ބްރެޒިލްގެ ރިއޯ ޑީ ޖެނޭރޯގައި މިހާރު ކުރިއަށްދާ އޮލިމްޕިކް އަންހެނުންގެ ފުޓްބޯޅަ އިވެންޓުގެ ފައިނަލްގައި ސްވިޑެން އަތުން 2-1 ލަނޑުން މޮޅުވެ ޖަރުމަނުގެ އަންހެން ޓީމު ފުރަތަމަ ފަހަަރަށް ރަންމެޑަލް ހޯދައިފިއެވެ.
ރިއޯގެ މަރަކާނާ ސްޓޭޑިއަމްގައި ކުޅުނު ފައިނަލްމެޗުގެ ދެވަނަ ހާފް ފެށިގެން ތިން ވަނަ މިނިޓްގައި ޖަރުމަނުގެ ފޯވާޑް ޖެނިފާ މަރޯޒަން، ވަރަށް ރީތިކޮށް ފޮނުވާލި ބޯޅައެއް ސްވިޑެން ގޯލްތެރެއަށް ވައްދާލައިގެން ވަނީ އެޓީމަށް މެޗުގެ ކުރިހޯދައިދީފައެވެ.
މެޗުގެ 62 ވަނަ މިނިޓްގައި ޖަރުމަނަށް ލިބުނު ހިލޭ ޖެހުމަކުން މަރޯޒަން ފޮނުވާލި ބޯޅައެއް ސްވިޑެން ޓީމުގެ ލިންޑާ ސެމްބްރަންޓް އަތުން ބައިކޮޅަށް ލަނޑެއް ވަދެ ޖަރުމަނަށް ދެ ލަނޑުގެ ލީޑެއް ލިބިގެން ދިޔައެވެ.
މެޗުގައި ސްވިޑެން ޓީމުން ކާމިޔާބުކުރި ހަމައެކަނި ލަނޑު 67 ވަނަ މިނިޓްގައި ޖަހައިދިނީ، ކޮސޮވާރީ އަސްލާނީ ޖަރުމަނުގެ ގޯލްކުރިމަށްޗަށް ހުރަސްކޮށްލި ބޯޅައެއް ގޯލް ތެރެއަށް ފޮނުވާލައިގެން ސްޓީނާ ބްލެކްސްޓޭނިއަސްއެވެ.
ސައޮޕޯލޯގައި ކުޅުނު ތިންވަނަ ހޮވާމެޗުން 2-1 ލަނޑުގެ ނަތީޖާއަކުން ބްރެޒިލް ބަލިކޮށް އަންހެނުންގެ ފުޓްބޯޅަ އިވެންޓްގެ ބްރޯންޒް މެޑަލް ހޯދީ ކެނެޑާއެވެ.
އޮލިމްޕިކްސްގައި އަންހެނުންގެ ފުޓްބޯޅަ ހަފަހަރެއްގެ މަތިން ބާއްވާފައިވާއިރު، މިއީ ޖަރުމަނުގެ ހަތަރުވަނަ މެޑައްޔެވެ. މީގެ ކުރީން ޖަރުމަނު އަންހެން ޓީމުން ވަނީ، 2000، 2004 އަދި 2008 ވަނަ އަހަރު ބްރޯންޒް މެޑަލް ހޯދައިފައެވެ.
ސްވިޑެން މިފަހަރުގެ ފައިނަލުން ޖާގަ ހޯދީ ކުއާޓާގައި އެމެރިކާއަތުން ޕެނައިލްޓީ ޝޫޓްއައުޓްގައި މޮޅުވެ ސެމީގައި ބްރެޒިލް ބަލިކުރުމަށްފަހުއެވެ.
އޮލިމްޕިކްސް ފިރިހެނުންގެ ފުޓްބޯޅަ އިވެންޓުގެ ފައިނަލްގައި ބައްދަލުރާނީ، ޖަރުމަނާއި ބްރެޒިލް އެވެ. އެ މެޗު ކުޅޭނީ މާދަމާރޭ ރާއްޖޭ ގަޑިން މެންދަމު 1:30ގައެވެ.