ދުނިޔޭގެ އެންމެ މޮޅު ފުޓްބޯޅަ ކުޅުންތެރިއަކީ ލިއޮނަލް މެސީ ހެއްޔެވެ؟ ނުވަތަ ކްރިސްޓިއާނޯ ރޮނާލްޑޯ ރޮނާލްޑޯ ހެއްޔެވެ؟ މިއީ ފުޓްބޯޅައިގެ ލޯބީގައި ޖެހިފައިތިބޭ އެތަކެއް މިލިއަން މީހުން ކޮންމެ ދުވަހަކުހެން ކުރަމުންދާ ބަހުސެކެވެ. މި ބަހުސު ނުކޮށް ވާންވެސް ނޯންނަނީ އެވެ. ފުޓްބޯޅަ ދުނިޔޭގެ އެންމެ އުހުގައި ފިޔަޖަހަމުންދާ މި ދެކުޅުންތެރީންގެ ވާދަވެރިކަން ދަނީ ދުވަހެއް ދުވަހަކަށް އިތުރުވަމުންނެވެ. އެހެންކަމުން ސަޕޯޓަރުންނަށް ވެސް އިތުރު ގޮތެއް ނެތީ އެވެ.
މިފަހަރު މިއޮތީ އަނެއްކާ ވެސް މި ދެކުޅުންތެރީން ލަނޑުގެ ރެކޯޑެއް ގާއިމުކުރުމަށް ޖަހަމުންދާ ވަރުގަދަ ރޭހެކެވެ. އެއީ ކްލަބު ފުޓްބޯޅައިގައި ދުނިޔޭގެ އެންމެ ގިނަ ބައެއްގެ ސަމާލުކަން އެ މުބާރާތަކަށް ލިބިފައިވާ ޔުއެފާ ޗެމްޕިއަންސް ލީގުގައި އެންމެ ފުރަތަމަ ލަނޑުގެ "ސެންޗަރީ"އެއް ހެދުމުގެ ޝަރަފުވެރި ރޭހެވެ.
މިފަހަރުގެ ފުޓްބޯޅަ ސީޒަން ފެށިގެން އައި އިރު، ގިނަ ބަޔަކު ނިންމައިގެން ތިބި ގޮތުގައި، ޗެމްޕިއަންސް ލީގުގައި 100 ލަނޑު ހަމަކުރާނޭ ފުރަތަމަ ކުޅުންތެރިއަކީ ރެއާލް މެޑްރިޑްގެ ޕޯޗްގީޒް ތަރި ކްރިސްޓިއާނޯ ރޮނާލްޑޯ އެވެ. އެހެންނަމަވެސް ސީޒަންގެ މެދަށް އައި އިރު އެ ހީވުން މިވަނީ މުޅިން ބަދަލުވެފަ އެވެ.
ރެއާލް މެޑްރިޑްގެ ކުރީގެ ތަރި ސްޕެއިންގެ ރައުލް ގޮންޒާލޭޒް، ޗެމްޕިއަންސް ލީގުގައި ޖުމުލަ 71 ކާމިޔާބުކޮށްގެން ގާއިމުކޮށްފައިވާ އެންމެ ގިނަ ލަނޑުޖެހުމުގެ ރެކޯޑް 2014 ވަނަ އަހަރު މުގުރާލީ މެސީ އެވެ. އެހެން ނަމަވެސް، މެސީގެ ވާދަވެރިޔާ ރޮނާލްޑޯ ވަނީ މިދިޔަ ސީޒަންގައި ޖުމުލަ 16 ލަނޑު ކާމިޔާބުކޮށް، މެސީގެ އެ ރެކޯޑް މުގުރާލައިފަ އެވެ.
ދުނިޔޭގެ ފުޓްބޯޅައިގައި އެންމެ ވާދަވެރި ދެ ކުޅުންތެރީން ކަމަށްވާ، ރެއާލް މެޑްރިޑްގެ ޕޯޗްގީޒް ތަރި ކްރިސްޓިއާނޯ ރޮނާލްޑޯއާއި ބާސެލޯނާގެ އާޖެންޓީނާ ތަރި ލިއޮނަލް މެސީ-- ފޮޓޯ: ގޯލް
ޕޯޗުގީޒް ސުޕަ ސްޓާ މިދިޔަ ސީޒަންގެ ޗެމްޕިއަންސް ލީގުގައި ޖެހި ލަނޑުތަކާ އެކު އޭނާގެ ގޯލް ޓެލީ ވަނީ ވަނީ 93 އަށް އަރައިފަ އެވެ. އެއީ މެސީއަށް ވުރެ 10 ލަނޑު އިތުރު އަދަދެކެވެ. ނަމަވެސް ރެއާލުން 12 ވަނަ ޗެމްޕިއަންސް ލީގު ޓްރޮފީއާ ދިމާއަށް ދަތުރުކުރާއިރު، މި ސީޒަންގައި ރޮނާލްޑޯއަށް އަނިޔާގެ ސަބަބުން ޗެމްޕިއަންސް ލީގުގެ ބައެއް މެޗުތައް ގެއްލުނެވެ. އަދި އެ މުއްދަތުގެ ތެރޭގައި މެސީ ވަނީ، އޭނާގެ ލަނޑުޖެހުމުގެ ޖާދޫފޮތް ހުޅުވާލައި، ފަހަތުން އަރައި ރޮނާލްޑޯއާ ދެލަނޑަށް ފަރަގު ކުޑަކޮށްފަ އެވެ.
