އަންނަ ސީޒަނުގައި ލެސްޓާ ސިޓީގެ ޓާގެޓަކީ އިނގިރޭސި ޕްރިމިއާ ލީގުގެ ތަށި ދިފާއުކުރުން ނޫން ކަމަށާއި، ޓާގެޓަކީ ލީގުގައި ދެމިއޮތުން ކަމަށް އެ ކްލަބުގެ ކޯޗު ކްލައުޑިއޯ ރަނިއޭރީ ބުނެފި އެވެ.
ނިމިގެންދިޔަ ސީޒަނުގެ ޕްރިމިއާ ލީގު ކާމިޔާބުކޮށް، ލެސްޓާ ސިޓީން ވަނީ ފުޓްބޯޅައިގެ ތާރީހުގައި އެ ޓީމުގެ ނަން ރަން އަކުރުން ފަވާލައިފަ އެވެ. ރަނިއޭރީގެ އިރުޝާދުގެ ދަށުން ލެސްޓާއިން ލީގު ހޯދިއިރު، ދެވަނައިގައި އޮތް އާސެނަލްއާ ދެމެދު ދިހަ ޕޮއިންޓުގެ ފަރަގެއް އޮތެވެ.
އަންނަ ސީޒަނުގެ ޗެމްޕިއަންސް ލީގުގައި ފެނިގެންދާނެ ލެސްޓާއަށް އެންމެ ބޮޑު އުނދަގުލަކަށް ވެގެންދާނީ އާ ކޯޗުންގެ އިރުޝާދުގެ ދަށުން ކުޅޭ މެންޗެސްޓާ ސިޓީ އާއި ޗެލްސީ އަދި މެންޗެސްޓާ ސިޓީގެ ފަރާތުން ކަމަށް ރަނިއޭރީ ދެކެ އެވެ.
"އަންނަ ސީޒަނަކީ އިތުރަށް ވަރުގަދަ ސީޒަނަކަށް ވެގެންދާނެ. އެއީ ޕެޕް ގާޑިއޯލާ އާއި އެންޓޯނިއޯ ކޮންޓޭ އަދި ހޯސޭ މޮރީނިއޯ ވެސް ޕްރިމިއާ ލީގުން ފެންނާނެތީ. އަންނަ ސީޒަނަކީ ވަރަށް ވަރުގަދަ އަދި ރަނގަޅު ސީޒަނަކަށް ވެގެންދާނެ. އަހަރެމެން އެ ޓީމުތަކަށް ރަނގަޅު ފައިޓެއް ދޭނަން. އަހަރެމެން ބޭނުން ތަށި ދިފާއު ކުރަން. އެކަމަކު އެންމެ މުހިންމު ޓާގެޓަކީ ލީގުގައި ދެމިއޮތުން،" މިރާ އަށް ދިން އިންޓަވިއުއެއްގައި އޭނާ ބުންޏެވެ.
ރަނިއޭރީ ބުނީ، އަންނަ ސީޒަނުގައި ލެސްޓާގެ ކުޅުމުގެ ސްޓައިލަށް ބަދަލުތަކެއް ނާންނާނެ ކަމަށާއި ޗެމްޕިއަންސް ލީގުގައި ނުކުންނަ ކޮންމެ ނަތީޖާއެއް ވެސް ގަބޫލުކުރާނެ ކަމަށެވެ.