ވޯލްޑް ކަޕް ކޮލިފައިންގައި ނޮދާން އަޔަލެންޑް އަތުން 0-2ގެ ނަތީޖާ އަކުން ޖަރުމަނު މޮޅިވިއިރު ޗެކް ރިޕަބްލިކް 0-0ގެ ނަތީޖާ އަކުން އަޒަރުބައިޖާނާ އެއްވަރުވެ ބޮޑެތި ހުރަސްތަކަކާ ކުރިމަތިލާން ޖެހިއްޖެއެވެ.
ރޭގެ ނަތީޖާތަކަށް ފަހު ގްރޫޕް ސީގެ އެއްވަނައިގައި ޖަރުމަނު އޮތީ ކުޅުނު ތިން މެޗުން ނުވަ ޕޮއިންޓް ލިބިގެންނެވެ. ދެވަނައިގައި އަޒަރުބައިޖާން ހަތް ޕޮއިންޓާ އެކު އޮތްއިރު ތިން ވަނައިގައި އޮތް ނޮދާން އަޔަލެންޑަށް ލިބެނީ ހަތަރު ޕޮއިންޓެވެ. ކޮލިފައިންގައި ކުޅުނު އެއްވެސް މެޗެއް ކާމިޔާބު ނުކުރެވި ދެ ޕޮއިންޓާ އެކު ޗެކް ރިޕަބްލިކް އޮތީ ފަސް ވަނައިގައެވެ.
ރޭގެ މެޗުގައި ޖަރުމަނަށް ނޮދާން އަޔަލެންޑްގެ ގޯލު ހުޅުވާލަ ދިނީ މެޗުގެ 13 ވަނަ މިނެޓްގައި ވުލްވްސްބާގްގެ ޒުވާން ފޯވާޑް ޖޫލިއަން ރެކްސްލާއެވެ. އޭގެ ހަތަރު މިނެޓް ފަހުން ޖަރުމަނުގެ ދެވަނަ ލަނޑު ކާމިޔާބުކޮށްދިނީ ތަޖުރިބާކާރު މިޑްފީލްޑަރު ސެމީ ކެދީރާއެވެ.
ގުރޫޕް އެފްގައި ރޭ މޮންޓެނީގްރޯ ވަނީ 1-0ގެ ނަތީޖާ އަކުން ޑެންމާކް ބަލިކޮށް ހަތް ޕޮއިންޓާ އެކު އެ ގުރޫޕްގެ އެއްވަނަ ދިފާއުކޮށްފައެވެ. ދެވަނައިގައި ހަތް ޕޮއިންޓާ އެކު އޮތީ ޕޮލެންޑެވެ. އެޓީމް ވަނީ ރޭ ކުޅުނު މެޗު 2-1ގެ ނަތީޖާ އަކުން އަރުމޭނިއާ ބަލިކޮށްފައެވެ.
މެޗުގެ 31 ވަނަ މިނެޓްގައި އަރުމޭނިއާގެ ގީލް އެންޑީނިއަންއަށް ދެވަނަ ރީނދޫ ކާޑަކާ އެކު ރަތްކާޑެއް ދެއްކުމުން، އެއް ކުޅުންތެރިއަކު މަދުކޮށް ކުޅެމުންދިޔަ އަރުމޭނިއާ ކޮޅަށް ފުރަތަމަ ވަން ލަނޑަކީ، 48 ވަނަ މިނެޓްގައި އެޓީމުގެ ކުޅުންތެރިއެއްގެ އަތުން ބައިކޮޅަށް ވަން ލަނޑެކެވެ.
ޕޮލެންޑަށް ލީޑު ލިބުނުތާ ދެމިނެޓް ފަހުން އަރުމޭނިއާގެ މާކޮސް ޕިޒެއްލާ ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.
އެމެޗުގައި ޕޮލެންޑަށް ތިން ޕޮއިންޓު ކަށަވަރުކޮށްދިން ލަނޑު މެޗުގެ 90 ވަނަ މިނެޓްގައި ކާމިޔާބުކޮށްދިނީ އެންމެ ފަހުން ޑެންމާކް ކޮޅަށް ތިން ގޯލު ކާމިޔާބުކޮށް ހެޓްރިކް ހެދި ރޮބަޓް ލެވަންޑޯސްކީއެވެ.