އަބުރާބެހުމުގެ ސަބަބުން ކޯޓުންކުރާ ހުކުމްތަކާއެކު ދައްކަން ޖެހޭ ބަދަލުގެ ފައިސާ ލިބޭނެ ހަރުދަނާ އުސޫލެއް އޮންނަންޖެހޭކަމަށް ކުރީގެ ޕްރޮސެކިއުޓާ ޖެނަރަލް (ޕީޖީ) އަހުމަދު މުއިއްޒު ވިދާޅުވެއްޖެ އެވެ.
މިހާރު އަމަލުކުރަމުންދާ އަބުރާބެހުމުގެ ސަބަބުން ބަދަލު ނަގައިދޭ ގަވައިދު ބުނާގޮތުން މީހެއްގެ އަބުރާބެހުނުކަން ސާބިތުވެއްޖެނަމަ އެންމެ ބޮޑު އަދަދެއްގެ ގޮތުގައި ޖޫރިމަނާ ކުރަނީ 5000 ރުފިޔާއަށެވެ.
މުއިއްޒު "ސަން"އަށް ވިދާޅުވީ އަބުރު ރައްކާތެރިކުރުމަށް މިހާރު މަޖިލީހަށް ހުށައަޅާފައިވާ ބިލް އެގޮތަށް ފާސްވުމަށް ތާއީދު ނުކުރައްވާ ކަމަށާއި އަބުރާބެހުނުކަން ސާބިތުވެއްޖެނަމަ ބަދަލުގައި ލިބެންޖެހޭ ފައިސާ ލިބޭނެ ގޮތްތަކެއް އޮންނަންޖެހޭ ކަމަށެވެ.
ކުރީގެ ޕީޖީ މުއީޒް ސަން އައް އިނޓަވިއު އެއް ދެއްވަނީ--- ސަން ފޮޓޯ/ މުހައްމަދު އަފްރާހް
"އަބުރާބެހުމުގެ ގެއްލުމުގެ ބަދަލަކީ ހަމައެކަނި ކަރުދާހުގައި އޮވެގެން އަނބުރާ ބެހުނު ފަރާތައް ނުލިބޭ ބަދަލެއްގެ ގޮތުގައިވެސް އޮވެގެން ނުވާނެ، އެރަށްކާވެސް ކުރަންޖެހޭނެ،" މުއިއްޒު ވިދާޅުވިއެވެ.
ދުނިޔޭގެ އެހެން ގަމުއުމުތަކަށް ބަލާއިރު މިލްކިއްޔާތު ވިއްކައިގެންނަމަވެސް ބަދަލުދޭންޖެހޭ ކަމަށާއި ރާއްޖޭގައިވެސް އެފަދަ އެކަށިގެންވާ ނިޒާމެއް ނޯންނަ ކަމަށް މުއިއްޒު ވިދާޅުވިއެވެ.
އެ ބިލުގައި ގާނޫނީ އެތައް މައްސަލައެއް އުޅޭ ކަމަށާއި އެބިލުގައި ބުނާގޮތުން ޖިނާއީ ކުށެއްގެ ގޮތުގައި އަބުރާބެހުން ބަލާއިރު ޖޫރިމަނާގެ ގޮތުގައި ދައްކަންޖެހޭ އަދަދު 50000 ރުފިޔާއިން ފަށާގޮތަށް އިންނަ އިރު އެއަދަދު މާބޮޑު ކަމަށްވެސް މުއިއްޒު ވިދާޅުވިއެވެ.
މަހުފޫމްތައް އޮޅުން އަރާފައިވާއިރު ކުރީގެ ގާނޫނުތަކުގައި ބުނެފައިވާ ވާހަކަތައް ވެސް ރިޕީޓްވެފައިވާ ކަަމަށާއި އެހެންކަމުން މިއީ ދިރާސާކޮށްގެން ހަދާފައިވާ ގާނޫނެއް ކަމަށް ނުބެލެވޭ ކަމަށް މުއިއްޒު ވިދާޅުވިއެވެ.
މިހާރު ހުށައަޅާފައިވާ އަބުރާބެހުމާއި ގުޅޭ ގާނޫނުން ކުރާ ޖޫރިމަނާ ނުދައްކައިފިނަމަ ތިން މަހާއި ހަމަހާއި ދޭތެރޭ މުއްދަތަކަށް ޖަލަށްލެވެއެވެ.