ސިޔާމް-މައުރޫފް ސޮކާ ކަޕްގެ ފައިނަލް މެޗުގެ ހާއްސަ މެހެމާނަކަށް ބާސެލޯނާގެ ފުޓްބޯޅަ ލެޖެންޑް ކާލްސް ޕުޔޯލް ގެނައުމަށް ނިންމައިފި އެވެ.
އެ މުބާރާތުގެ ފައިނަލް މެޗުގެ ހާއްސަ މެހެމާނަކަށް ޕުޔޯލް ގެނައުމަށް ނިންމާފައިވާ ކަން މުބާރާތް އިންތިޒާމް ކުރުމުގައި އިސްކޮށް ހަރަކާތްތެރިވާ އަދި ރާއްޖޭގެ ގައުމީ ފުޓްބޯޅަ ޓީމުގެ ކުރީގެ ކެޕްޓަން އައްސަދު އަބްދުލްޣަނީ ވަނީ 'ސަން' އަށް ކަށަވަރުކޮށްދެއްވައިފަ އެވެ.
އައްސަދު ވިދާޅުވީ، ސިޔާމް-މައުރޫފް ސޮކާ ކަޕްގެ ފައިނަލް މެޗަށް ޕުޔޯލް ރާއްޖެ އަށް އައުމަށް ހަމަޖެހިފައި ވަނީ މި މަހުގެ 26 ވަނަ ދުވަހު ކަމަށެވެ.
އެ މުބާރާތުގެ ފައިނަލް މެޗު މި މަހުގެ 24 ވަނަ ދުވަހު ކުޅުމަށް ކުރިން ހަމަޖެހުނު ނަމަވެސް، މިހާރު އެ މެޗު މި މަހުގެ 27 ވަނަ ދުވަހަށް ވަނީ ފަސްކޮށްފަ އެވެ. ފައިނަލް މެޗު ފަސްކޮށްފައި ވަނީ ޕުޔޯލް އަށް މި މަހުގެ 26 ވަނަ ދުވަހު އާދެވޭގޮތަށް ހަމަޖެހިފައިވުމުންނެވެ.
ޕުޔޯލް ވަނީ ޔޫތު ކެރިޔަރުން ފެށިގެން ބާސާގައި ގިނަ ދުވަސްތަކެއް ހޭދަކޮށްފަ އެވެ. ޑިފެންޑަރެއްގެ މަގާމަށް ކުޅުނު ޕުޔޯލް ވަނީ 1999 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށް ބާސާގެ ސީނިއާ ޓީމަށް ކުޅެ، މުހިންމު ދައުރެއް އަދާކޮށްފަ އެވެ. ބާސާއާ އެކު ގިނަ ކާމިޔާބުތަކެއް ހޯދި ޕުޔޯލް ވަނީ 2004 ވަނަ އަހަރުން ފެށިގެން ކުޅުން ހުއްޓާލުމާ ހަމައަށް ބާސާގެ ކެޕްޓަން ކަމުގެ ދައުރު ވެސް އަދާކޮށްފަ އެވެ. އޭގެ އިތުރުން ސްޕެއިންގެ ގައުމީ ޓީމާއެކު ވެސް އޭނާ ކާމިޔާބު ދުވަސްތަކެއް ހޭދަކުރި އެވެ.
އެހެން އަހަރުތަކާ ހިލާފަށް މި އަހަރުގެ ސިޔާމް-މައުރޫފް ސޮކާ ކަޕްގައި ނ. އަތޮޅުގެ 13 ރަށުން ވެސް ބައިވެރިވެފައިވެ އެވެ. ފާއިތުވެދިޔަ ދެ އަހަރު އެ މުބާރާތް ކުޑަފަރީގައި ބޭއްވި ނަމަވެސް، ތިން ވަނަ ސިޔާމް-މައުރޫފް ސޮކާ ކަޕް ކުރިއަށްދަނީ ކެނދިކުޅުދޫގަ އެވެ.
ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހުމަދު ސިޔާމް މުހައްމަދާއި ކެނދިކުޅުދޫ ދާއިރާގެ މެމްބަރު އަލީ މައުރޫފްގެ އިސްނެންގެވުމާއެކު ނ. އަތޮޅުގައި ފުޓްބޯޅަ ކުރިއަރުވައި، އެ އަތޮޅުން ރަނގަޅު ފެންވަރުގެ ކުޅުންތެރިން ފުޓްބޯޅައަށް ތައާރަފް ކުރުމުގެ މަގްސަދުގައި ކުރިއަށްދާ އެ މުބާރާތުގެ މެޗެއް މާދަމާ ވެސް ކުޅުމަށް ހަމަޖެހިފައިވެ އެވެ. އެ މުބާރާތުގައި މާދަމާ ހަވީރު ކުޅޭ 'ގްރޫޕް އޭ'ގެ މެޗުގައި ބައްދަލުކުރާނީ މަގޫދޫ އެފްޓީ އާއި އެފްސީ މާފަރެވެ.
މާލޭގެ އުތުރުގައި އަދި ނ. އަތޮޅުގައި ވެސް މިހާތަނަށް ބާއްވާ އެންމެ ބޮޑު އަދި އަގުބޮޑު ފުޓްބޯޅަ މުބާރާތް ކަމަށްވާ ސިޔާމް މައުރޫފް ސޮކާ ކަޕްގެ ޗެމްޕިއަން ޓީމަށް މި އަހަރު 150،000 ރުފިޔާގެ ފައިސާގެ އިނާމެއް ހުށަހަޅާފައި އިރު، ރަނަރަޕަށް ހުށަހަޅާފައި ވަނީ 100،000 ރުފިޔާގެ ފައިސާގެ އިނާމެކެވެ. ފެއާޕްލޭ ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައިވާ އިރު، އެންމެ ފޯރިއާއެކު ސަޕޯޓްކުރާ ޓީމަށް ހުށަހަޅާފައި ވަނީ 15،000 ރުފިޔާގެ ފައިސާގެ އިނާމެކެވެ.