ކުޑަ ހެންވޭރު ޔުނައިޓެޑް 0-3ގެ ނަތީޖާއަކުން ބަލިކޮށް ތިން ވަނަ ޑިވިޝަން ފުޓްބޯޅަ މުބާރާތުގައި، ކުޅުނު ހުރިހާ މެޗެއް ކާމިޔާބުކޮށްގެން އެމުބާރާތުގެ ޗެމްޕިއަންކަން ވީކޭ ސްޕޯޓްސް ކްލަބުން ހޯދައިފިއެވެ.
ގައުމީ ފުޓްބޯޅަ ދަނޑުގައި ރޭ ކުޅުނު ފޯރިގަދަ ފައިނަލް މެޗުގައި ދެ ޓީމްގެ ފަރާތުން ވެސް ވަރުގަދަ ކުޅުމެއް ވަނީ ފެނިގެންގޮސްފައެވެ. މެޗުގައި ފެނިގެން ދިޔަ ތިން ގޯލު ވެސް ދެވަނަ ހާފްގައި ފެނިގެން ދިޔައިރު ވީކޭއިން ވަނީ ގޯލު ޖަހާނެ ރަނގަޅު ފުރުސަތުތަކެއް ވެސް ތަނަވަސްކޮށްފައެވެ.
ވީކޭއަށް ލީޑް ލިބުނީ މެޗުގެ 68 ވަނަ މިނެޓްގައި މުހައްމަދު ސުޖަން އަހުމަދު ކާމިޔާބުކޮށްދިން ގޯލުންނެވެ. ވީކޭ ދެވަނަ ގޯލު 86 ވަނަ މިނެޓްގައި އަހުމަދު ހަލީމް ކާމިޔާބުކޮށްދިންއިރު ފަހު ގޯލު އިތުރުވަގުތުގެ ތެރޭގައި ކާމިޔާބުކޮށް ލީޑް ފުޅާކޮށްދިނީ އަލީ މަލާޝްއެވެ.
ތިން ވަނަ ޑިވިޝަންގެ ޗެމްޕިއަންކަން ނެގި ވީކޭ އާއި ކުޑަހެންވޭރު މި ސީޒަނުގައި ވަނީ ދެވަނަ ޑިވިޝަނަށް ޕްރޮމޯޓްވެފައެވެ.
މުބާރާތުގެ އެންމެ މޮޅު ކުޅުންތެރިޔާގެ މަގާމް ލިބުނީ ވީކޭގެ އަހުމަދު ހަލީމަށެވެ. އެންމެ މޮޅު ގޯލުކީޕަރުގެ މަގާމު ވީކޭގެ މުހައްމަދު ޖަޒްލާން ހޯދިއިރު ފެއާޕްލޭ ޓީމަކީ ނަޒާކީ ފުޓްބޯލް ކްލަބެވެ.