އަހަރެން އިސްލާމްވީ ވަރަށް އާދަޔާޚިލާފު ގޮތަކަށެވެ. އިސްލާމް ވުމުގެ ކުރިން މުސްލިމަކާ ދުވަހަކުވެސް ދިމަލެއް ނުވެ އެވެ. މުސްލިމުން ފެނިފައި ހުރެދާނެ އެވެ. ނަމަވެސް އެއިން މީހަކާ ދީނީ ވާހަކައެއް ދުވަހަކުވެސް ނުދައްކަމެވެ.
އަހަރެންނަކީ ސްކޮޓެލެންޑު ރައްޔިތަކީމެވެ. ނަމަކީ އެލެން ރޫނީ އެވެ. އަހަރެން އެއް ފަހަރު ތުރުކީއަށް ޗުއްޓީއަށް ދިޔައިމެވެ. އިސްލާމީ ގައުމެކެވެ. ނަމަވެސް އެއީ އަހަރެންނާ ބެހޭ ކަމެއް ނޫނެވެ. އަހަރެން ދިޔައީ ހިތްހަމަޖައްސާލައި، ޗުއްޓީ ހޭދަކުރާށެވެ. ތުރުކީގެ ކޮންމެވެސް ހިސާބެއްގެ ބީޗުގައި އަހަރެން އުޅެނިކޮށް ވަރަށް ފުރިހަމަ ގޮވާލުމެއްގެ އަޑު އިވުނެވެ. މީގެ ކުރިން ވެސް އެ އަޑު އިވިފައި ވެ އެވެ. ނަމަވެސް އަހަރެންގެ ޝައުގު ދަމައިގަތް މިއީ ފުރަތަމަ ފަހަރެވެ. ކައިރި މިސްކިތަކުން ބަންގި ގޮވާ ރީތި އަޑެވެ.
އެއީ މުސްލިމުން އަޅުކަން ކުރަން އައުމަށް ގޮވާލާ ގޮވާލުމެއްކަން އެނގެ އެވެ. އަޑު އަހާލަން ރީތި ކަމުން އެއަށް ޝައުގެއް އުފެދުނެވެ. އަހަރެން އެނބުރި ގައުމަށް ދެވުނު ތަނާހެން ފޮތް ފިހާރައަކަށް ގޮސް ކީރިތި ޤުރުއާނުގެ ތަރުޖަމާއެއް ގަތީމެވެ. އޭގައި އޮތް އެއްޗެއް ވެސް ބަލައިލަންވާނެ ނޫންތޯ އެވެ. ޤުރުއާން ކިޔަވަން ފެށި ގޮތަށް ހުއްޓާ ނުލެވުނެވެ. އޭގައިވާ ވާހަކަތައް ހާދަ އިބުރަތްތެރިވެފައި ހަގީގަތާ އެއްގޮތެވެ. އަހަރެންނަށް ހިތާ ހިތާ ބުނެވެން ފެށި އެވެ. މާތް ރަސްކަލާނގެ އެވެ. ތިބާ ވާ ނަމަ އަހަރެންނަށް ތެދުމަގު ދައްކަވާށެވެ.
ޤުރުއާން ކިޔެވުން ހުއްޓާލަން ވެއްޖެ ނަމަ އެކަން ކުރުމުގެ ބާރު އަހަރެންގެ ގައިގައި ހުއްޓެވެ. ނަމަވެސް އެކަމެއް ބޭނުމެއް ނުވި އެވެ. ކީރިތި ޤުރުއާނުން ލިބޭ ހިތްހަމަޖެހުން މާ ބޮޑެވެ. އަހަރެންގެ ނަފްސުގައި ހުރި ނުރަނގަޅު ކަންކަން ރަނގަޅު ކުރާނެ ގޮތް އެ ޤުރުއާނުން އަހަރެންނަށް އެނގުނެވެ. އަދި އެ ފޮތުގައި ވަނީ ތެދު ހަގީގަތްކަން ވެސް އަހަރެންނަށް އެނގުނެވެ. އެންމެ ފަހުން އެ ފޮތް ކުރު މުއްދަތެއްގެ ތެރޭގައި ތިން ފަހަރު ކިޔައި ނިންމައިލީމެވެ. އެވަރުން ވެސް ނުފުދުނެވެ. އަދިވެސް ކިޔަން ބޭނުންވެ އެވެ.
