އިލެކްޝަންސް ކޮމިޝަން (އީސީ)ގެ ރައީސް އަހުމަދު ސުލައިމާން އެންޓި ކޮރަޕްޝަން ކޮމިޝަން (އޭސީސީ) އަށް މިއަދު ހާޒިރުކޮށްފި އެވެ.
ސުލައިމާނުގެ އިތުރުން އެ ކޮމިޝަންގެ އިތުރު ތިން މެމްބަރަކު ވެސް އޭސީސީ އަށް، ހަމަ އެއް މައްސަލައެއްގައިބ ވަނީ ހާޒިރުކޮށްފަ އެވެ.
އޭސީސީގެ ރައީސް ހަސަން ލުތުފީ މިއަދު ސަން އަށް ވިދާޅުވީ ސުލައިމާނާއި އެ ކޮމިޝަނުގެ އިތުރު ތިން މެމްބަރަކު ހާޒިރު ކުރީ މައުލޫމާތެއް ސާފު ކުރުމަށް ކަމަށާއި އެއީ އެ ބޭފުޅުންގެ އަމިއްލަ މައްސަލައަކާ ގުޅިގެން ނޫން ކަމަށެވެ.
އޭސީސީގެ އޮފިޝަކު ވިދާޅުވީ އެ ބޭފުޅުން ހާޒިރުކޮށް ތަހުގީގުކުރަނީ 2015 ވަނަ އަހަރު އެ ކޮމިޝަނަށް ލީގަލް އޮފިސަރަކު ނެގި މައްސަލައާ ގުޅޭ މައްސަލައަކާ ގުޅިގެން ކަމަށެވެ.
އޭސީސީ އަށް އެ މައްސަލަ ހުށަހެޅި ފަރާތުން ތުހުމަތުކޮށްފައި ވަނީ، ޝަރުތު ހަމަވާ މީހުން ތިއްބައި ލީގަލް އޮފިސަރަކަށް މުވައްޒަފަކު ނެގީ އެ ކޮމިޝަނުގެ މެމްބަރުން މަގާމުގެ ނުފޫޒު ބޭނުންކުރައްވައިގެން ކަމަށެވެ.