މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމްކޮށްގެން ބޭއްވުމަށް ހަމަޖެހިފައިވާ "ސުލްތާން އޮފް ތަނބުރުދޫ" މާދަމާ ކުރިއަށްދާ އެވެ.
މާދަމާ ކުރިއަށްދާ ބޮޑީބޯޑިންގެ އެ ހަރަކާތަކީ މި އަހަރު އެމްބީބީއޭ އިން ބާއްވާ އެންމެ ބޮޑެތި ހަރަކާތްތަކުގެ ތެރެއިން އެއް މުބާރާތެވެ.
ސުލްތާން އޮފް ތަނބުރުދޫ ބޭއްވުމަށް ހަމަޖެހިފައި ވަނީ ކ. ތަނބުރުދޫގަ އެވެ. އެ ރަށަކީ ފަޅުރަށެއްގެ ގޮތުގައި ހަމަޖައްސާފައި އޮތް ރަށެއް ކަމަށް ވިޔަސް، ދުނިޔޭގެ އެންމެ ހިތްގައިމު އަދި އެންމެ ބޮޑެތި ރާޅުތައް ނަގަމުންދާ ތަންތަނުގެ ތެރޭގައި ރާއްޖޭގެ ތަނބުރުދޫ ހިމެނެ އެވެ.
މި އަހަރު ބާއްވާ ބޮޑީބޯޑިންގެ ދެ ވަނަ މުބާރާތް ކަމަށްވާ ސުލްތާން އޮފް ތަނބުރުދޫ އަކީ ނޮކްއައުޓް އުސޫލުން ކުރިއަށްދާ މުބާރާތެކެވެ. މާދަމާ ކުރިއަށްދާ އެ މުބާރާތުގެ ކުރިން ބޭއްވި ބޮޑީބޯޑިންގެ ފުރަތަމަ މުބާރާތަކީ ވިލިމާލޭގައި ކުރިއަށްގެން ދިޔަ އެމްބީބީއޭ ވިލިނގިލި ޕްރޯ އެވެ. އެ މުބާރާތުގެ ޗެމްޕިއަންކަން ހޯދާފައި ވަނީ ރާއްޖޭގެ އެއް ވަނަ ބޮޑީބޯޑަރު އަލީ ހުޝްރުވާން(ކުޑައައްޔަ) އެވެ.
ސުލްތާން އޮފް ތަނބުރުދޫ އަކީ ކުރިން ރިސޯޓެއްގެ ގޮތުގައި ތަރައްގީކުރަން ބަޔަކާ ހަވާލުކުރި ރަށެކެވެ. ރިސޯޓް ތަރައްގީ ކުރުމަށް އޮގަސްޓް 2012ގައި ތަނބުރުދޫ ބަޔަކަށް ކުށްޔަށް ދިން ނަމަވެސް، އެއްބަސްވުމުގައިވާ ތާރީހަށް ރިސޯޓް ތަރައްގީ ނުކުރެވުމުން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔާމްގެ ސަރުކާރުން ވަނީ އެ ރަށަކީ ރާޅާއެޅުމަށް ހާއްސަ ރަށެއްގެ ގޮތުގައި ހަމަޖައްސައިފަ އެވެ.