ބިލަބޮންގް ސްކޫލުގައި ތިން ދުވަހުގެ މުއްދަތަކަށް ކުރިއަށް ގެންދިޔަ "ކައްޓި ހިއްވަރު" ފެސްޓިވަލަށް ރޭ ބަޔަކު ވަދެ ހަމަނުޖެހުން ހިންގައިފި އެވެ.
ހަމަނުޖެހުން ހިނގި ވަގުތު އެ ފެސްޓިވަލުގައި ހުރި މީހަކު "ސަން" އަށް ކިޔައިދިން ގޮތުގައި ހަމަނުޖެހުން ހިންގީ ބޭރުން ވަތް ގްރޫޕަކުންނެވެ. އެ ގްރޫޕުން މައްސަލަ ޖައްސައި އިންޒާރު ދިނީ އެ ފެސްޓިވަލްގައި ބަހައްޓާފައި ހުރި ޗާޓެއްގައި ހުރި ލިޔުންތަކަކާ ގުޅިގެން ކަމަށް އެމީހާ ބުންޏެވެ.
އެމީހާ ބުނި ގޮތުގައި އެ ގްރޫޕުން ވަނީ ފެސްޓިވަލަށް ވަދެ މާރާމާރީ ހިންގަން ވެސް މަސައްކަތްކޮށްފަ އެވެ. އެގޮތުން އެތަނުގައި ހުރި ތަކެއްޗަށް ގެއްލުންދީ ބައެއް މީހުންނަށް އިންޒާރުދީ ހަދާފައިވާ ކަމަށް އޭނާ ބުންޏެވެ.
ފުލުހުން ބުނީ ރޭ 9:30 އެހާކަންހާއިރު ބިލަބޮންގުގައި އޮތް ފެސްޓިވަލްއަށް ގްރޫޕަކުން ވަދެ ހަމަނުޖެހުން ހިންގި ކަމަށެވެ. ހަމަނުޖެހުން ހިނގައިގެން އުޅޭ ކަމުގެ ރިޕޯޓު ލިބުމާ އެކު އެތަނަށް ގޮސް ހަމަނުޖެހުން ހުއްޓުވި ކަމަށާއި އެ މައްސަލާގައި ދެމީހަކު ހިފެހެއްޓި ނަމަވެސް ނަސޭހަތް ދިނުމަށްފަހު ދޫކޮށްލާފައިވާ ކަމަށް ފުލުުހުން ބުންޏެވެ.
"ކައްޓި ހިއްވަރު" ފެސްޓިވަލަކީ ޒުވާނުންގެ ހުނަރުތަކާއި އަމިއްލަ އުފެއްދުންތައް ދައްކާލުމަށް ކޮންމެ އަހަރަކު ބާއްވާ ފެސްޓިވަލެކެވެ.