މޯލްޑިވްސް އީ-ސްޕޯޓިން އެސޯސިއޭޝަން (އެމްއީއެސްއޭ) އިން އިންތިޒާމްކޮށްގެން އެކްސެލް އެނަޖީ ޢީދު އީ-ގޭމްސްގެ ނަމުގައި ބާއްވާ ހާއްސަ ގޭމް ފެސްޓިވަލެއް މާދަމާ ހަވީރު އަލިމަސް ކާނިވަލުގެ ޕާކިން ސަރަހައްދުގައި އޮންނާނޭ ކަމަށް އެ އެސޯސިއޭޝަނުން ބުނެފިއެވެ.
އެމްއީއެސްއޭގެ ރައީސް އިސްމާއީލް އަޒްމީ (އިންމަ) ވިދާޅުވީ، ފިޠުރު ޢީދުގެ އުފަލުގައި، ހުރިހާ އުމުރުފުރައެއްގެ ފަރާތްތަކަށް ހާއްސަކޮށްގެ ބާއްވާ އެ ފެސްޓިވަލްގައި ގޭމު ކުޅުމާއި އެނޫންވެސް ތަފާތު ހަރަކާތްތައް ކުރިއަށް ގެންދާނޭ ކަމަށެވެ.
އަދި މިނިސްޓްރީ އޮފް އިކޮނޮމިކް ޑެވެލޮޕްމަންޓާވެސް ގުޅިގެން ކުރިއަށް ގެންދާ އެ އިވެންޓަކީ ޗެރިޓީއަށް ބާއްވާ އިވެންޓެއްކަމުން ފަންޑްރައިޒް ކުރުމުގެ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.
"އީދުގެ އުފާ ފާހަގަކުރުމުގެ އިތުރުން އަޅުގަނޑުމެން މި ޢީދު އީ-ގޭމްސް ފެސްޓިވަލް ކުރިއަށް މިގެންދަނީ ޗެރިޓީ އިވެންޓެއްގެ ގޮތުގައި. ކާނިވާ ސްޓައިލަށް ގޭމް ސްޓޯލްތަކެއް ހަދައިގެން ބާއްވާ އެ ހަރަކާތުން ލިބޭ ހުރިހާ ފައިސާއެއްވެސް ހަދިޔާ ކުރުމަށް ހަމަޖެހިފައި ވަނީ ފައިސާއެއް ހަދިޔާކުރާނީ، ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ ފަރާތްތަކާއި ކުޑަކުދީންނާއި އަދި އެނޫންވެސް އެފަދަ އެއިޑް ރިލީފަަށް،" އިންމަ ވިދާޅުވިއެވެ.
ހިލޭ ވަދެވޭގޮތަށް ހުކުރު ދުވަހު ހަވީރު 4:00- 6:00އަށް އަދި ރޭގަނޑު 8:00 - 11:00އަށް އީ-ސްޕޯޓިން އެސޯސިއޭޝަނުން މި ފެސްޓިވަލް ކުރިއަށް ގެންދާނީ، އެ ޖަމިއްޔާގެ ވޮލަންޓިއަރުންނާއި، ސީއެޗްއެސްއީގެ ދަރިވަރުންގެ ޖަމިއްޔާއާއި ރޮޓަރެކްޓް ކްލަބް އޮފް މާލެއާއި ކްލިކް ކޮލެޖާވެސް ގުޅިގެންނެވެ.
އިންމަ ވިދާޅުވީ، ގޭމްތަކުގައި ބައިވެރިވާ ފަރާތްތަކަށް ތަފާތު ހަދިޔާތައްވެސް ލިބޭގޮތަށް ބާއްވާ ޢީދު އީ-ގޭމްސްގައި ގޭމް ސްޓޯލްތަކުގެ އިތުރުން އައުޓްޑޯ އެކްޓިވިޓީސްތައް ވެސް ހިމެނޭ ކަމަށެވެ. އެގޮތުން ކުޑަކުދީންނަށް ހާއްސަކޮށްގެން ރޭސްކާރާއި ހެލިކޮޕްޓަރު ދުއްވުން އޮންނާނޭ ކަމަށްވެސް އޭނާ ވިދާޅުވިއެވެ.
"ސްޓޯލް ތަކުގެ ހަރަކާތްތަކުގައި ބައިވެރިވުމަށް ކޫޕަނެއް ބައްލަވައިގަންނަން ޖެހޭނެ. އެއީ 5ރ، 10، އަދި 15ރ ގެ ކޫޕަން. ގިނައިން ހުންނާނީ ހަމަ 5ރ ގެ ކޫޕަން. މީގެ އިތުރުން ފީފާ އީސްޕޯޓްސް ދުނިޔޭގެ ރޭންކިން ގެ ދެވަނަ، އެއީ ރާއްޖޭގެ ކުއްޖެއް. އޭނާ ބަލިކޮށްފިއްޔާ ވަރަށް ރަނގަޅު ހަދިޔާއެއް ލިބިގެންދާނެ،" އިންމަ ވިދާޅުވިއެވެ.
މީގެ ހަ އަހަރު ކުރިން އުފެއްދި މޯލްޑިވްސް އީ-ސްޕޯޓިން އެސޯސިއޭޝަނުން މީގެ ކުރިން ވެސް ވަނީ ގޭމިން ޗެލެންޖަސްތައް ބާއްވައިފައެވެ. އަދި މިގޮތަށް ފަންޑްރައިޒިން ހަރަކާތްތަކާއެކު މިފަދަ ބޮޑު ހަރަކާތެއް ބާއްވާ މިއީ ދެވަނަ ފަހަރެވެ.
"ކުރިން އަޅުގަނޑުމެން ވާނީ، މޯލްޑިވްސް ރެޑް ކްރެސެންޓާ ގުޅިގެން ނޭޕާލް ފަންޑަށް ވެސް އެހީތެރިވެދީފައި،" އިންމަ ވިދާޅުވިއެވެ.
އެމްއީއެސްއޭގެ އެދުމަކީ ވީހާވެސް ގިނަ ބަޔަކު ކުޑަކުދީންނާއި އާއިލާތައް އެކުގައި މާދަމާ ބާއްވާ ޢީދު އީ-ގޭމްސްއަށް ޒިޔާރަތްކޮށް އީދުގެ އުފާ ލިބުގަތުމެވެ.