ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަކުރައްވާ އަހްމަދު ޠާރިޤު (ޓޮމް)ގެ އެކްސްކޯގައި ހިމެނިވަޑައިގަންނަވާތީ، ކުޅިވަރާބެހޭ ގައުމީ މަޖިލީހުގެ މެމްބަރު ޢާއިޝަތު ރޯޒާ އެ މަގާމުން ވަކިކޮށްފިއެވެ.
ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު މުހައްމަދު އިސްމާއީލްގެ އަނބިކަނބަލުން ރޯޒާ، ކުޅިވަރާބެހޭ ގައުމީ މަޖިލީހުން ވަކިކުރެއްވިކަން އޭނާއަށް އަންގަވައި ޒުވާނުންނާއި ކުޅިވަރާބެހޭ ވަޒީރު އިރުތިޝާމް އާދަމް މިއަދު ވަނީ ސިޓީއެއް ފޮނުއްވައިފައެވެ.
ޒުވާނުންނާއި ކުޅިވަރާބެހޭ ވުޒާރާގެ ކޯޑިނޭޓަރު ހުސައިން އަމީން ވަނީ، ކުޅިވަރާބެހޭ ަގައުމީ މަޖިލީހުގެ މެމްބަރުކަމުން ރޯޒާ ވަކިކުރެއްވިކަން އަންގަވައި، ވަޒީރުގެ ފަރާތުން ސިޓީއެއް ފޮނުވާފައިވާކަން ސަންއަށް ކަށަވަރުކޮށްދެއްވައިފައެވެ.
އެ ސިޓީގައި ވަނީ، ކުޅިވަރު ގާނޫނުގައި ބުނެފައި ވާގޮތުން، ކުޅިވަރާބެހޭ ގައުމީ މަޖިލީހުގެ މެންބަރަކު، ގައުމީ ކުޅިވަރު އެސޯސިއޭޝަނެއްގެ ހިންގާ ކޮމެޓީގެ އިންތިހާބުގައި ވާދަކުރެއްވުމަށް ކުރިމަތިލެއްވުމުން އެ މެންބަރަކަށް ކުޅިވަރާބެހޭ ގައުމީ މަޖިލީހުގައި އޭނާގެ ޒިންމާ އަދާކުރެއްވުމުގައި މަސްލަހަތު ފުށުއަރާފަދަ ހާލަތެއް މެދުވެރިވީ ކަމަށެވެ.
ކުޅިވަރު ގާނޫނުގެ 12 ވަނަ މާއްދާގެ (ރ)ގެ 4ގައި ބުނެފައިވާ ގޮތުން، ކުޅިވަރާބެހޭ ގައުމީ މަޖިލީހުގެ މެންބަރުންގެ ޝަރުތު ތަކުގެ ތެރޭގައި "މި ގާނޫނުގެ ދަށުން ރަޖިސްޓަރީކުރާ ގައުމީ ކުޅިވަރު އެސޯސިއޭޝަނެއްގެ ނުވަތަ ފެޑެރޭށަނެއްގެ އަދި މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީގައި ހިމެނޭ މެންބަރެއް ކަމުގައިނުވުން." ހިމެނެއެވެ.
އެހެން ކަމުން އޭޕްރީލް މަހުގެ 27 ވަނަ ދުވަހު ކުޅިވަރާބެހޭ ގައުމީ މަޖިލީހުގެ މެމްބަރު ކަމަށް އައްޔަނުކުރެއްވި ރޯޒާ، މިއަދުން ފެށިގެން އެ މަޖިލީހުގެ މެންބަރުކަމުން ވަކިކޮށްފައިވާ ކަމަށް އެސިޓީގައި ވެއެވެ.
އެކަމާ ގުޅޭގޮތުން ރޯޒާ މިރޭ ސަން އަށް ވިދާޅުވީ، އޭނާ އެމަގާމުން ވަކިކޮށްފައި ވަނީ އުސޫލާ ޚިލާފަށް، އެއްވެސް މަޝްވަރާއެއް ކުރުމަކާ ނުލައި ކަމަށެވެ.
ގަވައިދު ބުނަނީ ކުޅިވަރާބެހޭ ގައުމީ މަޖިލީހުގެ މެމްބަރަކަށް އެސޯސިއޭޝަންއެއްގެ ހިންގާ ކޮމެޓީގައި ނީނދެވޭނެކަމަށް ކަމަށާއި، އިންތިހާބެއްގައި ވާދަކުރުމަކީ އަދި ވަކިކުރެވޭނެ ސަބަބެއް ނޫންކަމަށް ރޯޒާ ވިދާޅުވިއެވެ. އަދި އެގޮތަށް މެމްބަރުކަމުން ވަކިކުރާން ޖެހޭނީ އިންތިހާބުވުމަށްފަހު ކަމަށްވެސް އޭނާ ވިދާޅުވިއެވެ.
ރޯޒާއަކީ ނޮވެމްބަރު މަހުގެ 20 ވަނަ ދުވަހު ބާއްވަން ހަމަޖެހިފައިވާ، އެފްއޭއެމްގެ އިންތިޚާބުގައި ވާދަކުރެއްވުމަށް ޓޮމް ހުށަހެޅުއްވި އެކްސްކޯގައި ހިމެނިވަޑައިގަންނަވާ ހަމައެކަނި އަންހެން މެންބަރެވެ.
ޓޮމްގެ ސީނިއާ ވައިސް ޕްރެޒިޑެންޓަކަށް ހުށަހަޅާފައި ވަނީ މާޒިޔާ ސްޕޯޓްސް އެންޑް ރެކްރިއޭޝަންގެ ސީއީއޯ ހުސެން ޝާފިއު (ކޮކީ) އެވެ. ވައިސް ޕްރެޒިޑެންޓަކަށް ހުށަހަޅާފައި ވަނީ އީގަލްސްގެ ޗެއާމަން އަދި ރައްޔިތުންގެ މަޖިލީހުގެ ނައިފަރު ދާއިރާގެ މަޖިލިސް މެމްބަރު އަހުމަދު ޝިޔާމެވެ. އަންހެން މެމްބަރެއްގެ ގޮތުގައި ހުށަހަޅާފައި ވަނީ ރޯޒާއެވެ.
އެކްސްކޯގެ މެމްބަރުންގެ ގޮތުގައި ދެން ޓޮމް ހުށަހަޅާފައި ވަނީ، މާޒިޔާގެ ޖެނަރަލް ސެކެޓްރީ އަބްދުލް ވައްހާބް (ވައްކޭ)އާއި މަހިބަދޫ ޓީމުގެ މެނޭޖަރު އަހުމަދު އަނީސާއި ވިކްޓަރީ ސްޕޯޓްސް ކްލަބުގެ ބޯޑް މެމްބަރު އިބްރާހިމް ނަޒީމާއި ޖޭޖޭ ސްޕޯޓްސްގެ ރައީސް އިބްރާހިމް ސުޖާއު އާއި ނިއު ރޭޑިއަންޓް ސްޕޯޓްސް ކްލަބުގެ ވައިސް ޕްރެޒިޑެންޓް އިސްމާއިލް ޒިޔާމެވެ.