ހިއްސާދާރުންގެ މެދުގައި މައްސަލަ ޖެހިގެން ހުއްޓާލާފައިވާ ހަވީރު ނޫހުގެ މުވައްޒަފުން ދެ އަހަރުވަންދެން އެހެން މީޑިއާއެއްގައި މަސައްކަތް ނުކުރެވޭނެ ކަމަށާއި ކުރާ ނަމަ ފިޔަވަޅު އެޅުމަށް ހޯމް މިނިސްޓްރީގެ މައްޗަށް އަންގައި ކުރި ހުކުމް އިސްތިއުނާފު ކުރީ ހަވީރުގެ މުވައްޒަފުންކަން އަންގައިދޭ ވަޒީފާގެ އެއްބަސްވުން ހުށަހަޅަން ހައި ކޯޓުން އަންގައިފި އެވެ.
ހަވީރުގެ ކުރީގެ މުވައްޒަފުންނަށް އެހެން މީޑިއާއެއްގައި ދެ އަހަރު ވަންދެން މަސައްކަތް ނުކުރެވޭނެ ކަމަށް ސިވިލް ކޯޓުން ހުކުމްކޮށްފައި ވަނީ، މީޑިއާއަކީ މުވައްޒަފުންނާ ގުޅުން ހުރި ތަނަކަށްވެފައި، ހަވީރަށް ގެއްލުން ދިނުމުގެ ގޮތުން އެއްފަހަރާ މުވައްޒަފުން ކެނޑިގެން ދިއުމުން ތަނަށް ގެއްލުންތަކެއް ކުރިމަތިވާނެތީ ކަމަށް ބުނެ އެވެ.
އެ މައްސަލަ އޭރު އުޅުނު ބައެއް މުވައްޒަފުންގެ ފަރާތުން ވަނީ ހައިކޯޓުގައި އިސްތިއުނާފުކޮށްފަ އެވެ.
އެމައްސަލައިގެ މިއަދު ބޭއްވި ޝަރީއަތުގެ މަޖިލީހުގައި ފަނޑިޔާރުންގެ ބެންޗުން ވަނީ މައްސަލަ ހުށަހެޅި ފަރާތްތަކަކީ ހަވީރުގައި މަސައްކަތްކުރި މުވައްޒަފުންކަން އަންގައިދޭ ވަޒީފާގެ އެއްބަސްވުން ކޯޓަށް ހުށަހެޅުމަށް ދައުވާ ކުރި ފަރާތްތަކަށް އަންގައިފަ އެވެ.
އެހެން އެންގީ ދައުވާ ކުރި ފަރާތްތަކަކީ ދައުވާ ކުރުމަށް ގާނޫނީ ހައިސިއްޔަތު ލިބިގެންވާ ބައެއް ނޫނަކަމަށް މައްސަލަ ރައްދުވާ ތިނަ ހިއްސާދާރުންގެ ފަރާތުން ވަކީލު އަބްދުﷲ ނަސީރު ވިދާޅުވުމުންނެވެ. އެއީ އެމީހުންނަކީ ހަވީރުގައި މަސައްކަތް ކުރި މުވައްޒަފުންކަން އަންގައިދޭ އެއްވެސް ލިޔެކިޔުމެއް އަދި ވަޒީފާގެ އެއްބަސްވުމެއް ވެސް ކޯޓަށް ހުށަހަޅާފައިނުވާތީ އެ ހައިސިއްޔަތު ނެތީ ކަމަށް ނަސީރު ވިދާޅުވި އެވެ.
ނަސީރުގެ އެވާހަކައާ ގުޅިގެން ފަނޑިޔާރު އަބްދުﷲ ހަމީދު ވަނީ އެމީހުންނަކީ ހަވީރުގެ މުވައްޒަފުންކަން ނޭނގޭތޯ އާއި އެއީ ޕަބްލިކް ނޮލެޖްނޫންތޯ ސުވާލު އުފައްދައިފަ އެވެ. އަދި "ހަމްދޫން އަކީ ހަވީރުގެ މީހެއްކަމާއި ނަސީރު އަކީ ހަވީރުގެ މީހެއްކަން ނޭނގޭތޯ" ފަނޑިޔާރު ހަމީދު އެއްސެވި އެވެ.
