ކުޅިވަރުގެ ހުރިހާ ކްލަބު ޖަމިއްޔާތަކާއި އެސޯސިއޭޝަންތަކަށް އެއް އަސާސީ ގަވާއިދެއް އެކުލަވާލުމަށް މަސައްކަތް ކުރައްވަމުން އަންނަ ކަމަށް ސްޕޯޓްސް ކޮމިޝަނަރު އަހްމަދު ނަޝީދު (ޑޭވް) ވިދާޅުވެއްޖެއެވެ.
"ސަން" އަށް ދެއްވި އިންޓަވިއުއެއްގައި ޑޭވް ވިދާޅުވީ، އެ އަސާސީ ގަވާއިދުގައި ހިމެނުމަށް އެންމެ ބޮޑަށް ބޭނުންވާ އެއް މާއްދާ އަކީ އިތުރުގޮތެއް ނެތިގެން ނޫނީ ކުޅިވަރުގެ އެއްވެސް ކަމެއްގައި ޝަރުއީ ކޯޓުތަކަށް މައްސަލަ ހުށަނޭޅޭ މާއްދާ ކަމަށެވެ.
"އަސާސީ ގަވާއިދަށް މިކަހަލަ މާއްދާއެއް ލުމަށް ގާނޫނީގޮތުން ބަލަންޖެހޭ ކަންތައްތައް ބެލުމަށްފަހު ކަމާބެހޭ ފަރާތްތަކާ މަޝްވަރާ ކުރާނަން. އެ ހުރިހާ ބޭފުޅުންގެ ލަފަޔާ މަޝްވަރައާ އެއްގޮތަށް ހުރިހާ ކަމަކަށް ބަލައިގެން އަޅުގަނޑުމެން އަސާސީ ގަވާއިދު ތައްޔާރުކުރާނީ،" ޑޭވް ވިދާޅުވިއެވެ.
ކުޅިވަރުގެ ހުރިހާ ކްލަބު ޖަމިއްޔާތަކާއި އެސޯސިއޭޝަންތަކަށް އެއް އަސާސީ ގަވާއިދެއް އެކުލަވާލުމަށް ކުޅިވަރާ ބެހޭ ގާނޫނު ކިޔަވައިގެން ތިބި ފަރާތްތަކާއި ރާއްޖޭގެ ގާނޫނީ މާހިރުންނާ މަޝްވަރާކުރަމުންދާ ކަމަށް ސްޕޯޓްސް ކޮމިޝަނަރު ވިދާޅުވިއެވެ.
"އެ ހުރިހާ ބޭފުޅުންގެ ލަފަޔާ އެއްގޮތަށް ހުރިހާ ކަމަކަށް ބަލައިގެން އަޅުގަނޑުމެން އަސާސީ ގަވާއިދު ތައްޔާރުކުރާނީ. އަޅުގަނޑުމެންނަށް ހެދެން ހުރި ހުރިހާ ގަވާއިދުތަކެއް މާގިނަ ދުވަސްތަކެއް ނުވެ ހަދައި ނިންމާނަން،" ޑޭވް ވިދާޅުވި އެވެ.
އޭނާ ވިދާޅުވީ، ކުޅިވަރުގެ މައްސަލަތައް ކޯޓަށް ވައްދައިގެން ދިގުލައިގެން ދިއުމުން އެ ކުޅިވަރު ކުޅޭ ކުޅުންތެރިން ވެސް ތިބެނީ ވަރަށް ބޮޑަށް މާޔޫސްވެފައި ކަމަށާއި އެ ކުޅުންތެރިން ތިބެނީ މައްސަލަ ނިމޭނީ ކިހިނެތްތޯ ނޭނގިފައި ކަމަށެވެ.
މި އަހަރު ކުޅިވަރުގައި ޖެހުނު އެންމެ ބޮޑު މައްސަލައެއްގެ ގޮތުގައި ފާހަގަވެގެންދިޔައީ މިދިޔަ މާޗް މަހުގެ ތެރޭގައި ބޭއްވި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ އިންތިހާބުގެ މައްސަލައެވެ. އެ އިންތިހާބު ބާޠިލްކުރުމަށް އިންތިހާބުގައި ނާކާމިޔާބީއާ ކުރިމަތިލާން ޖެހިވަޑައިގަތް ދިވެހި ރައްޔިތުންގެ ޕާޓީ (ޑީއާރްޕީ)ގެ ލީޑަރު މުހައްމަދު ނަޝީދު (ކާނަލް) ސިވިލް ކޯޓަށް މައްސަލައެއް ހުށަހެޅުއްވިއެވެ.
ވީއޭއެމްގެ އިންތިހާބުގެ މައްސަލަ ކޯޓުގައި ހިނގަމުން ދަނިކޮށް، އިންތިހާބުގައި މަކަރާއި ހީލަތް ހަދާފައިވާ ކަމަށް ބުނެ، ވީއޭއެމްގެ އިންތިހާބު ބާތިލްކޮށް، 30 ދުވަހުގެ ތެރޭގައި އަލުން އިންތިހާބެއް ބޭއްވުމަށް ސްޕޯޓްސް ކޮމިޝަނަރު ޑޭވް އެންގެވިއެވެ. އޭގެ ފަހުން އެންޓި ކޮރަޕްޝަން ކޮމިޝަން (އޭސީސީ) އިން މައްސަލަ ބަލައި އިދާރީގޮތުން ފިޔަވަޅު އެޅުމަށް ކަމާބެހޭ ފަރާތްތަކަށް އަންގާފައި ވަނިކޮށް، ހޯމް މިނިސްޓްރީން ވެސް އެ އިންތިހާބު ބާތިލްކޮށް، 30 ދުވަހުގެ ތެރޭގައި އިންތިހާބު އަލުން ބޭއްވުމަށް ވީއޭއެމް އަށް އަންގާފައިވެއެވެ.