ސްކިލް ޓްރެއިނިންގް ސެންޓަރުން އިންތިޒާމްކޮށްގެން ސްކޫލް ކުދިންގެ ދެވަނަ ޓާމް ބަންދުގައި "ސްކިލް ހޮލިޑޭ" ގެ ނަމުގައި ހާއްސަ ޕްރަގްރާމެއް ކުރިއަށް ގެންގޮސްފިއެވެ.
ޖުމްލަ 176 ކުދިންނާއެކު ސްކިލް ހޮލިޑޭ ޕްރަގްރާމް ކުރިއަށް ގެންގޮސްފައިވަނީ މިދިޔަ ނޮވެމްބަރު މަހުގެ 24 ވަނަ ދުވަހުން ފެށިގެން މިމަހުގެ ހަތަރު ވަނަ ދުވަހުގެ ނިޔަލަށެވެ. އެހެން އަހަރުތަކެކޭވެސް އެއްފަދައިން މިއަހަރުވެސް ކުދިންގެ ހުނަރުތައް ތަރައްގީ ކުރުމަށްޓަކައި ތަފާތު އުމުރުފުރާތަކަށް ބަހައިގެން 10 ޕްރޮގްރާމްތައް ވަނީ ގެންގޮސްފައިއެވެ.
"ސްކިލް ހޮލިޑޭ" ޕްރޮގްރާމްގެ ތެރެއިން ---- ފޮޓޯ: ސްކިލް ޓްރެއިނިންގް ސެންޓަރު
މިޕްރޮގްރާމްތައް ކުރިއަށް ގެންދިޔައީ ފަސް ދުވަހަށް، އަށް ދުވަހަށް، އަދި އެއް މަސްދުވަހަށް ކުދިންނަށް ބައިވެރިވެވޭ ގޮތަށް ބަހާލައިގެންނެވެ. ބެލެނިވެރިންގެ އެދުމުގެ މަތިން ޗުއްޓީ ހޭދަކޮށްލަން ރަށްތަކަށް ދިޔަކަމުގައި ވިޔަސް އެނބުރި އައިސް ދަރިވަރުންނަށް ބައިވެރިވެވޭ ގޮތަށް ކުރިއަށް ގެންދިޔަ މިޕްރޮގްރާމްތަކުގައި ކުޑަކުދިންގެ ހުނަރު ތަރައްގީކުރުމަށް އެހީތެރިވެދިނުމުގެ ގޮތުން މުހިންމު ގިނަ ޕްރަގްރާމްތަކެއް ވަނީ ކުރިއަށް ގެންގޮސްފައެވެ.
"ސްކިލް ހޮލިޑޭ" ޕްރޮގްރާމްގެ ތެރެއިން --- ފޮޓޯ: ސްކިލް ޓްރެއިނިންގް ސެންޓަރު
މިޕްރޮގްރާމްގައި ސޯޝަލް ސްކިލްސް، ކްރިއޭޓިވްއާޓްސް، ލިޔަން ކިޔުމުގެ އިތުރަށް ކެއްކުމުގެ ހުނަރުތައް، ވަގުތުގެ ބޭނުން ހެޔޮގޮތުގައި ހިފުން ފަދަ މުހިންމު ބައިތަކާ ބެހޭ މައުލޫމާތު ވަނީ ދީފައެވެ. މިޕްރޮގްރާމްތަކުގައި ކިޔަވައިދެއްވީ ސްކިލްސް ޓްރެއިނިންގް ސެންޓަރުގެ ސްކިލް ޓްރެއިނަރުންނެވެ. އަދި ޕްރަގްރާމް ނިންމާލުމުގެ ގޮތުން ދަރިވަރުންނަށް ވަނީ ސެޓްފިކެޓްވެސް ދީފައެވެ.
"ސްކިލް ހޮލިޑޭ" ޕްރޮގްރާމްގެ ތެރެއިން-- ފޮޓޯ: ސްކިލް ޓްރެއިނިންގް ސެންޓަރު
ބެލެނިވެރިންގެ ބޮޑު އިތުބާރެއް ލިބިފައިވާ ސްކިލް ޓްރެއިނިންގް ސެންޓަރުން ހިންގާ ކުޑަކުދިންގެ ތަފާތު ޕްރަގްރާމްގައި ކޮންމެ އަހަރަކު ގިނަ އަދަދެއްގެ ކުދިން ދަނީ ބައިވެރިވަމުންނެވެ.
"ސްކިލް ހޮލިޑޭ" ޕްރޮގްރާމްގެ ތެރެއިން --- ފޮޓޯ: ސްކިލް ޓްރެއިނިންގް ސެންޓަރު
ސްކިލް ޓްރެއިނިންގް ސެންޓަރުން ބުނީ މިމަހު 14ގައި އެ ސެންޓަރުގެ ކިޔެވުން ފެށޭނެ ކަމަށާއި، މިއަހަރު ވެސް "ކިޔަމާލިޔަމާ" ޕްރޮގްރާމް އާއި ސްކިލް ފޯނިކް ޕްރޮގްރާމް އަދި ސްކިލް ޓްރެއިނިންގް ޕްރޮގްރާމް ހިމެނޭ ކަމަށެވެ.