'ޢީދު ފޯރި – 1437' ގެ ނަމުގައި މިފަހަރު ހުޅުމާލޭގައި ކުލަގަދަގޮތެއްގައި މިއަހަރުގެ ބޮޑު އީދު ފާހަކުރާނެ ކަމަށް ސަދަގާތު ފައުންޑޭޝަނުން ބުނެފިއެވެ.
ސަދަގާތު ފައުންޑޭޝަންގެ ފަރާތުން މައުލޫމާތު ދެއްވަމުން، ހަސަން ޣައްސާން ވިދާޅުވީ ސަދަގާތު ފައުންޑޭޝަނަކީ އަބަދުވެސް ރައްޔިތުންނާ ގާތުން ކަންކަމުގައި ޝާމިލްވަމުން ދާ ފަރާތެއް ކަމަށާއި، އެގޮތުން އެކިއެކި ސަބަބުތަކުގައި މާލެ އާއި ހުޅުމާލޭގައި މިފަހަރު އީދަށް ނުދެވި "ތާށިވެފަ ތިބި" ފަރާތްތަކަށް އަމާޒުކޮށްގެން ފޯރިއާއެކު އީދުގެ ހާއްސަ ހަރަކާތްތަކެއް ކުރިއަށް ގެންދިއުމަށް ނިންމާފައިވާ ކަމަށެވެ.
"ވަރަށް ގިނަ ސަބަބުތަކަށްޓަކައި މިއީ ޚާއްސަ ޢީދަކަށް ވެގެން ދާނެ. ފާހަގަކޮށްލާ ހިތްވޭ، ޢިދުގެ ހަރަކާތްތައް ރާވާލެވިފަ މިވަނީ ހުރިހާ އުމުރުފުރައަކަށް އަމާޒްކޮށްގެން. ކުޑަ ކުދިންގެ ކުޅިވަރުތަކާއި، ޚާއްސަ މިއުޒިކް ޝޯވައެއްވެސް އޮންނާނެ،" ސަދަގާތު ފައުންޑޭޝަނުން ބުންޏެވެ.
ސަދަގާތު ފައުންޑޭޝަނުން ބުނީ އެ ހަރަކާތްތައް ހިންގުމަށް ހަމަޖެހިފައި ވަނީ ހުޅުމާލޭ ސެންޓްރަލް ޕާކުގައި ކަމަށާއި، އެ ހަރަކާތްތައް ހަވީރާއި ރޭގަނޑު ކުރިއަށް ގެންދިއުމަށް ހަމަޖެހިފައިވާ ކަމަށެވެ.
މި މަހުގެ 12 ވަނަ ދުވަހު ފެށުމަށް ހަމަޖެހިފައިވާ އެ ހަރަކާތްތަކުގައި އެންމެ ފުރަތަމަ އޮންނާނީ ތަފާތު ކުޅިވަރުތަކާއެކު ކުރިއަށް ގެންދެވޭ ކުޑަކުދިންގެ ހަވީރެއް ކަމަށް ސަދަގާތު ފައުންޑޭޝަނުން ބުންޏެވެ.
ބާރަ ވަނަ ދުވަހުގެ ރޭ ރާއްޖޭގެ ފުންނާބު އުސް އެތައް ފަންނާނުންނަކާއެކު ބާއްވާ ޚާއްސަ މިއުޒިކް ޝޯވްއެއް އޮންނާނެކަންވެސް އެ ފައުންޑޭޝަނުން ވަނީ ކަށަވަރުކޮށްދީފައެވެ. އީދު ދުވަހުގެ ރޭ 09.00 ގައި ފެށުމަށް ހަމަޖެހިފައިވާ އެ ޝޯ ކުރިއަށް ގެންދިއުމަށް ހަމަޖެހިފައި ވަނީ ބާބަކިއު އަކާއެކު ކަމަށްވެސް އެފަރާތުން ވަނީ ހާމަކޮށްފައެވެ.
"ކުޑަ ކުދިންގެ ހަވީރު ކުރިއަށް ގެންދިއުމަށް ހަމަޖެހިފައިވަނީ ކެންޓީންތަކަކާއެކު، އެ ތަނަށް ޒިޔާރަތް ކުރާ ފަރާތްތަކަށް ލުއިކާނާ އަދި ބުއިންތައްވެސް ލިބޭނެ ގޮތަށް. އަދި އީދު ދުވަހުގެ ރޭ އޮންނަ ޝޯ ހިނގަމުންދާއިރު ބާބަކިއު އެއްވެސް އެ ސަރަހައްދުގައި ކުރިއަށް ދާނެ،" ސަދަގާތު ފައުންޑޭޝަނުން ބުންޏެވެ.
އެހެންކަމުން އީދު ފާހަގަކުރުމަށް ހިންގުމަށް ހަމަޖެހިފައިވާ އެ ހަރަކާތްތަކުގައި ވީހާވެސް ގިނަ ފަރާތްތަކުން ބައިވެރުވުމަށް އެދޭކަމަށާއި، މި ފަހަރުގެ އީދު މާލެ ސަރަހައްދަށް "ފެންނުވާނެ" ކަމުގެ ޔަގީންކަން އަރުވާކަމަށްވެސް ސަދަގާތު ފައުންޑޭޝަނުން ބުންޏެވެ.