މިިލޭނިއަމް ކެޕިޓަލް މެނޭޖްމެންޓް ޕްރައިވެޓް ލިމިޓެޑުގެ ބޭންކް އެކައުންޓަށް ފަސް މިލިޔަން ޑޮލަރު ޖަމާކުރެއްވުމަށްފަހު ފޯނުން ގުޅުއްވައި އޭރުގެ ޓޫރިޒަމް މިނިސްޓަރު އަހްމަދު އަދީބު އަބްދުލްޣަފޫރު އެންގެވި ކަމަށް އެކުންފުނީގެ ހިއްސާދާރެއް ކަމުގައިވާ އަމްޖަދު އިސްމާއީލް ވިދާޅުވެއްޖެ އެވެ.
އަމްޖަދު މިހެން ވިދާޅުވީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީކުރަން އެމްއެމްޕީއާރުސީއިން ކުރެއްދޫ ހޯލްޑިންގްސް ޕްރައިވެޓް ލިމިޓެޑަށް އެރަށް ކުއްޔަށް ދޫކުރުމުން އިކުއިޒިޝަން ކޮސްޓްގެ ގޮތުގައި އެކުންފުނިން އެމްއެމްޕީއާރުސީއަށް ދިން ފަސް މިލިޔަން ޑޮލަރަށް ޚިޔާނާތްތެރިވި ކަމަށް ތުހުމަތުކުރެވޭ މައްސަލައާ ގުޅިގެން ކުރާ ޝަރީއަތުގައި ހެކިބަސް ދެމުންނެވެ.
އޭނާ ވިދާޅުވީ އެ ފައިސާ އެކުންފުނީގެ އެކައުންޓަށް ޖަމާކޮށްފައި ވަނީ 2014 ވަނަ އަހަރުގެ ޖޫން މަހުގެ ތެރޭގައި ކަމަށެވެ.
އަދީބުގެ އިތުރުން އެ މައްސަލާގައި ދައުވާ އުފުލާފައި ވަނީ އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތާއި މ. ޝުރާމަންޒިލް ހާމިދު އިސްމާއީލްގެ މައްޗަށެވެ.
މިރޭ ބޭއްވި ޝަރީއަތުގެ މަޖިލީހުގައި ހެކިބަސް ދެއްވަމުން އަމްޖަދު ވިދާޅުވީ އެ ފައިސާ ޖަމާކުރެއްވުމުން އަދީބު އެދިވަޑައިގަތް ގޮތަށް ތައްޔާރުކުރެއްވުމަށްފަހު އެ ޗެކުތައް އެމަނިކުފާނާ ހަވާލުކުރައްވާފައިވާނެ ކަމަށެވެ.
އަމްޖަދު ވިދާޅުވިގޮތުގައި އަދީބާ ހަވާލު ކުރެއްވީ ޖުމްލަ ހަތަރު މިލިއަން ޑޮލަރުގެ ތިން ޗެކެކެވެ.
ބާކީ ފައިސާ ނުނަގައި ބެހެއްޓީ އެކައުންޓުގައި ކަމަށާއި އެއީ އަދީބު އެ ކުންފުނީގައި އުޅުއްވި އިރު ނަންގަވާފައިވާ ލޯނުތަކަށް ދޭންޖެހޭ ފައިސާ ކަމަށް ވެސް އަމްޖަދު ވިދާޅުވި އެވެ.
އެކަމުގައި ހާމިދާއި މަޝްވަރާކޮށްފައިނުވާނެ ކަމަށާއި ކުންފުނީގެ އެތެރޭގެ ކަންތައްތަކުގައި ގޮތް ނިންމަނީ އޭނަ އާއި ކުންފުނީގެ ޖެނެރަލް މެނޭޖު އަހުމަދު ނާޒިމް ކަމަށް ވެސް އަމްޖަދު ވިދާޅުވި އެވެ.
އޭނާ ވިދާޅުވީ އެ މުއާމަލާތް ހިންގިއިރު ހާމިދު ރާއްޖޭގައި ވެސް ނޫޅޭ ކަމަށެވެ.
ހެކިބަސް ދެއްވަމުން އެކުންފުނީގެ ޖެނެރަލް މެނޭޖަރު އަހުމަދު ނާޒިމް ވިދާޅުވީ އަމްޖަދު ދިން ތިން ޗެކެއްގައި އޭނާ ސޮއިކުރައްވާފައިވާނެ ކަމަށެވެ.
"ތިން ޗެކެއްގައި ސޮއިކޮށްފައި އަމްޖަދަށް އަޅުގަނޑު ދިނީ. ދެން ވީގޮތެއް އެނގޭނީ އޭނައަށް،" ނާޒިމް ވިދާޅުވި އެވެ.
