭނީ ކުރިއަށް ދެވޭނެ ވަރުގެ އަޒުމަކާއި ރޫހަކާ ހުރެގެން." ރައީސް ޔާމީން ވިދާޅުވި އެވެ.
ތަރައްގީއާއިގެން ސަރުކާރުން ކުރިއަށް ދާއިރު ރައްޔިތުންގެ ފަރާތުން އިޖްތިމާއީ އެހީތެރިކަން ބޭނުންވާ ކަމަށް ރައީސް ޔާމީން ވަނީ ވިދާޅުވެފަ އެވެ.