އަންނަ އަހަރަށް ލަފާކޮށް ހުށަހަޅާފައިވާ ބަޖެޓަށް 18 އިސްލާހެއް ގެނައުމަށް ހުށަހަޅައިފި އެވެ.
މި އިސްލާހުތައް ހުށަހަޅާފައި ވަނީ ބަޖެޓު ދިރާސާ ކުރާ ކޮމެޓީން، ބަޖެޓު ދިރާސާކުރުމަށް ފަހު މިއަދު މަޖިލީހުގެ ތަޅުމަށް ފޮނުވުމުންނެވެ.
މަޖިލީހުގެ ތަޅުމަށް ހުށަހަޅުއްވަމުން ބަޖެޓު ދިރާސާ ކުރާ ކޮމިޓީގެ މުގައްރިރު، ވިލިމާފަންނު ދާއިރާގެ މެމްބަރު، އަހުމަދު ނިހާނު ވިދާޅުވީ ކޮމެޓީގެ ބައްދަލުވުމުގެ ތެރޭގައި މެމްބަރުން ހުށަހެޅުއްވި 13 ރިކޮމެންޑޭޝަނެއް ރިޕޯޓުގައި ހިމެނިފައިވާނެ ކަމަށާއި މިނިވަން މުއައްސަސާތަކުން ކަންބޮޑުވުން ފާޅުކޮށްފައިވާ ކަންކަން ލިއުމުން ހޯދާފައިވާ ކަމަށާއި އެ ލިއުންތައް ވެސް ބަޖެޓު ރިޕޯޓުގައި ހިމަނާފައިވާނެ ކަމަށެވެ.
މިއަދުގެ ޖަލްސާ އަށް ބަޖެޓު ރިޕޯޓު ހުށަހެޅުމުން ޖުމްލަ 18 އިސްލާހެއް އަންނަ އަހަރުގެ ބަޖެޓަށް ހުށަހަޅާފައިވެ އެވެ.
- ކާށިދޫ ދާއިރާގެ މެމްބަރު ފައިސަލް ނަސީމް: ނުކުޅެދުންތެރިކަން ހުންނަ ފަރާތްތަކަށް ތައުލީމާއި ތަމްރީން ދިނުމަށް ޚާއްސަ ކޮށްފައިވާ ތަންތަނުގެ ވަސީލަތްތައް ތަރައްގީ ކުރުމަށާއި އެފަދަ ތަންތަނަށް ބޭނުންވާ ހުނަރުވެރިން ބިނާ ކުރުމަށް ދައުލަތުގެ ކޮންޓިންޖެންސީ ބަޖެޓުން ދެ މިލިއަން ރުފިޔާ ޖެންޑާ މިނިސްޓްރީގެ ބަޖެޓަށް އިތުރު ކުރުން.
- އައްޑޫ މީދޫ ދާއިރާގެ މެމްބަރު ރޮޒޭނާ އާދަމް: ރައްޔިތުންގެ މަޖިލީހުގެ އިދާރާގެ ބަޖެޓުން ކެޕިޓަލް ޚަރަދުގެ ބައިން 30 މިލިއަން ރުފިޔާ އުނިކުރުމަށް ފަހު އެޑިއުކޭޝަންގެ މަސައްކަތު މީހުންގެ މުސާރައަށް އެ އަދަދު އިތުރު ކުރުން.
- އައްޑޫ މީދޫ ދާއިރާގެ މެމްބަރު ރޮޒޭނާ އާދަމް: ރައީސުލްޖުމްހޫރިއްޔާގެ ރަސްމީގެ އިން ފަސް މިލިއަން ރުފިޔާ އުނިކުރުމަށް ފަހު އެ ފައިސާ ފެމިލީ ޕްރޮޓެކްޝަން އޮތޯރިޓީގެ ކެޕިޓަލް ޚަރަދުގެ ގޮތުގައި އިތުރު ކުރުން.