ހެކިބަސް ދެއްވަމުން މޮންޓަލިއޯން އިންޓަނޭޝަނަލް ޕްރައިވެޓް ލިމިޓެޑުގެ ހިއްސާދާރު ޝާހިދު ހުސައިން ވިދާޅުވީ މިލޭނިއަމް ކެޕިޓަލް މެނޭޖްމަންޓުގެ ފަރާތުން އަމްޖަދު އޭނާ އަށް ޗެކްތަކެއް ދީފައިވާ ކަމަށެވެ. އެއީ އެމްއެމްޕީއާރްސީއާ އެކު ހަދާފައިވާ ވިޔަފާރި މުއާމަލާތަކާ ގުޅޭ ޗެކްތަކެއްކަމަށް ވެސް އޭނާ ވިދާޅުވި އެވެ.
އެސްޓީއޯގެ ދެ މުވައްޒަފަކު ވެސް މިރޭ ވަނީ ސިއްރުން ހެކިބަސް ދީފައެވެ. ހެކިބަސް ދެމުން އެސްޓީއޯގެ ދެ މުވައްޒަފުން ވެސް ބުނީ ޑޮލަރު ވިއްކުމުގެ މުއާމަލާތެއްގައި މިލޭނިއަމް ކެޕިޓަލްއާ އެކު އެކުންފުނިން ސޮއިކޮށްފައިވާނެ ކަމަށެވެ. އެ އެއްބަސްވުމުގައި މިލޭނިއަމް ކެޕިޓަލް މެނޭޖްމަންޓުގެ ފަރާތުން ސޮއިކުރެއްވީ ހާމިދު ކަމަށް ވެސް ހެކިބަސްދިން ދެ މީހުން ބުންޏެވެ.
"މީހަކާ އެކު އިންނަވައި 17 މެއި 2014 ގައި އެސްޓީއޯގެ އެމްޑީ ވިދާޅުވީ މިބޭފުޅާ ދަންނަންހޭ. މިއީ ގަލްފް ކްރާފްޓް ހާމިދޭ. 1 އަހަރުގެ އެޑްވާންސާ އެކު އެއްމިލިއަން ޑޮލަރު ވިއްކަން އެބޭފުޅާ އެބަ އުޅެއޭ،" ހެކިބަސްދިން އެސްޓީއޯގެ މުވައްޒަފަކު ބުންޏެވެ.
ހާމިދު އެސްޓީއޯއަށް "ޑޭޓެޑް ޗެކެއް" ދިނުމުން އެ އެއްބަސްވުމުގެ ދަށުން ހަވާލުކުރަންޖެހޭ ފައިސާ އޭނައާ ހަވާލުކޮށްފައިވާ ކަމަށް ވެސް އެސްޓީއޯގެ މުވައްޒަފަކު ބުންޏެވެ.
މިރޭގެ ޝަރީއަތުގެ މަޖިލީހުގައި ވަނީ އެ މައްސަލަ ތަހުގީގު ކުރި އިންވެސްޓިގޭޝަން އޮފިސަރު ހުސައިން ލިރާރުގެ ހެކިބަސް ވެސް ނަގާފަ އެވެ.
ދައުލަތުގެ ވަކީލު ކުރެއްވި ސުވާލުތަކަށް ޖަވާބުދެއްވަމުން އޭނާ ވިދާޅުވީ ތަހުގީގު ބަޔާން ނެގުމުގައި އޭނާ ޒިޔަތަށް އެއްވެސް ނުފޫޒެއް ފޯރުވާފައިނުވާނެ ކަމަށެވެ.
ތަހުގީގަށް ޒިޔަތު ބަޔާން ދެއްވީ ވަކީލަކާ އެކު އަމިއްލަ އިޚްތިޔާރުގައި ކަމަށް ވެސް ލިރާރު ވިދާޅުވި އެވެ.
އެމްއެމްއޭގެ ގަވަރުނަރު ޑރ. އަޒީމާ އާދަމާއި ބީއެމްއެލްގެ ސީއީއޯ އެންޑްރޫ ހީލީ ވެސް ހިމެނޭގޮތަށް ހާމިދުގެ ފަރާތުން ދިފާއީ ހެކީންގެ ގޮތުގައި ހުށަހަޅާފައިވާ އިތުރު ހެކީންގެ ހެކިބަސް ނަގަން ދެން ބޭނުންނުވާ ކަމަށް އޭނާގެ ގާނޫނީ ވަކީލު ހުސްނުއ ްސުއޫދު ވިދާޅުވި އެވެ.
