ކްރިމިނަލް ކޯޓުގެ ގާޒީންނަށް ދުވަހަކުވެސް އިތުބާރު ނުކުރައްވާނެ ކަމަށް ކުރީގެ ޕްރޮސިކިއުޓާ ޖެނެރަލް އަދި އެ ކޯޓުގެ ކުރީގެ ގާޒީ މުހުތާޒު މުހުސިން ވިދާޅުވެއްޖެ އެވެ.
މުހުތާޒު މިހެން ވިދާޅުވީ ސައްޙަ ނޫން ކޯޓު އަމުރެއް އުފައްދައިގެން ރައީސް އަބްދުﷲ ޔާމީން ގާނޫނާ ޚިލާފަށް ހައްޔަރުކުރަން އުޅުނު ކަމަށް ބުނެ މުހުތާޒާއި މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާންގެ މައްޗަށް އުފުލާފައިވާ ދައުވާތަކާ ގުޅިގެން ރޭ ބޭއްވި ޝަރީއަތުގެ މަޖިލީހުގަ އެވެ.
މުހުތާޒުގެ އެ ވާހަކައަށް ރައްދުދެއްވައި މައްސަލަ ބައްލަވާ ގާޒީ އަބްދުލް ބާރީ ޔޫސުފް ވިދާޅުވީ މުހުތާޒަށް ޖެހިވަޑައިގަންނަވާނީ އެ ކޯޓުގެ ގާޒީންނަށް އިޙްތިރާމް ކުރަން ކަމަށެވެ. އޭގެރައްދުގައި މުހުތާޒު ވިދާޅުވީ އެ އިތުބާރު އޭނާގެ ކިބައިން ހޯދަންޖެހޭނީ ގަދަކަމުން ކަމަށެވެ.
"އަޅުގަނޑު ކްރިމިނަލް ކޯޓަށް އިޙްތިރާމް ކުރަން. އެކަމަކު މި ކޯޓުގެ ގާޒީންނަށް ދުވަހަކު ވެސް އިޙްތިރާމް ނުކުރާނަނަށް،"
"އަޅުގަނޑު ބަލަމުން އައީ ތިއީ އަޅުގަނޑުގެ މެންޓޯއެއްގެ ގޮތުގައި. އަޅުގަނޑު ދަރިވަރުވީ ތިބޭފުޅާގެ އަރިހުން. ނަމަވެސް ބައްލަވާ ކުރިން ޝަރީއަތްތައް ހިންގެވި ގޮތާއި މިހާރު ޝަރީއަތް ތިކުރައްވާގޮތް. ތިބޭފުޅުންނާ ހެދި މުޅި ގައުމު ހަލާކުވަނީ. ގަދަކަމުން ތިބޭފުޅުންނަށް އިހުތިރާމް ކުރުވަން ޖެހޭނީ. ނުކުރާނަން ތިބޭފުޅުންނަށް އިޙްތިރާމެއް،" މުހުތާޒު ވިދާޅުވި އެވެ.
މުހުތާޒާއި ބާރީ ޝަރީއަތުގައި ޒުވބު ކުރެއްވިކަމަށް ބައެއް ނޫސްތަކުގައި ރިޕޯޓުކޮށްފައިވާތީ އެކަމާ ކަންބޮޑުވުންފާޅު ކުރައްވައި ބާރީ ދެއްކެވި ވާހަކައާ ގުޅިގެން މުހުތާޒު ވިދާޅުވީ އެއީ ތެދެއް ކަމަށެވެ.
"އެއީ ތެދެއް. ޒުވާބު އެބަކުރޭ،" މުހުތާޒު ވިދާޅުވި އެވެ.
މުހުތާޒު ވިދާޅުވީ އޭނާ އަކީ ބުރަކަށީގެ މައްސަލަ ހުންނަ މީހަކަށްވާތީ ފިޒިއޮތެރަޕީ ހައްދަމުންދާ މީހެއް ކަމަށެވެ. އަދި ކޮންމެ 15 މިނެޓަކުން ތެދުވެ ކޮންމެވެސް ވަރަކަށް ކަސްރަތު ކޮށްލަން ޖެހޭ ކަމަށާއި ގިނަ އިރުތަކެއް ވަންދެން ޝަރީއަތް ކުރުމުން އެކަން ނުކުރެވޭ ކަމަށް އޭނާ ފާހަގަކުރެއްވި އެވެ.
ޝަރީއަތުގެ މަޖިލީހުގައި ތިބީ އިންސާނުން ކަމަށް ދެކެން ޖެހޭ ކަމަށް ވިދާޅުވެ ފަތިސް ވަންދެން ޝަރީއަތް ކުރިއަށް ގެންދާނަންތޯ މުހުތާޒު ވަނީ ބާރީއާ ސުވާލު ކުރައްވާފަ އެވެ.
ރޭ ދަންވަރު ބޭއްވި އެ އަޑުއެހުމުގައި ބާރީ ވިދާޅުވީ އޭނާ ބައްލަވަނީ ގަޑިންވާވަރެއް ނޫން ކަމަށާއި ބޭނުންވަނީ ހެކީންގެ ހެކިބަސް ނަގައި ނިންމާލަން ކަމަށެވެ.