ވޮޝިންޓަން (ނޮވެމްބަރު 13): އެމެރިކާގެ ރިޔާސީ އިންތިހާބު ނާކާމިޔާބުވެފައި ވަނީ އެފްބީއައިގެ ޑިރެކްޓަރު ޖޭމްސް ކޯމީ އަމަލު ކުރެއްވި ގޮތުން ކަމަށް ހިލަރީ ކްލިންޓަން ވިދާޅުވާ ފޯނު ކޯލެއް ލީކުވެއްޖެ އެވެ.
ޑިމޮކްރަޓިކް ޕާޓީއަށް އެހީ ފޯރުކޮށް ދިން އިސް ފަރާތްތަކަކާ މުހާތަބުކޮށް ދެއްކެވި ވާހަކާގައި ހިލަރީ ވިދާޅުވީ އިންތިހާބު ބާއްވަން ގާތްވެފައި ވަނިކޮށް އޭނާގެ އާ އީމެއިލްތަކެއް ތަހުގީގު ކުރަން ފެށުމުން ކެމްޕެއިންގެ ކުރިއެރުން ހުއްޓުމަކަށް އައި ކަމަށެވެ.
"މިކަހަލަ އިންތިހާބެއް ނާކާމިޔާބުވުމުގެ ވަރަށް ގިނަ ސަބަބުތައް ވާނެ. ނަމަވެސް އަޅުގަނޑުމެން ބެލި ބެލުމުން އެނގެނީ ކޯމީގެ ސިޓީގެ ސަބަބުން އެއްވެސް ބަރުދަނެއް ނެތް ކުށްހީތަކެއް އުފެދި، އަޅުގަނޑުމެންގެ ކުރިއެރުން ވަރަށް ބޮޑަށް ހުއްޓުނުކަން. އަޅުގަނޑުމެންނަށް ޖެހުނީ ކުރި ހޯދަން ވަރަށް ބޮޑަށް މަސައްކަތްކުރަން،" ހިލަރީ ވިދާޅުވި އެވެ.
އެމެރިކާގެ ސެކްރެޓަރީ އޮފް ސްޓޭޓުގެ ގޮތުގައި ހިލަރީ ހުންނެވި އިރު ބޭނުން ކުރެއްވި އަމިއްލަ އީމެއިލް ސާވާއާ ގުޅުން ހުރި އާ އީމެއިލްތަކެއް އެފްބީއައިއިން ތަހުގީގު ކުރަން ފަށާފައިވާ ކަން ކޯމީ އެގައުމުގެ ކޮންގްރެސްއަށް އެންގެވީ އޮކްޓޯބަރު 28ގަ އެވެ. ނަމަވެސް އިންތިހާބު ފެށެން ދު ދުވަހަށް ވެފައި ވަނިކޮށް އެފްބީއައި އިން ވަނީ އާއީމެއިލްތަކުގައި ސިއްރު މައުލޫމާތެއް ނެތް ކަމަށާއި، ހިލަރީގެ މައްޗަށް ޖިނާއީ ދައުވާ ނުކުރެވޭނެ ކަމަށް ނިންމާފަ އެވެ.
އެމެރިކާގެ ވެރިކަމުގެ ހުވާ ޑޮނަލްޑް ޓްރަމްޕް ކުރައްވާނީ އަންނަ ޖެނުއަރީ 20ގަ އެވެ. (ބީބީސީ)