މިހާރު މައްސަލަ އޮތް ސެކްޝަން ބަދަލުކޮށް، ރިޔާސީ ލޯންޗުކޮޅު "ފިނިފެންމާ"ގައި އެއްޗެއް ގޮވި މައްސަލައިގެ އަޑުއެހުން މާދަމާ އަށް ތާވަލްކޮށްފި އެވެ.
ކުރިން އެ މައްސަލަ ތާވަލް ކުރަނީ "ބީ" ސެކްޝަނުން ބަލާ މައްސަލައެއްގެ ގޮތުގަ އެވެ. އެ ސެކްޝަންގެ ގާޒީ އަކީ އެ މައްސަލަ ބައްލަވާ ބެންޗުގެ އިސް ގާޒީ އަހުމަދު ރަޝީދެވެ. މާދަމާ އަށް އެ މައްސަލަ ތާވަލުކޮށްފައި ވަނީ "އެޗް" ސެކްޝަންގެ ނަމުގަ އެވެ. އެ ސެކްޝަނާ ހަވާލުވެ ހުންނެވީ ކޮން ގާޒީއެއް ކަމެއް އަދި ސާފެއް ނުވެ އެވެ.
މިއަދަށް ތާވަލުކުރި އެ މައްސަލައިގެ އަޑުއެހުން ކެންސަލް ކުރީ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ގާޒީ ސައީދު އިބްރާހީމް ސަލާމުގައި ހުންނެވުމުންނެވެ. ސައީދު މިއަދު ސަލާމުގައި ހުންނެވި އިރު، އޭނާ ޖުވެނައިލް ކޯޓަށް ބަދަލުކުރަން ޖުޑީޝަލް ސާވިސް ކޮމިޝަނުން އިއްޔެ ވަނީ ފާސްކޮށްފަ އެވެ.
ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރާއި އެމަނިކުފާނުގެ ދެ ބޮޑީގާޑުން ކަމުގައިވާ ލ. ދަނބިދޫ، އަފްޒާ އަހްމަދު އާމިރާއި މއ. ސިގްމާ ހަސަން ރިކާޒް -- ސަން ފައިލް ފޮޓޯ
އަހުމަދު ރަޝީދާއި ސައީދުގެ އިތުރުން އެ މައްސަލަ ބައްލަވާ ބެންޗުގައި ދެން ހިމެނިވަޑައިގަންނަވަނީ ގާޒީ އިބްރާހީމް އަލީ އެވެ.
އެ މައްސަލަ ބައްލަވާ ބެންޗަށް ބަދަލުތަލެއް ގެނައިކަމުގެ އަޑުތައް ފެތުރުނު ނަމަވެސް އެކަން އަދި ކަށަވަރެއް ނުވެ އެވެ. ކްރިމިނަލް ކޯޓުން ވެސް އެކަމާ ބެހޭ ގޮތުން މީޑިއާއަށް އެއްވެސް މައުލޫމާތެއް ހިއްސާ ނުކުރި އެވެ.
ރިޔާސީ ލޯންޗުކޮޅުގައި އެއްޗެއް ގޮވި މައްސަލައިގެ އެންމެ އަޑީގައި ހުންނެވި ކަމަށް ތުހުމަތުކޮށް ދައުލަތުން ދައުވާ އުފުލާފައި ވަނީ ކުރީގެ ނައިބު ރައީސް އަހުމަދު އަދީބު އަބްދުލް ޣަފޫރުގެ މައްޗަށެވެ. ލޯންޗުކޮޅުގައި އެއްޗެއް ގޮވި މައްސަލާގައި އަދީބާއި އޭނާގެ ކުރީގެ ދެ ބޮޑީގާޑުން ކަމުގައިވާ ލ. ދަނބިދޫ، އަފްޒާ، އަހުމަދު އާމިރާއި މއ. ސިގްމާ، ހަސަން ރިކާޒުގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ ދައުވާ އެވެ. އެ މައްސަލައިގެ އަޑުއެހުން އޮންނާނީ ހެނދުނު 10:00 ގައެވެ.
އައިއީޑީ ހަރުކުރަން ލޯންޗުކޮޅަށް އަރާވަޑައިގެންނެވި ކަމަށް ބުނެ އަދީބުގެ މައްޗަށް ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އުފުލައިފަ އެވެ. އެ މައްސަލައިގެ އަޑުއެހުން ތާވަލުކުރީ މެންދުރު ފަހު 1:00 އަށެވެ.
އެ ދެ މައްސަލާގައި ވެސް މާދަމާ އޮންނާނީ ދައުލަތުން ހުށަހަޅާ ހެކީންގެ ހެކިބަސް ނެގުމެވެ. ނަމަވެސް މާދަމާގެ އަޑުއެހުން ބޭއްވޭނެތޯ ނުވަތަ ނޫންތޯ އަދި ކަށަވަރެއް ނުވެ އެވެ.
މިދިޔަ އަހަރުގެ މެއި މަހުގެ އެއްވަނަ ދުވަހު ފިސްތޯލައެއް ގެންގުޅުއްވި ކަމުގެ ތުހުމަތުގައި އަދީބުގެ މައްޗަށް އުފުލާފައިވާ ޓެރަރިޒަމްގެ ދައުވާގެ އަޑުއެހުން ވެސް މާދަމާ މެންދުރު ފަހު 3:00 އަށް ވަނީ ތާވަލު ކޮށްފަ އެވެ. އެ މައްސަލާގައި ވެސް އޮންނާނީ ދައުލަތުން ހުށަހެޅި ހެކީންގެ ހެކިބަސް ނެގުމެވެ.
މީގެއިތުރުން ޅ. މާބިންހުރާގައި ޓޫރިސްޓު ރިސޯޓެއް ތަރައްގީ ކުރަން ކުރެއްދޫ ހޯލްޑިންގްސް އަށް ކުއްޔަށް ދޫކުރުމުން އިކުއިޒިޝަން ކޮސްޓުގެ ގޮތުގައި ދައުލަތަށް ދިން ފައިސާ އަށް ޚިޔާނާތްތެރިވި ކަމަށް ތުހުމަތު ކުރެވޭ މައްސަލައިގެ ހެކިބަސް ނެގުން ވެސް މާދަމާ މެންދުރު ފަހު 2:00 އަށް ވަނީ ތާވަލު ކޮށްފަ އެވެ.
އެ މައްސަލާގައި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ މައްޗަށް އުފުލާފައި ވަނީ ޚިޔާނާތްތެރިވުމުގެ ދައުވާ އެވެ. އަދި ކުރީގެ ނައިބު ރައީސް އަދީބާއި މ. ޝުރާމަންޒިލް ހާމިދު އިސްމާއީލްގެ މައްޗަށް އުފުލާފައި ވަނީ ޚިޔާނާތުގައި ބައިވެރިވި ކަމުގެ ދައުވާ އެވެ.