މިނިވަން ދުވަހުގެ މުނާސަބަތުގައި ގަލޮޅު ދަނޑުގައި ބާއްވާ ހެވިކަމާއި ކުޅިވަރުގެ ހަރަކާތްތަކުގެ ފަހު ރިހާސަލް ހުކުރު ދުވަހުގެ ރޭ ބާއްވާ އިރު، އެ ހަރަކާތްތައް ބަލާލަން ބޭނުންވާ އާންމު ރައްޔިތުންނަށް އެ ފުރުސަތު ދޭ ގޮތަށް ހޯމް މިނިސްޓްރީން ހަމަޖައްސައިފި އެވެ.
ޖުލައި 30 ވާ ހޮނިހިރު ދުވަހުގެ ރޭ ގައުމީ ފުޓުބޯޅަ ދަނޑުގައި ކުރިޔަށް ދާ، މިނިވަން ދުވަހުގެ ހެވިކަމާއި ކުޅިވަރުގެ ހަރަކާތްތައް ބެލުމަށް އެ ރޭ ދަނޑަށް ވަދެވޭނީ ހަމައެކަނި ދައުވަތު އެރުވިފައިވާ ފަރާތްތަކަށެވެ.
މިނިވަން 50 ގެ އުފަލުގައި މިދިޔަ އަހަރު ގައުމީ ފުޓްބޯޅަ ދަނޑުގައި ބޭއްވުނު ކުޅިވަރުގެ ހަރަކާތުގެ ތެރެއިން-- ސަން ފޮޓޯ/ އަލީ ނަސީރު
އެހެން ނަމަވެސް ހުކުރު ދުވަހުގެ ރޭ 9:00 ގައި ބާއްވާ ފައިނަލް ޑްރެސް ރިހާސަލް ބަލާލުމަށް އާންމުންނަށް ފުރުސަތު ދޭ ގޮތަށް ހޯމް މިނިސްޓްރީން ވަނީ ނިންމާފަ އެވެ. އެގޮތުން، އެ ހަރަކާތްތައް މާދަމާ ބަލާލުމަށް އެދޭ ފަރާތްތަކަށް، އެކަމަށް ބޭނުންވާ ފާސް ވެލާނާގެއިން ލިބެން ހުންނާނެ ކަމަށް ހޯމް މިނިސްޓްރީން ބުނެ އެވެ.
ފާސް ދޫކުރާނީ ހުކުރު ދުވަހުގެ މެންދުރު 2:00 އިން ފެށިގެން، ވެލާނާގޭގެ ތިރީގައި އެކަމަށް ޚާއްސަކޮށްގެން ބަހައްޓާފައިވާ މޭޒަކުންނެވެ. ފާސް ހޯދުމަށް ވެލާނާގެއަށް ދާ އިރު، ދިވެހި ރައްޔިތެއް ކަން އަންގައިދޭ ކާޑު ގެނައުމަށް ހޯމް މިނިސްޓްރީން އެދެ އެވެ.
ހެވިކަމާއި ކުޅިވަރުތައް އޮންނަ ރަސްމިއްޔާތު ހޮނިހިރު ދުވަހުގެ ރޭ ގަލޮޅު ދަނޑުގައި ކުރިޔަށް ދާނެ އިރު، ހޯމް މިނިސްޓްރީން ބުނީ ދައުވަތު އެރުވިގެން އެތަނަށް އަންނަ ފަރާތްތަކުން ހޮނިހިރު ދުވަހުގެ ރޭ 7:45 އާއި 8:45 އާ ދެމެދު ދަނޑަށް ވަންނަން ޖެހޭނެ ކަމަށާއި، ދަނޑުގެ ގޭޓުތައް 8:45 ގައި ބަންދު ކުރާ ފަހުން ދަނޑަށް އެއްވެސް ފަރާތަކަށް ނުވަދެވޭނެ ކަމަށެވެ.
މިނިވަން 50 ގެ އުފަލުގައި މިދިޔަ އަހަރު ގައުމީ ފުޓްބޯޅަ ދަނޑުގައި ބޭއްވުނު ކުޅިވަރުގެ ހަރަކާތުގެ ތެރެއިން-- ސަން ފޮޓޯ/ ޔޫސުފް ސޮފްވާން
މިނިވަން 50 ގެ އުފަލުގައި މިދިޔަ އަހަރު ގައުމީ ފުޓްބޯޅަ ދަނޑުގައި ބޭއްވުނު ކުޅިވަރުގެ ހަރަކާތުގެ ތެރެއިން-- ސަން ފޮޓޯ/ ޔޫސުފް ސޮފްވާން
މިނިވަން ދުވަހުގެ ހެވިކަމާއި ކުޅިވަރުތައް ހުށަހެޅުމުގައި ސްކޫލްތަކުގެ ދަރިވަރުންނާއި އެކިއެކި އޮފީސްތަކުގެ މުވައްޒަފުން ބައިވެރިވެ އެވެ.
ހެވިކަމާއި ކުޅިވަރުތައް ނިމޭނީ ޖުލައި 30 ވާ ހޮނިހިރު ދުވަހު ކަމުން، ޖެހިގެން އޮތް 31 ޖުލައި ވާ އާދީއްތަ ދުވަހަކީ ރަސްމީ ބަންދު ދުވަހެއްގެ ގޮތުގައި ސަރުކާރުން ވަނީ ހަމަޖައްސައިފަ އެވެ.
އެހެން ނަމަވެސް މޯލްޑިވްސް މަނިޓަރީ އޮތޯރިޓީއާއި ބޭންކުތަކާއި އެހެނިހެން މާލީ ޚިދުމަތްތައް ދޭ އިދާރާތައް އާދީއްތަ ދުވަހު ހުޅުވައި، އެތަންތަނުގެ ޚިދުމަތް ދޭނެ އެވެ.