ބާސެލޯނާއިން ހަތް ލަނޑުޖަހައި ސެލްޓީކް ބަރުބާދުކޮށްލި މެޗުގައި މެސީ ވަނީ ހެޓްރިކެއް ހަދައި، ކުރީން ރޮނާލްޑޯއާ އެކު އޭނާ ހިއްސާކުރަމުން ގެންދިޔަ ހެޓްރިކް ލަނޑުގެ ރެކޯޑު ވެސް އާކޮށްފަ އެވެ. އަދި މެންޗެސްޓާ ސިޓީއާ ދެކޮޅަށް ބާސާގެ އަމިއްލަ ދަނޑުގައި ކުޅުނު މެޗުގައި އިތުރު ހެޓްރިކެއް ހަދައި މެސީ ވަނީ އޭނާ ޗެމްޕިއަންސް ލީގުގައި ހެދި ހެޓްރިކްގެ އަދަދު ހަތަކަށް އަރުވައިފަ އެވެ. ހަމަ އެހެންމެ ސިޓީއާ ދެކޮޅަށް އިއްތިހާދު ސްޓޭޑިއަމްގައި ކުޅުނު މެޗުގައި ވެސް މެސީ ވަނީ ލަނޑުޖަހައިފަ އެވެ.
ޗެމްޕިއަންސް ލީގުގައި އެންމެ ފަހުން ބޮރޫޝިއާ މޮންޗެންގްލަބަޗްކޮޅަށް ބާސާ ކުޅުނު މެޗުގައި ލަނޑު ޖެހުމުގެ ކުރީން، މެސީ ވަނީ، ސެލްޓީކް ޕާކުގައި ސެލްޓިކާ ދެކޮޅަށް ކުޅުނު މެޗުގައިވެސް ދެ ލަނޑު ކާމިޔާބުކޮށްފައެވެ. އެގޮތުން އޭނާ ކާމިޔާބުކުރި ލަނޑުގެ އަދަދު މިހާރު 93 ކެވެ.
ޗެމްޕިއަންސް ލީގުގައި ރޮނާލްޑޯ މިހާތަނަށް ކާމިޔާބުކުރި ލަނޑުގެ އަދަދު 95ކެވެ. 10 ލަނޑުގެ ބޮޑު ފަރަގަކާ އެކު މެސީ، މި ސީޒަންފަށައިގެން މިހާރު މިވަނީ އެ ފަރަގު ދެ ލަނޑަށް ކުޑަކޮށްފަ އެވެ. ދެކުޅުންތެރީން ވެސް މިހާރު ތިބީ ރަނގަޅު ފޯމެއްގަ އެވެ.
މެސީ ރޮނާލްޑޯގެ ޗެމްޕިއަންސް ލީގު ތަފާސްހިސާބު:
- ކުޅުނު މެޗު: މެސީ 110، ރޮނާލްޑޯ 133.
- ލަނޑު: މެސީ 93، ރޮނާލްޑޯ 95.
- ޕެނަލްޓީ: މެސީ 10، ރޮނާލްޑޯ 11.
- ހެޓްރިކް: މެސީ 7، ރޮނާލްޑޯ 5.
- ޓްރޮފީ: މެސީ 4، ރޮނާލްޑޯ 3.
މިފަހަރުގެ ޗެމްޕިއަންސް ލީގުގެ ގަދަ 16ގެ ގުރުލުން އަންނަ ހޯމަ ދުވަހު ބާއްވާއިރު، މެސީގެ ބާސާވެސް އަދި ރޮނާލްޑޯގެ ރެއާލްވެސް ވަނީ ގަދަ 16އިން ޖާގަ ހޯދައިފަ އެވެ. އެހެންކަމުން 100 ލަނޑު ހަމަކުރުމަށް މި ދެކުޅުންތެރީން ޖަހާ ރޭހުގެ ވާދަވެރިކަން ކުރިއަށް އޮތީ އެވެ.