ގައުމީ ފުޓްބޯޅަ ޓީމުން ރިޓަޔާކުރި ގޯލްކީޕަރު އިމްރާން މުހައްމަދަށް ތައުރީފްކޮށް، ނިއު ރޭޑިއަންޓް ސްޕޯޓްސް ކްލަބު އަދި ގައުމީ ޓީމުގެ ކުރީގެ ކޯޗު ވެލިޒާ ޕޮޕޯވް ޝުކުރު އަދާކޮށްފި އެވެ.
ގައުމީ ޓީމުން އިއްޔެ ރިޓަޔާކުރި އިމްރާން މުހައްމަދު ސިފަކުރަމުން ޕޮޕޯވް ބުނީ، ކީޕަރު އިމްރާން އަކީ އޭނާއަށް އެންމެ މޮޅު ގޯލްކީޕަރު ކަމަށެވެ.
ކީޕަރު އިމްރާން(މ) ގައުމީ ޓީމުގެ ޖާޒީގައި: އޭނާ ވަނީ 17 އަހަރަށްފަހު ގައުމީ ޓީމުން ރިޓަޔާކޮށްފައި --- ސަން ފޮޓޯ/ ފަޔާޒު މޫސާ
"މިއީ ރާއްޖޭގެ ފުޓްބޯޅައަށް ހިތާމަވެރި ދުވަހެއް. އެކަމަކު ކޮންމެ ކުޅުންތެރިއެއް ވެސް ރިޓަޔާވާނެ. އިމްރާންއާ އެކު ނިއު ރޭޑިއަންޓް އަދި ގައުމީ ޓީމުގައި މަސައްކަތްކުރަން ލިބުމުން ފަހުވެރިވަން. އިމްރާނަކީ އަހަރެންނަށް އެންމެ މޮޅު ގޯލްކީޕަރު. ޝުކުރިއްޔާ ދަރިފުޅާ އިންމަ،" ފޭސްބުކް މެދުވެރިކޮށް ދިން މެސެޖެއްގައި ޕޮޕޯވް ބުންޏެވެ.
ޕޮޕޯވް ބުނީ، އިމްރާންގެ ކާމިޔާބު ކެރިޔަރުގައި ކޯޗެއްގެ ގޮތުން މަސައްކަތްކުރަން ފުރުސަތު ލިބުމުން ވަރަށް އުފާކުރާ ކަމަށާއި، އެކުގައި ހޯދި ކާމިޔާބީތައް ހަނދާނުން ފޮހެވިގެން ނުދާނެ ކަމަށެވެ.
ގައުމީ ޓީމަށް 17 އަހަރު ކުޅުމަށްފަހު، ގައުމީޓީމަށް ކުޅުން ހުއްޓާލުމަށް ނިންމުމުން ގިނަބަޔަކު އިމްރާނަށް ޝުކުރު އަދާކޮށް އޭނާގެ އަގުހުރި ހިދުމަތްތައް ފާހަގަކުރަމުންދެ އެވެ.