ފީފާއިން ހޮވާ އެންމެ މޮޅު ކޯޗަކަށް ލެސްޓާ ސިޓީގެ ކޯޗު ކްލައުޑިއޯ ރަނިއޭރީ ހޮވިއްޖެއެވެ.
ސްވިޒަލެންޑްގެ ޒިއުރިކްގައި މިހާރު ކުރިއަށްދާ ދަ ބެސްޓް ފީފާ ފުޓްބޯލް އެވޯޑްސް ހަފްލާގައި ފީފާ އެންމެ މޮޅު ފިރިހެން ކޯޗުގެ އެވޯޑު ވަނީ ހަވާލުކޮށްފައެވެ.
އެންމެ މޮޅު ކޯޗުގެ އެވޯޑަށް އިޓަލީގެ ރަނިއޭރީއާ ވާދަކޮށްފައިވަނީ ޕޯޗުގަލް ގައުމީ ޓީމުގެ ކޯޗު ފެނާންޑޯ ސަންޓޯސް އަދި ރެއާލް މެޑްރިޑްގެ ކޯޗު ޒައިނުއްދީން ޒިދާންއެވެ.
ރަނިއޭރީ ވަނީ މިދިޔަ އަހަރު ލެސްޓާ ސިޓީއަށް އިނގިރޭސި ޕްރިމިއާ ލީގު ކާމިޔާބުކޮށްދީ، ބޮޑެތި ކްލަބުތައް ހައިރާންކޮށްލުވައިފައެވެ. އޭނާއާ ވާދަކުރި ސަންޓޯސް ޕޯޗުގަލްއަށް މިދިޔަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކޮށްދިންއިރު، ޒިދާން ވަނީ ރެއާލް މެޑްރިޑަށް މިދިޔަ އަހަރު ޔޫއެފާ ޗެމްޕިއަންސް ލީގު ހޯދައިދީފައެވެ.