ބަންޖުލް (ޖެނުއަރީ 23): ގެމްބިއާގައި ދިގު މުއްދަތަކަށް ވެރިކަން ކުރެއްވި ޔަހުޔާ ޖަމޭހް ގައުމު ދޫކުރައްވާ ވަޑައިގަތް ފަހުން ދައުލަތުގެ ހަޒާނާއިން 11 މިލިއަން ޑޮލަރަށް ވުރެ ގިނަ ފައިސާ ގެއްލިފައިވާ ކަމަށް އެގައުމުގެ އާ ރައީސްގެ މުޝީރަކު ވިދާޅުވެއްޖެ އެވެ.
ގެމްބިއާގެ އާ ރައީސް އެޑަމާ ބަރޯއާ އެކު ސެނެގާލްގައި ހުންނެވި މުޝީރު، މައި އަހުމަދު ފަތީ ވިދާޅުވި ގޮތުގައި ކަމާ ބެހޭ މާހިރުން މިހާރު ދަނީ ދައުލަތުގެ ހަޒާނާއިން ގެއްލިފައިވާ ފައިސާގެ ސީދާ އަދަދު ހޯދުމަށް މަަސައްކަތް ކުރަމުންނެވެ. ފަތީ ވިދާޅުވި ގޮތުގައި ގެމްބިއާގެ މާލީ ހާލަތު މިހާރު އޮތީ ވަރަށް ދަށްކޮށެވެ.
"ދައުލަތުގެ ހަޒާނާ ވަނީ ގާތްގަނޑަކަށް ހުސްވެފައި. ގެމްބިއާގެ މިނިސްޓްރީ އޮފް ފިނޭންސް އާއި މަރުކަޒީ ބޭންކުގެ ޓެކްނީޝަނުން ވަނީ އެކަން ޔަގީންކޮށްދީފައި،" ފަތީ ވިދާޅުވި އެވެ.
އަދި ފާއިތުވި ދެ ހަފްތާ ތެރޭގައި އެކަނި ވެސް ޖަމޭހް ވަނީ ދައުލަތުގެ ހަޒާނާއިން 11 މިލިއަަނަށް ވުރެ ގިނަ ޑޮލަރު ނަގާފައި ކަމަށް ފަތީ ތުހުމަތު ކުރެއްވި އެވެ. ނަމަވެސް އެތުހުމަތުތައް އަދި ޔަގީން ކުރެވިފައި ނުވެ އެވެ.
އެހެންކަމުން ޖަމޭހްގެ މުދާތައް ގައުމުން ބޭރަށް ނުފޮނުވުމަށް ގެމްބިއާގެ މައި އެއާޕޯޓަށް ވަނީ އަންގާފައި ކަމަށް ވެސް ފަތީ ވިދާޅުވި އެވެ.
ރިޕޯޓުތަކުގައިވާ ގޮތުން ޖަމޭހް ގައުމު ދޫކުރައްވާ ވަޑައިގަތްރޭ ކާގޯ ބޯޓަކަށް ލަގްޒަރީ ކާރާއި އެފަދަ އިތުރު ސާމާނު އަރުވާފައިވެ އެވެ. އޭގެ ތެރެއިން ބައެއް މުދާތައްވީ ގެމްބިއާ ދޫކުރައްވައި ވަޑައިގަތުމަށް ފަހު ޖަމޭހް މަޑު ކުރެއްވި ގިނީގައި އެވެ.
އަދި ބައެއް ނޫސްތަކުގައިވާ ގޮތުން ޖަމޭހް އާއި އޭނާގެ އާއިލާ އަރުވާލެވިގެން ތިއްބަވާނީ އިކުއެޓޯރިއަލް ގިނީގައި އެވެ. ނަމަވެސް އެގައުމުން އަދި އެކަން ޔަގީންކޮށްދީފައި ނުވެ އެވެ.
ގެމްބިއާގައި ވެރިކަން ކުރައްވާތާ 22 އަހަރުވެފައިވާ ޖަމޭހް ވަނީ މިދިޔަ މަހު އޮތް ރިޔާސީ އިންތިހާބުން ނާކާމިޔާބުވެފައި އެވެ. އަދި އިންތިހާބުގެ ނަތީޖާ ފުރަތަމަ ގަބޫލު ކުރެއްވި ނަމަވެސް ފަހުން އޭނާ ވަނީ ވޯޓުގައި މައްސަލައެއް އުޅޭ ކަމަށް ބުނެ ވެރިކަމުން ފައިބައިވަޑައިގަންނަވަން ދެކޮޅު ހައްދަވައިފަ އެވެ. އަދި އެގައުމުގެ އަސްކަރިއްޔާ އިން އެނިންމުމަށް ތާއިދު ކުރުމުގެ އިތުރުން ޖަމޭހް އަށް އިތުރު ތިން މަހަށް ވެރިކަމުގައި ހުރެވޭނެ ކަމަށް ގާނޫނު ހަދާ މަޖިލީހުން ނިންމި އެވެ.
އަމިއްލަ ރައްކަލަށް ޓަކައި ސެނެގާލްގައި ހުންނަވައިގެން ގެމްބިއާގެ ވެރިކަމުގެ ހުވާ ކުރެއްވި ބަރޯ އަނބުރާ ގައުމަށް ވަޑައިގަންނަވާނެ ދުވަހެއް އަދި ހާމަކޮށްފައި ނުވެ އެވެ.
ނަމަވެސް ބަރޯ ވަޑައިގަންނަވާ ތަނަށް ހުޅަނގު އެފްރިކާގެ އަސްކަރީ ފައުޖުތަކުން ވަނީ ވެރިރަށް ބަންޖުލްގެ ސަލާމަތީ ކަންތައްތައް ވަރުގަދަކޮށްފަ އެވެ. އަދި ގެމްބިއާގެ ގިނަ ބަޔަކު ދަނީ ވެރިކަން ބަދަލު ވުމާ ގުޅިގެން އުފާ ފާޅު ކުރަމުންނެވެ. (ބީބީސީ)