ދައުލަތުގެ ފަސް މިލިއަން ޑޮލަރަށް ހިޔާނާތްތެރިވި މައްސަލާގައި ކުރީގެ ނައިބު ރައީސް އަހުމަދު އަދީބާއިި މ. ޝުރާމަންޒިލް ހާމިދު އިސްމާއީލް ޖަލަށްލާން ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފުކޮށްފި އެވެ.
އަދީބާއި ހާމިދުގެ އިތުރުން އެމްއެމްޕީއާރުސީގެ ކުރީގެ މެނޭޖިންގެ ޑިރެކްޓަރު އަބްދުﷲ ޒިޔަތުގެ މައްޗަށް ދައުލަތުން ދައުވާ އުފުލީ ޅ. މާބިންހުރާގައި ޓޫރިސްޓު ރިސޯޓެއް ތަރައްގީ ކުރުމަށް ކުރެއްދޫ ހޯލްޑިންގްސް އަށް ކުއްޔަށްދޫކުރުމަށް ފަހު އެކުއިޒިޝަން ކޮސްޓްގެ ގޮތުގައި ދައުލަތަށް ލިބުނު ފަސް މިލިއަން ޑޮލަރަށް ޚިޔާނާތްތެރިވި ކަމުގެ ތުހުމަތުގަ އެވެ.
އެމައްސަލަ ބަލައި އަދީބާއި ޒިޔަތު އަށް އަހަރަށް އަދި ހާމިދު ދެމަހާއި 18 ދުވަހަށް ޖަލަށް ލާން ކްރިމިނަލް ކޯޓުން ވަނީ ހުކުމްކޮށްފަ އެވެ.
އޭގެ ތެރެއިން އަދީބާއި ހާމިދުގެ މައްސަލަ އިސްތިއުނާފުކުރިކަން އެބޭފުޅުންގެ ވަކީލުން ވަނީ 'ސަން' އަށް ކަށަވަރުކޮށްދީފަ އެވެ. ޒިޔަތުގެ ވަކީލު ވިދާޅުވީ ޒިޔަތުގެ ފަރާތުން އެމައްސަލަ އަދި އިސްތިއުނާފު ނުކުރާ ކަމަށެވެ.
ކްރިމިނަލް ކޯޓުގެ ހުކުމްގައި ފާހަގަކޮށްފައިވާކަންކަން
- ކުރެއްދޫ ހޯލްޑިންގްސް އިން ދޫކުރި ފަސް މިލިއަން ޑޮލަރުގެ ޗެކާ ހަވާލުވެ ޒިޔަތު އެޗެކް އަދީބާ ހަވާލުކޮށްފައިވާކަން ހެކިތަކުން އެނގޭ.
- 2014 ވަނަ އަހަރުގެ ޖޫން މަހުގެ ތެރޭގައި އެ ފައިސާ ހާމިދުގެ ހިއްސާ އޮންނަ މިލޭނިއަމް ކެޕިޓަލް އަށް ޖަމާކުރެއްވުމަށް ފަހު އެކަން އަދީބު އެ ކުންފުންޏަށް އަންގާފައިވާކަން ހެކިތަކުން އެނގޭ.
- އެއަށް ފަހު އަދީބު އެދިވަޑައިގަތް ގޮތަށް ހަތަރު މިލިއަން ޑޮލަރުގެ ތިން ޗެކު ތައްޔާރު ކުރުމަށް ފަހު މީލޭނިއަމް ކުންފުނީގެ ޖެނެރަލް މެނޭޖަރުގެ ސޮޔާ އެކު މޮންޓަލިއޯން އިންޓަނޭޝަނަލް ކުންފުނީގެ ހިއްސާދާރަކާ ހަވާލުކުރިކަން ހެކިތަކުން އެނގޭ.
- ބާކީ އެއް މިލިއަން ޑޮލަރު އަދީބު ނަގާފައިނުވާކަން ހެކިތަކުން އެނގޭ.
- މިލޭނިއަމާއި މޮންޓަލިއޯންގެ އެކައުންޓަށް އެ ފައިސާ ޖަމާވިކަން އެ ދެ ކުންފުނީގެ އެކައުންޓުގެ ބޭންކު ސްޓޭޓްމަންޓުތަކުން އެނގޭ.
- ޅ. މާބިންހުރާގެ އެކުއިޒިޝަން ކޮސްޓުގެ ގޮތުގައި ލިބުނު ފަސް މިލިއަން ޑޮލަރު އެމްއެމްޕީއާރްސީގެ އެކައުންޓަށް ވަދެފައިނުވާކަން އެ ކުންފުނީގެ އެކައުންޓުގެ ބޭންކު ސްޓޭޓްމަންޓުން އެނގޭ.
ފަސް މިލިއަން ޑޮލަރުގެ ތެރެއިން ބާކީވާ އެއް މިލިއަން ޑޮލަރު އަނބުރާ އަދީބު ނަގާފައިނުވާއިރު، 2014 ވަނަ އަހަރުގެ ޖޫން މަހުގެ ތެރޭގައި އެ އެއްމިލިއަން ޑޮލަރު ފިޔަވައި އިތުރު ފައިސާއެއް މީލޭނިއަމްގެ އެކައުންޓަށް ވަދެފައިނުވާ ކަމަށް ވެސް ހުކުމްގައި ފާހަގަކޮށްފައިވެ އެވެ.
އެގޮތަށް އެކަން އޮތް އިރު، 2014 ވަނަ އަހަރުގެ މެއި މަހުގެ 17 ވަނަ ދުވަހު އެސްޓީއޯ އަށް ޑޮލަރު ވިއްކުމުގެ އެއްބަސްވުމެއްގައި މިލޭނިއަމާއި އެސްޓީއޯ އިން ސޮއިކޮށްފައިވާ ކަމަށާއި މިލޭނިއަމްގެ ފަރާތުން އޭގައި ސޮއިކޮށްފައި ވަނީ ހާމިދު ކަމަށް ހުކުމްގައިވެ އެވެ.