އޮސްޓްރޭލިއާގައި ކުރިއަށްދާ ޖެފް ވިލްކޮސް މެމޯރިއަލް ބޮޑީބޯޑިން މުބާރާތުގެ ދެ ކެޓަގަރީއަކުން ދެވަނަ ބުރަށް ރާއްޖޭގެ އެއްވަނަ ބޮޑީބޯޑަރު އަލީ ހުޝްރުވާން (ކުޑައައްޔަ) ދަތުރުކޮށްފި އެވެ.
ކުޑައައްޔަ ވަނީ މުބާރާތުގެ ފިރިހެން އޯޕަން ބައި އަދި ޑްރޮޕް ނީ ކެޓަގަރީގެ ފުރަތަމަ ބުރުގައި ވާދަކޮށް، ދެވަނަ ބުރުން ޖާގަ ހޯދައިފަ އެވެ.
އެ މުބާރާތުގައި ދެން ރާއްޖެ އިން ވާދަކޮށްފައިވަނީ އަލީ ޖާވިދު (ޖާއްޓޭ) އާއި މުހައްމަދު އިހުސާން (ޗިއްކޮ) އެވެ. ފިރިހެނުންގެ އޯޕަން ބައިގައި އެ ދެ ބޮޑީބޯޑަރުން ވާދަކުރި ނަމަވެސް، ދެވަނަ ބުރުން ޖާގައެއް ލިބިފައެއް ނުވެ އެވެ.
މިއީ އޮސްޓްރޭލިއާގެ މުބާރާތެއްގައި ކުޑައައްޔަ ވާދަކުރާ ފަސް ވަނަ ފަހަރެވެ. އޮސްޓްރޭލިއާގެ މުބާރާތެއްގައި ޖާއްޓޭ މީގެ ކުރިން އެއް ފަހަރު ވާދަކޮށްފައިވާ އިރު، މިއީ އޮސްޓްރޭލިއާގެ މުބާރާތެއްގައި ޗިއްކޮ ވާދަކުރާ ފުރަތަމަ ފަހަރެވެ.