ސަބަބަކީ މިލޭނިއަމް ކެޕިޓަލް މެނޭޖްމަންޓުގެ ހިއްސާދާރު އަމްޖަދުގެ ހެކިބަހުން ބޭނުންވާ މައުލޫމާތު ސާފުވެފައިވާތީ ކަމަށް ސުއޫދު ވިދާޅުވި އެވެ.
އަދީބުގެ ގާނޫނީ ވަކީލު މޫސާ ސިރާޖު ވިދާޅުވީ އެމްއެމްޕީއާރްސީގެ ލިޔުންތަކުން އެނގޭގޮތުގައި ފަސް މިލިއަން ޑޮލަރުގެ ޗެކް މިލޭނިއަމް ކެޕިޓަލް މެނޭޖްމަންޓުގެ އެކައުންޓަށް ޖަމާކުރީ އަބްދުﷲ ނަމަކަށް ކިޔާ މީހެއް ކަމަށެވެ. ނަމަވެސް އެއީ ކާކުކަން ނޭނގުނު ކަމަށާއި ދިފާއީ ހެއްކެއްގެ ގޮތުގައި އޭނާ ހާޒިރުކޮށްދޭން ބޭނުންވާ ކަމަށް ސިރާޖު ވިދާޅުވި އެވެ.
ޒިޔަތުގެ ގާނޫނީ ވަކީލު ޔާމީން ވިދާޅުވީ ދިފާއީ ހެކީގެ ގޮތުގައި ހުށަހަޅަން ބޭނުންވާ ބައެއް ޑޮކިއުމެންޓުތައް އޭނާ އަށް ލިބިފައިނުވާ ކަމަށާއި އެކަން މީގެކުރިން ބޭއްވި ޝަރީއަތުގެ މަޖިލީހުގައި ފާހަގަކޮށްފައިވާނެ ކަމަށެވެ.
ޔާމީން ވިދާޅުވިގޮތުގައި ބައެއް ޑޮކިއުމެންޓުތަކަކީ ދައުލަތުގެ ކަމާބެހޭ އިދާރާތަކުން ހޯދަންޖެހޭ ލިޔުންތަކެކެވެ. އޭނާ އެދިވަޑައިގެންފައި ވަނީ ކޯޓުން އެ ލިޔުންތައް ހޯދައި ދިނުމަށެވެ.
ދައުލަތުން ކްރިމިނަލް ކޯޓަށް ހުށަހަޅާފައިވާ ލިޔުމެއް ހޯދުމަށް ޝަރީއަތުގެ މަޖިލީހުގައި މީގެކުރިން އެދިފައިވީނަމަވެސް މިހާތަނަށް އެލިޔުން ލިބިފައިނުވާ ކަމަށް އޭނާ ވިދާޅުވި އެވެ.
ގާޒީ އަބްދުލް ބާރީ ޔޫސުފް ވިދާޅުވީ މާދަމާ ހެނދުނު ކޯޓަށް ވަޑައިގަތުމުން ޒިޔަތުގެ ވަކީލަށް އެ ލިޔުން ފޯރުކޮށްދޭނެ ކަމަށެވެ.
މިރޭގެ އަޑުއެހުން ގާޒީ ބާރީ ނިންމަވާލެއްވީ އަންނަ ހޮނިހިރު ދުވަހުގެ 11:00 ގައި އެ މައްސަލައިގެ ޚުލާސާ ބަޔާން ހުށަހެޅުމަށް ބާއްވާ ޝަރީއަތުގެ މަޖިލީސް އޮންނާނެކަން އިއުލާން ކުރެއްވުމަށްފަހު އެވެ.
ބާރީ އެގޮތަށް އިއުލާންކުރައްވައި އަޑުއެހުން ނިންމަވާލެއްވީ ހޮނިހިރު ދުވަހު އިތުރު ދެ މައްސަލައެއްގެ ޚުލާސާ ބަޔާން ހުށަހެޅުން އޮތުމުން ތައްޔާރުވުމަށް މިއަދުން ފެށިގެން ހޮނިހިރު ދުވަހާ ހަމައަށް އެކަށީގެންވާ ވަގުތު ނެތް ކަމަށް އަދީބު ވިދާޅުވެފައި ވަނިކޮށެވެ.
އެ މައްސަލަ މީގެކުރިން ބައްލަވާފައި ވަނީ ކްރިމިނަލް ކޯޓުގެ ގާޒީ އިބްރާހީމް އަލީ އެވެ. ނަމަވެސް ގާޒީ ބާރީ މިރޭ ވިދާޅުވީ މީގެފަހުން އެ މައްސަލަ ބައްލަވާނީ އޭނާ ކަމަށެވެ.