ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނައިބުރައީސްކަމަށް ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހަންމަދު ވަހީދު (ވައްޑެ) އާއި އައިމިނަތު ނާދިރާ އައްޔަނުކުރައްވައިފިއެވެ.
ޕީޕީއެމްގެ ސެކްރެޓަރީ ޖެނެރަލްކަމަށް އާދީއްތަ ދުވަހު، އެ ޕާޓީގެ ރައީސް މައުމޫން އަބްދުލް ގައްޔޫމް އައްޔަނުކުރައްވާފައިވާ އަބްދުލް އަލީމް މިރޭ ސަންއަށް ވިދާޅުވީ، ރައީސް މައުމޫނުގެ ރިޔާސަތުގެ ދަށުން މިރޭ އެ ޕާޓީގެ އޮފީހުގައި ބޭއްވި ކައުންސިލް ބައްދަލުވުމުގައި ވައްޑެއާއި ނާދިރާ އެ ޕާޓީގެ ނައިބު ރައީސުންގެ މަގާމަށް އައްޔަނުކުރައްވާފައި ވާކަމަށެވެ.
މިރޭ އެ ޕާޓީގެ އޮފީހުގައި ކުރިއަށް ގެންދިޔަ ކައުންސިލް ބައްދަލުވުމެއްގައި، ޕީޕީއެމްގެ ސްޕޯކްސް ޕާސަންގެ މަގާމުގައި ހުންނެވި ކެލާ ދާއިރާގެ މެމްބަރު އަލީ އާރިފު އެ މަގާމުން ވަކިކުރައްވައި، ބާރަށު ދާއިރާގެ މެމްބަރު އިބްރާހިމް ޝުޖާއު އެ މަގާމަށް ހަމަޖައްސަވާފައިވާ ކަމަށްވެސް އަލީމް ވިދާޅުވިއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ އާ ސްޕޯކްސް ޕާސަން ޝުޖާއު ވިދާޅުވީ މިރޭ ބޭއްވި ސައްޙަ ކައުންސިލް ބައްދަލުވުމެއް ކަމަށާއި އެ ބައްދަލުވުމުގައި 11 މެމްބަރުން ބައިވެރިވެވަޑައިގަތް ކަމަށެވެ.
ނައިބު ރައީސް ކަމަށް އައްޔަން ކުރެއްވި ނާދިރާ އަކީ އިލެކްޝަންސް ކޮމިޝަންގައިވާ ސިޔާސީ ޕާޓީތަކުގެ ދަފްތަރުން އުނިކޮށްފައިވާ ބޭފުޅެކެވެ. އިލެކްޝަންސް ކޮމިޝަންގައިވާ ސިޔާސީ ޕާޓީތަކުގެ ދަފްތަރުން ނާދިރާ އުނިކޮށްފައި ވަނީ ރައީސް ޔާމީނަށް ތާއީދު ކުރައްވާ ޕީޕީއެމްގެ ކައުންސިލް މެމްބަރުންތަކެއް އެ ކޮމިޝަނަށް ހުށަހެޅި ޝަކުވާއަކާ ގުޅިގެންނެވެ.
ނަމަވެސް ނާދިރާ މިރޭ ވިދާޅުވީ ޕީޕީއެމްގެ މެމްބަރުކަމުން އޭނާ ވަކިކޮށްފައިވާކަން ޕާޓީން ވެސް އަދި އިލެކްޝަންސް ކޮމިޝަނުން ވެސް އޭނާ އަށް އަންގާފައިނުވާ ކަމަށެވެ.