މިނިވަން ދުވަހާއި ގުޅިގެން ކޮންމެ އަހަރަކު ވެސް ދަނީ ތަފާތު ފުޅަނދުތައް ދައްކާލަމުންނެވެ. މިދިޔަ އަހަރު އެންމެ ތަފާތުކޮށް ފެނުނު ފުޅަނދަނީ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން ދައްކާލި ސުނޯ ވެހޭ އުޅަނދެވެ. މިފަހަރުވެސް އެ ކުންފުނިން ވަނީ ތަފާތު ފުޅަނދެއް ދައްކާލަން ނިންމާފައެވެ.
އެމްއޭސީއެލްއިން ބުނީ މިރޭ ދައްކާލާ ފުޅަނދާއެކު އެފުޅަނދު އޮންނަ ހިސާބަކަށް ހިލޭ އިންޓަނެޓު ލިބޭނެ ކަމަށެވެ.
އެމްއޭސީއެލްއިން މިފަހަރު ވެސް ތައްޔާރުކޮށްފައި ވަނީ ކާޓޫންތައް ދައްކުވައިދޭ ފުޅަނދެކެވެ. އެފުޅަނދު ދުއްވާފައިދާއިރު އެސަރަހައްދަކުން "MACL-Float" ވައިފައިން ހިލޭ އިންޓާނެޓު ދިނުމަށް ވަނީ ނިންމާފައެވެ.
އެކުންފުނިން ބުނީ އެފުޅަނދުގެ ފޮޓޯނެގުމަށްފަހު ސޯޝަލް މީޑިއާއެއްގައި maclfloat# ޖެހުމަށްފަހު ޓެގް ކުރާ ފަރާތަކުގެ ތެރެއިން ހޮވޭ ފަރާތަކަށް ހާއްސަ އިނާމެއް ލިބިގެންދާނެ ކަމަށެވެ.
މިއަހަރުގެ މިނިވަން ދުވަހުގެ މުނާސަބަތުގައި ބޭއްވުމަށް ހަމަޖެހިފައިވާ ފުޅަނދުބުރު ފަށާނީ މިރޭ 8:00 ގައި ކަމަށް ހޯމް މިނިސްޓްރީން ބުނެފި އެވެ. އެ މިނިސްޓްރީން ބުނީ، ފުޅަނދުބުރު ފަށާނީ މާފަންނު ރަސްފަންނު ސަރަހައްދުން މަޖީދީމަގުން ކަމަށެވެ.
ހޯމް މިނިސްޓްރީން ޑެޕިއުޓީ މިނިސްޓަރު އަހްމަދު ސަލީމް (މާޒް ސަޅީމް) މިއަދު ވިދާޅުވީ، ސަރުކާރުގެ ކުންފުނިތަކުން 14 ފުޅަނދެއް މިރޭ ފެނިގެންދާނެ ކަމަށާއި މާދަމާ ހަވީރުން ފެށިގެން ތިން ދުވަސްވާންދެން ކޮންމެ ދުވަހެއްގެ ހަވީރު 4:30 ގައި ޓްރެކް ސަރަހައްދުގައި ފުޅަނދުތައް ދައްކާލުން ވެސް އޮންނާނެ ކަމަށެވެ.