މިދިޔަ ސީޒަނުގެ އިނގިރޭސި ޕްރިމިއާ ލީގު ލެސްޓާ ސިޓީއަށް ހޯދައިދިން ކޯޗު ކްލައުޑިއޯ ރަނިއޭރީ އެ ކްލަބާ އެކު ހަދާފައިވާ އެއްބަސްވުން އާކޮށްފި އެވެ.
ކުރިން ޗެލްސީ، ވެލެންސިއާ އަދި ޔުވެންޓަސް އަށް އިރުޝާދުދިން އުމުރުން 64 އަހަރުގެ ރަނިއޭރީ އެ ކްލަބާއެކު ހަތަރު އަހަރު ދުވަހުގެ އެއްބަސްވުމުގައި ސޮއިކުރުމާއެކު 2020 ވަނަ އަހަރުގެ ޖޫން މަހުގެ ނިޔަލަށް އެ ކްލަބާ އެކު ދެމިހުންނާނެ ކަމަށް ލެސްޓާއިން ބުނެ އެވެ.
އެންމެ ފަހުގެ ޗެމްޕިއަން ލެސްޓާ އިން ޕްރިމިއާ ލީގުގެ ފުރަތަމަ މެޗުގައި އަންނަ ހޮނިހިރު ދުވަހު ނުކުންނަން ޖެހޭނީ މި ސީޒަނުގައި އަލަށް ޕްރޮމޯޓުވި ހަލް ސިޓީއާ ދެކޮޅަށް ލެސްޓާގެ ކިންގް ޕަވާ ސްޓޭޑިއަމްގައެވެ. އަދި ތާރީހުގައި ފުރަތަމަ ފަހަރަށް ޗެމްޕިއަންސް ލީގުގައި ލެސްޓާ އިން އަންނަ މަހު މެޗެއް ކުޅޭނެ އެވެ.
"އަހަރެން ކްލަބުގެ ވެރިންނާ ވާހަކަދައްކާ އެމީހުން ބޭނުންވާ ކަންތައްތައް އެނގުމުން މި ކްލަބާއެކު ދިގު މުއްދަތަކަށް ހުންނަން ބޭނުންވި. ކްލަބުގެ ވެރިންނާއި މުވައްޒަފުންނާ ހަމައިން ކުޅުންތެރިންނާއި ސަޕޯޓަރުންނާ ހަމައަށް ހުންނަ ފޯރި އަކީ ވަރަށް ހާއްސަ ކަމެއް. ކުރިއަށް އޮތްތާ ވެސް ލެސްޓާގެ ކޯޗެއްގެ ގޮތުގައި މަސައްކަތް ކުރެވޭތީ އުފާކުރަން،" އެއްބަސްވުން އާކުރުމަށްފަހު ލެސްޓާގެ ރަސްމީ ވެބްސައިޓަށް ދިން އިންޓަވިއުއެއްގައި ރަނިއޭރީ ބުންޏެވެ.
ރަނިއޭރީ ބުނީ، މިދިޔަ ސީޒަނުގައި ބުރަ މަސައްކަތާއެކު ޖާދުލެއް ފަދަ ކަމެއް ހާސިލްވި ކަމަށާއި އެ ބުރަ މަސައްކަތާއެކު މި ސީޒަނުގައި ވެސް ކާމިޔާބު ހޯދިދާނެ ކަމަށެވެ. އަދި އެކަން ހާސިލްކުރުމަށް އެންމެން އެކީ މިފަހަރު ވެސް މަސައްކަތްކުރާނެ ކަމަށް އޭނާ ބުންޏެވެ.
ލެސްޓާ އަށް ވަނީ އެފްއޭ ކަޕްގެ ޗެމްޕިއަން މެންޗެސްޓާ ޔުނައިޓެޑް އަތުން 2-1 ލަނޑުން ބަލިވެ އެފްއޭ ޗެރިޓީ ޝީލްޑް ގެއްލިފައެވެ. އެ މެޗުގައި ލެސްޓާ ބަލިވެފައިވަނީ މެޗު ނިމެން ހަތް މިނެޓަށް ވެފައިވަނިކޮށް، ޔުނައިޓެޑުގެ ސްވިޑަން ތަރި ޒްލަޓަން އިބްރަހިމޮވިޗް ޖެހި ލަނޑުންނެވެ. އެ މެޗުގައި ވެސް ލެސްޓާގެ ފަރާތުން ރަނގަޅު ކުޅުމެއް ފެނިގެންދިޔައެވެ.