- ވައިކަރަދޫ ދާއިރާގެ މެމްބަރު މުހައްމަދު ނާޒިމް: ރައީސުލްޖުމްހޫރިއްޔާގެ ރަސްމީ ގެއިން ހަތް މިލިއަން ރުފިޔާ އުނިކުރުމަށް ފަހު އެފައިސާ ސިވިލް ސާވިސް މުއައްޒަފުންގެ މުސާރައަށް އިތުރު ކުރުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ސަރުކާރު ކުންފުނިތަކާއި ސަރުކާރު ބައިވެރިވާ ކުންފުނިތަކާއި ވިޔަފާރި އުސޫލުން ހިންގާ ސަރުކާރުގެ ތަންތަނުގެ ބޯޑަށް ސަރުކާރުގެ ފަރާތުން މީހުން އައްޔަން ކުރަން ޖެހޭނީ ކެޕިޓަލް މާކެޓް ޑިވެލޮޕްމެންޓް އޮތޯރިޓީގެ ކޯޕަރޭޓް ޑައިރެކްޓާސް އެންޑް ސްޓްރެޓެޖީސް (އައިސީޑީއެސް) އިން ހިންގާ ޑިރެކްޓަރުންގެ ކޯސް ފުރިހަމަ ކޮށްފައިވާ ފަރާތްތައްކަމަށް ކަނޑައެޅުން. އަދި އެފަދަ ކުންފުނިތަކާއި ތަންތަނުގައި ތިބި ޑިރެކްޓަރުންނަކީ އައިސީޑީއެސްގެ އެ ކޯސް ފުރިހަމަ ކޮށްފައިވާ ފަރާތްތައް ނޫން ނަމަ 31 ޖޫން 2017 ކުރިން އެ ކޯސް ފުރިހަމަ ނުކޮށްފި ނަމަ ބޯޑުން ވަކި ކުރުމަށް.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ބަޖެޓު ފޮތުގައި ޕީއެސްއައިޕީ ޕްރޮޖެކްޓުތައް ހިންގާފައިވާ ރަށްތަކާއި ނުހިންގާ ރަށްތައް އެނގޭ ގޮތަށް ޓޭބަލެއް އެކުލަވާލުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ފިނޭންސް މިނިސްޓްރީގެ ބަޖެޓުން ނުކުޅެދުންތެރިކަން ހުންނަ ފަރާތްތަކަށް 5000 ރުފިޔާ ދިނުމަށް
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ވަޒީފާ ހޯދަން މަސައްކަތްކޮށް، ވަޒީފާ ނުލިބޭ ފަރާތްތަކަށް 2000 ރުފިޔާގެ އިނާޔަތެއް ދިނުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: އަސާސީ ޚިދުމަޔް ނުދެވި ހުރި ރަށްތަކުގައި އެޚިދުމަތް ދިނުމަށް އިސްކަން ދިނުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ބަޖެޓު އިމްޕްލިމެންޓް ކުރެވޭ މިންވަރު ދަނެގަތުމަށް ކޮންމެ ތިން މަހަކު އެއް ފަހަރު ކުއާޓާލީ ރިޕޯޓެއް މަޖިލީހަށް ހުށަހެޅުމަށް
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ޓެކުހެއް އަލަށް ތައާރަފް ކުރާއިރު ނުވަތަ ޓެކުހަކަށް ނަގާ މިންވަރު އިތުރު ކުރުމުން އެކަން ތަންފީޒު ކުރުމަށް ހަމަސް ދުވަހުގެ މުއްދަތެއް ދިނުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: 1 ޖެނުއަރީ 2017 ގެ ކުރިން މިނިމަމް ވޭޖެއް ތައާރަފް ކުރުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ދައުލަތުގެ އިދާރާތަކުން ހިއްސާ ކުރެވޭ ގޮތަށް ހުންނަ ވަސީލަތްތައް އިންޓަގްރޭޓެޑް ވަސީލަތްތަކުގެ ގޮތުގައި ހެދުމަށް ސަރުކާރުގެ ފަރާތުން މަސައްކަތް ކުރުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ކާޑުގެ ބާވަތްތައް ހުރިހާ ރަށެއްގައި ވެސް އެއް އަގެއްގައި ލިބޭ ގޮތަށް ހަމަޖެއްސުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ހުރިހާ ރަށެއްގައި ފެނާއި ކަރަންޓުގެ ޚިދުމަތް އެއް އަގެއްގައި ދިނުން.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: މާލިއްޔަތު ގާނޫނާއި ދައުލަތުގެ ޚަރަދަށް ޒިންމާވާ ގާނޫނުގައިވާ ކަންކަމަށް ރިޔާއަތްކޮށް ބަޖެޓު ފާސްކުރުމަށް.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ގެދޮރު އިމާރާތް ކުރުމަށާއި އޮޑިދޯނިފަހަރު ބަނުމަށް އިންޓަރެސްޓް ކުޑަ ލޯނު ދޫކުރުމަށް.
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް: ބޭސް ފަރުވާއަށް ޓަކައި ރާއްޖެއާއި ރާއްޖެ އިން ބޭރަށްދާ ފަރާތްތަކުގެ ތެރެއިން ކެއުން ބުއިމާއި ހުރުމުގެ ޚަރަދާ ނުބައްލަދު ފަރާތްތަކަށް އާސަންދައިގެ ދަށުން އެހީދިނުން.
އެ އިސްލާހުތަކުގެ ތެރެއިން އެމްޑީޕީ އިން ހުށަހެޅީ 17 އިސްލާހެވެ. އަދި ޖޭޕީ އިން އެއް އިސްލާހެވެ.