ފަނޑިޔާރުގެ ވާހަކައަށް ރައްދު ދެއްވައި ނަސީރު ވިދާޅުވީ ހަވީރުގައި އެބޭފުޅުން ލިޔުއްވި ނަމަވެސް އެބޭފުޅުންނަކީ ހަވީރުގެ މުވައްޒަފުންތޯ ނުވަތަ ހަވީރު މީޑިއާ ގުރޫޕުގެ މުވައްޒަފުންތޯ ނުވަތަ ރަޝީދު މޫސާގެ މުވައްޒަފުންތޯ ސާފުނުވާ ކަމަށެވެ. އެފަދަ އެއްވެސް ލިޔުމެއް ވެސް ނެތްކަމަށް ނަސީރު ވިދާޅުވި އެވެ.
ސިވިލް ކޯޓުގައި އެ މައްސަލަ ކުރިއަށް ދިޔައިރު ހަވީރުގެ މުވައްޒަފުންގެ މައުލޫމާތާއި، ވިޔާފާރީގެ މައުލޫމާތު ހޯދުމަށް އެތައް ފަހަރެއްގެ މަތިން ޝަރީއަތުގެ މަޖިލީހުން ހަވީރު މީޑިއާ ގްރޫޕަށް އެނގި ނަމަވެސް ކޯޓުގެ އެންގުމަށް ހަވީރު މީޑިއާ ގްރޫޕުން ގޮންޖައްވާފައިވާ ކަމަށް ނަސީރު ވަނީ ވިދާޅުވެފަ އެވެ.
"ކޯޓުގެ އެންގުމަށް ގޮންޖައްސަވައި ޝަރީއަތަށް ފުރަގަސްދީ ހަވީރު މީޑިއާ ގުރޫޕް ޕްރައިވެޓް ލިމިޓެޑުން ކޯޓަށް ސިޓީ ފޮނުވީ މައްސަލައިން ބޭރުވުމަށް،" ނަސީރު ވިދާޅުވި އެވެ.
ފަނޑިޔާރު އަލީ ސަމީރު ވަނީ ދަށުކޯޓުގެ އެންގުމަށް އެ މައުލޫމާތު ކޯޓާ ހިއްސާ ނުކުރީ ކީއްވެތޯ މުވައްޒަފުންގެ ފަރާތުން ހާޒިރުވި ވަކީލާ ސުވާލުކުރައްވައިފަ އެވެ. ވަކީލު ވިދާޅުވީ ދަށު ކޯޓުގައި ކުރިއަށް ދިޔައީ މުވައްޒަފުންނާ ގުޅުން ހުރި މައްސަލައެއް ނޫން ކަމަށާއި އެއީ ވިޔަފާރިއާ ގުޅުން ހުރި މައްސަލައެއް ކަމަށެވެ.
މިއަދުގެ ޝަރީއަތުގެ މަޖިލީހުގައި މައްސަލަ ހުށަހަޅުއްވަމުން މުވައްޒަފުންގެ ފަރާތުން ވަކީލު ވިދާޅުވީ ސިވިލް ކޯޓުގައި އެ މައްސަލަ ނިންމާފައި ވަނީ ޝަރީއަތުގެ އުސޫލުތަކާ ހިލާފަށް ކަމަށެވެ. އަދި ހަވީރުގައި މަސައްކަތް ކުރި މުވައްޒަފުންނަށް ޖަވާބު ދާރީވުމުގެ ފުރުސަތު ނުދީ އެމީހުންނަށް ލިބިގެންވާ މަސައްކަތް ކުރުމުގެ ހައްގު ގެއްލޭ ގޮތަށް ސިވިލް ކޯޓުން ކުރި ހުކުމަކީ ބާތިލު ހުކުމެއް ކަމަށް ކަނޑައަޅުއްވައިދެއްވުމަށް މުވައްޒަފުންގެ ފަރާތުން ވަނީ އެދިފަ އެވެ.
