ކުޑަކުދިންނާއި ބޮޑެތި މީހުންނަށް އެކި ކަހަލަ ހުނަރުތައް ދަސްކޮށްދިނުމުގެ މަސައްކަތް ކުރާ ސްކިލް ޓްރެއިނިންގް ސެންޓަރުން ކުޑަކުދިންނަށް ޚާއްސަކޮށްގެން މި ސްކޫލް ބަންދުގައި ހިންގާ ހޮލިޑޭ ޕެކޭޖުތަކުގެ ދެވަނަ ބުރު ނިންމާލައިފިއެވެ.
އެ ސެންޓަރުން މައުލޫމާތު ދޭ ގޮތުގައި ޑިސެމްބަރު ހަތަރަކުން 15 އަށް ހިންގި ހޮލިޑޭ ޕެކޭޖުގެ ދެވަނަ ބުރުގައި، ތިން އަހަރާއި 12 އަހަރާ ދެމެދުގެ 40 ކުދިން ބައިވެރިވި އެވެ.
ދިހަ ދުވަހުގެ މުއްދަތަކަށް، މި ޕެކޭޖުތަކުގެ ކޮންމެ ބުރެއްވެސް ކުރިޔަށް ގެންދާ އިރު، މި ޕެކޭޖުގެ ދަށުން ކުޑަކުދިންނަށް ސޯޝަލް ސްކިލްސް، ސްޓަޑީ ސްކިލްސް އަދި އާޓްސް އެންޑް ކްރާފްޓްސް ގެ ހަރަކާތްތައް ހިންގުނެވެ.
ހޮލިޑޭ ޕެކޭޖްގެ ދެވަނަ ބުރު އިއްޔެ ނިންމާލި އިރު، އެ ބުރުގައި ބައިވެރިވި 40 ކުދިންނަށް އިއްޔެ ވަނީ ސެޓްފިކޭޓު ހަވާލުކޮށްފައެވެ. ސެޓްފިކޭޓު ހަވާލުކޮށްދެއްވީ ރާއްޖޭގައި މަސައްކަތް ކުރަމުން އަންނަ ގައިނަކޮލޮޖިސްޓް ޑރ. މީތާ ޖޯލީއެވެ.
ސްކިލް ޓްރެއިނިންގް ސެންޓަރުން މައުލޫމާތު ދޭ ގޮތުގައި، އެ ސެންޓަރުގެ ހޮލިޑޭ ޕެކޭޖުގެ ތިންވަނަ ބުރު މި މަހުގެ 18 ވަނަ ދުވަހު ފަށާނެއެވެ. އެ ބުރުގައި ވެސް 40 ދަރިވަރުން ބައިވެރިވާނެ ކަމަށް އެ ސެންޓަރުން ބުނެއެވެ.