ކާބޯތަކެތި ވިއްކާ ހުރިހާ ވިޔަފާރިއެއް ބަލައި ފާސްކުރުމަށް މޯލްޑިވްސް ފުޑް އެންޑް ޑުރަގް އޮތޯރިޓީ (އެމްއެފްޑީއޭ)އިން ކުރިއަށްގެންދާ އޮޕަރޭޝަންގައި ރައްކާތެރި ނޫން ގޮތްގޮތަށް ތަކެތި ވިއްކާ މައްސަލަތައް ފާހަގަކުރެވިފައިވާ ކަމަށް އެއޮތޯރިޓީން ބުނެފި އެވެ.
އެމްއެފްޑީއޭގެ ސީނިއާ ސައިޓިފިކް އޮފިސާ ސާޖިދާ މުހައްމަދު "ސަން"އަށް މިއަދު ވިދާޅުވީ މިދިޔަ ހޯމަ ދުވަހުން ފެށިގެން ކުރިއަށް ގެންދާ އެ އޮޕަރޭޝަންގެ ދަށުން ބަލައި ފާސްކުރެވުނު ތަންތަނުގައި ކާބޯތަކެތި ބެހެއްޓުމާއި ގުދަން ކުރުމުގެ އިތުރުން ސާފްތާހިރުކަމުގެ މައްސަލަތައް ފާހަގަކުރެވިފައިވާ ކަމަށެވެ.
"އާންމުކޮށް އެއްކަހަލަ މައްސަލަތަކެއް މިފާހަގަ ކުރެވެނީ، ޕެސްޓް ކޮންޓުރޯލްގެ މައްސަލައާއި ކުދިކުދި ފިހާރަތަކުގައި ތޮއްޖައްސައިގެން އެއްޗެހި ބެހެއްޓުމާއި މިކަހަލަ މައްސަލަތައް،" ސާޖިދާ ވިދާޅުވިއެވެ.
އޭނާ ވިދާޅުވީ މިހާރު ކުރިއަށް ގެންދާ އޮޕަރޭޝަންގެ ދަށުން ތަންތަން ބަލައި ފާސްކުރަނީ ކުޑަކޮށް ކަމަށާއި މިހާރު ފިޔަވަޅު އެޅުމުގެ ބަދަލުގައި އެކަންކަން އިސްލާހުކުރުމަށް އަންގަމުން އަންނަ ކަމަށެވެ. ކުރިއަށް އޮތްތަނުގައި އެއަށްވުރެ ބޮޑު އޮޕަރޭޝަންއެއް ފަށައި ކަންކަން އިސްލާހު ނުކުރާ ފަރާތްތަކާއިމެދު ފިޔަވަޅު އެޅުމަށް ނިންމާފައިވާ ކަމަށްވެސް އޭނާ ވިދާޅުވިއެވެ.
އެމްއެފްޑީއޭގެ ޑިރެކްޓަރު ޖެނެރަލް ޝަރީފާ އާދަމް މަނިކު މިއަދު ސަން އަށް ވިދާޅުވީ މީގެކުރިން ފިހާރަތަކުގައި ހުންނަ ކާބޯތަކެތި އެ އިދާރާ އިން އިންސްޕެކްޓް ނުކުރާ ކަމަށާއި ނަމަވެސް އަލަށް ފެށި މަސައްކަތާ އެކު ރާއްޖޭގެ ހުރިހާ ފިހާރައެއް ބަލައި ފާސްކޮށް އިސްލާހުކުރަންވީ ގޮތާއި ރަނގަޅު ކުރަންވީ ކަންކަން ބުނެދޭނެ ކަމަށެވެ.
ހާއްސަ އޮޕަރޭޝަންއެއް އެމްއެފްޑީއޭ އިން ފަށާފައިވާއިރު ބައެއް ފިހާރަތަކުން ވިއްކާތަކެއްޗާއި ދޭތެރޭ އާންމުންގެ ޝަކުވާ މި ވަނީ ބޮޑުވެފަ އެވެ. އެގޮތުން މިދިޔަ ހަފްތާގައި ވެސް ވަނީ ކިލާފެނުން ތަރުކާރީ ދޮވެ ފިހާރައަކަށް ވައްދާ މައްސަލަ ފެންމަތިވެފަ އެވެ.