ދެން ކުރެވެން ފެށުނީ ސުވާލުތަކެކެވެ. އަހަރެން އިސްލާމް ވުމުން ދެން ވާނީ ކިހިނެއް ހެއްޔެވެ؟ އާއިލާއާއި ރަހުމަތްތެރިން އަހަރެންނާ މެދު ދެކޭނީ ކިހިނެއް ހެއްޔެވެ؟ އެންމެ މުހިންމު ކަމެއްގެ ގޮތުން، އަހަރެން އަމިއްލަ ނަފްސާ މެދު ދެކޭނީ ކޮން ގޮތަކަށް ހެއްޔެވެ؟
މިކަންކަން ހޯދުމަށްޓަކައި އަހަރެން ދެން ކިޔަން ފެށީ އިސްލާމް ދީން ގަބޫލުކޮށްފައިވާ މީހުންގެ ހިތްތަކަށް އިސްލާމީ އަގީދާ ވަތް ގޮތުގެ ވާހަކަތަކެވެ. އެމީހުންގެ އާއިލާއާއި ގާތް މީހުން އެމީހުންނާ މެދު ކަންތައް ކުރި ގޮތެވެ. އަހަރެންނަށް ހާމަވީ ކޮންމެ މީހެއްގެ ވާހަކަ ވެސް ތަފާތު ކަމެވެ. އެހެން ނަމަވެސް އަހަރެން ކަޑައްތު ކުރަން އުޅޭ މަގު އެމީހުން ވެސް ކޮންމެސް ސިފައެއްގައި ކަޑައްތު ކުރި އެވެ.
އިންޓަނެޓުގެ ޒަރިއްޔާއިން އަހަރެން އިސްލާމީ އަޅުކަންތައް ދަސް ކުރީމެވެ. ނަމާދު ކުރުމަށާއި އަރަބި ލަފްޒުތައް ދަސްކުރީމެވެ. މި ކަންކަމުގައި 18 މަސް ދުވަސް ހޭދަ ކުރުމަށްފަހު އަހަރެން މުސްލިމަކަށް ވީމެވެ. ޝަހާދަތުގެ ދެކަލިމަ ކިޔައިފީމެވެ. ނަމަވެސް އޭގެ މާ ކުރިން ކޮންމެ ދުވަހަކު ފަސް ނަމާދު ކޮށް، މާތްﷲ ގެ ހަޟްރަތުގައި ދުއާ ކުރަން ފެށީމެވެ. ރަމަޟާން މަހު ރޯދަ ވެސް ހިފަން ފެށީމެވެ. އިސްލާމް ދީނުގައި ނަހީ ކުރައްވާފައިވާ ކާބޯތަކެތިން އެއްކޮށް ދުރުހެލި ވީމެވެ.
އިސްލާމްދީން އަމިއްލައަށް ދަސްކޮށް، އަމިއްލައަށް އިސްލާމް ކަމުގެ އިގުރާރު ވުމުގެ ވެސް މާ ފަހުން، އަހަރެން ދިރިއުޅޭ ސިޓީގައި މިސްކިތެއް ހުންނަކަން އަހަރެންނަށް އެނގިއްޖެ އެވެ. ވަގުތުން އެތަނަށް ގޮސް، އެތަނުގައި ތިބި މީހުންނަށް އަހަރެން ތައާރަފު ވީމެވެ. މިއީ މިސްކިތަކަށް އަހަރެން ކުރި ފުރަތަމަ ޒިޔާރަތެވެ. އެމީހުން އަހަރެންނަށް މަރުހަބާ ކިޔައި، އަހަރެންނާ ވާހަކަ ދައްކައި ހެދި އެވެ. މަޑުމަޑުން އަހަރެންވެސް އެމީހުންގެ ތެރެއަށް ހޭނެން ފެށި އެވެ. ގިނަ ބަޔަކާ އެކު އަހަރެން މީގެ ކުރިން އަޅުކަމެއް ނުކުރަމެވެ. ނަމަވެސް މިހާރު އެކަން ވެސް އާދައަކަށް ވެއްޖެ އެވެ. މިހާރު އަހަރެން މި ދަނީ އިސްލާމީ އެކިއެކި ކަންކަމާއި ރުކުންތައް ދަސް ކުރަމުންނެވެ.
އަހަރެން އެކަނިވާ ވަގުތު އަހަރެންގެ ހަނދާނަށް އެންމެ ގިނައިން އަންނަނީ އިސްލާމް ދީނުގެ ގޮވާލުން އަހަރެންގެ ހިތުގެ ދޮރުފަތުގައި ޓަކި ޖެހި ވަގުތު ކޮޅެވެ. ތުރުކީގެ ހިތްގައިމު ގޮނޑުދޮށުގައި ހުއްޓާ، ނަމާދަށް ގޮވާލި ގޮވާލުމެވެ. އެ އަޑު އަހަރެންގެ ކަންފަތުން އަދިވެސް ފިލައިގެނެއް ނުދެ އެވެ.
"ނަމާދަށް އަވަހަށް އަންނާށެވެ. ފަލާޙާއި ކާމިޔާބު ލިބިގަތުމަށް އަވަހަށް އަންނާށެވެ."