ވޮޝިންޓަން (ސެޕްޓެމްބަރު 9): ސެމްސަންގުން އެންމެ ފަހުން ނެރުނު ގެލެކްސީ ނޯޓް 7 ފްލައިޓް ތެރޭގައި ބޭނުން ނުކުރުމަށް އެމެރިކާގެ ވައިގެ ދަތުރާ ބެހޭ އިދާރާއިން އިލްތިމާސްކޮށްފި އެވެ.
ގެލެކްސީ ނޯޓް 7 ޗާޖަށް ޖެހުމުން ބެޓެރި ގޮވުމުގެ ރިޕޯޓުތަކާ ގުޅިގެން އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ)ން ނެރުނު ބަޔާނެއްގައި އެއިދާރާއިން ވަނީ "ދަބަހެއްގެ ތެރެއަށް ލައިގެން ގެލެކްސީ ނޯޓް 7 ބޯޓަށް ނޭރުވުމަށާއި، އެފޯނު ބޯޓު ތެރޭގައި ޗާޖް ނުކުރުމަށާއި ބޭނުން ނުކުރުމަށް" އެދިފަ އެވެ.
އެފްއޭއޭގެ އެބަޔާނާ ގުޅިގެން ސެމްސަންގުން ވަނީ އެކަމާ ބެހޭ ގޮތުން އެފްއޭއޭއާ މަޝްވަރާ ކުރަމުންދާ ކަމަށް ބުނެފަ އެވެ.
މީގެ އިތުރުން ސެމްސަންގުން ވަނީ ނޯޓް 7 ސަޕްލައިކުރުން ވަގުތީ ގޮތުން ހުއްޓާލައި މައްސަލަ ހުރި ފޯނުތައް ބަދަލުކޮށްދޭން ފަށާފަ އެވެ.