ތިން ހިއްސާދާރުންގެ ފަރާތުން ވަކީލު ނަސީރު ވިދާޅުވީ ސިވިލް ކޯޓުން ކުރި ހުކުމަކީ ރަނގަޅު ހުކުމެއް ކަމަށެވެ. މަސައްކަތް ކުރުމުގެ ހައްގު ގާނޫނު އަސާސީ އިން ކަށަވަރުކޮށްދޭ ފަދައިން މުދާ ހޯދުމާއި މުދަލުން މުއާމަލާތް ކުރުމާއި މުދާ ނިގުޅައިގަނެވިގެން ނުވުމުގެ ހައްގުވެސް ގާނޫނު އަސާސީގެ 40 ވަނަ މާއްދާއިން ކަށަވަރުކޮށްދޭ ކަމަށް ނަސީރު ވިދާޅުވި އެވެ.
ހަވީރަކީ ތިން ހިއްސާދާރުންގެ 75 ޕަސެންޓް ހިއްސާ އޮންނަ ތަނެއްކަމަށް ކޯޓުން ކަނޑައެޅުއްވުމުން ހަވީރު މީޑިއާ ގުރޫޕާއި އޭރު މަސައްކަތް ކުރި މުވައްޒަފުން އެކީ އެއްފަހަރާ އެއްބަސްކިޔައި ހަވީރުގެ ވިޔަފާރިތައް އުކައިލުމަށް ފަހު ހަވީރުގެ ރައުސުލްމާލު ބޭނުންކޮށްގެން ހަވީރުގެ ނަމާ އެއްގޮތް އެހެންނަމެއް ހަދައި ހަވީރުގެ އެ ވިޔަފާރިތައް އަލުން ފަށާފައިވާ ބައެއް ކަމަށް ނަސީރު ވިދާޅުވި އެވެ. އެއީ ގަސްތުގައި ހަވީރު ހުލިކޮށްލައި ބަގުރޫޓުކޮށްލުމަށް ހިންގި އަމަލެއް ކަމަށް ނަސީރު ވަނީ ވިދާޅުވެފަ އެވެ.
ހަވީރުގައި މަސައްކަތްކުރި މުވައްޒަފުންގެ ފަރާތުން ހުށަހެޅި އެ މައްސަލަ ބައްލަވާ ފަނޑިޔާރުންގެ ބެންޗުގައި ތިއްބަވަނީ ފަނޑިޔާރު އަބްދުﷲ ދީދީ އާއި ފަނޑިޔާރު އަލީ ސަމީރު އާއި ފަނޑިޔާރު އަބްދުﷲ ހަމީދު އެވެ.
އެ މައްސަލަ ހައިކޯޓުގައި އިސްތިއުނާފުކުރީ 'މިހާރު' ނޫހުގެ އެޑިޓަރު ބ. އޭދަފުށި، މާތިހާ، އިސްމާއިލް ނަސީރު އާއި މިހާރު ނޫހުގެ ސީއީއޯ ހުޅުމާލެ ފްލެޓް ނޭމް 05-9ރ، ރިފްއަތު މުހައްމަދު އާއި މިހާރު ނޫހުގެ އެސިސްޓެންޓް އެޑިޓަރު ސ. ހިތަދޫ، އަބްހަރީގެ އަހުމަދު ހަމްދޫން، މިހާރު ނޫހުގެ އެސިސްޓެމްޓް އެޑިޓަރު ހއ. އުލިގަމް، މާޒް ނިއުމަތުﷲ އިދްރީސްގެ އިތުރުން މިހާރު ނޫހުގެ ޖެނެރަލް މެނޭޖަރު ބ. ކެންދޫ، ޖަވާހިރުވާދީ އަބްދުއްރަޝީދު ހުސައިންނެވެ. އޭގެ އިތުރުން ހަވީރު ނޫހުގެ އެޑިޓަރު މ. ހުސްނޫ މޫސާ ލަތީފު ވެސް ވަނީ މައްސަލަ އިސްތިއުނާފުކޮށްފަ އެވެ.
މައްސަލަ ރައްދުވަނީ ހަވީރުގެ ތިން ހިއްސާދާރުން ކަމަށްވާ އަބްދުﷲ ފާރޫގު ހަސަނާއި އިބްރާހީމް ރަޝީދު މޫސާ އާއި މުހައްމަދު ނައީމް އަށެވެ.