ވިލިމާލެއިން ފެން ހިފައިގެން މާލެ ހުޅަނގު ދެކުނު ފަރާތުގެ ޓީޖެޓީ ސަރަހައްދު ފަޅަށް ވަންނަން ދިޔަ ދޯންޏެއް ސުނާމީ ބިނާ މައިޒައިނުގައި ޖެހިއްޖެ އެވެ. ދޯނި ޖެހިފައިވާ އެ މައިޒާނުގެ ރެއިލިންގަ އެވެ.
ފުލުހުންގެ މީޑިއާ އޮފިޝަލަކު "ސަން" އަށް ވިދާޅުވީ ފެން ހިފައިގެން ވިލިމާލެއިން މާލެއަށް ދަތުރުކުރި ދޯންޏެއް ރޭ 10:35 އެހާކަށްހާއިރު ސުނާމީ ބިނާ މައިޒާނުގެ ރެއިލިންގައި ޖެހުނު ކަމުގެ މައުލޫމާތު ފުލުހުންނަށް ލިބުނު ކަމަށެވެ.
އޮފިޝަލު ވިދާޅުވީ އެ ހާދިސާގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް ލިބިފައި ނުވާ ކަމަށެވެ. އަދި އެ ހާދިސާ އިތުރަށް ފުލުހުން ތަހުގީގު ކުރަމުންދާ ކަމަށް އޮފިޝަލު ވިދާޅުވި އެވެ.
މިދިޔަ ހުކުރު ދުވަހު ވެސް އެ ސަރަހައްދަށް ވަންނަން ދިޔަ ދޯންޏެއް ވަނީ އެ މައިޒާނުގައި ޖެހިފަ އެވެ. އެ ހާދިސާގައި އެ ދޯނީގެ ކެޕްޓަން ވަނީ ހައްޔަރު ކުރުމަށްފަހު ވަނީ ދޫކޮށްލާފަ އެވެ. އޭނާ ހުރީ މަސްތުގެ ހާލަތުގައި ކަމަށާއި އޭނާގެ އަތުގައި ކަނޑުއުޅަނދު ދުއްވުމުގެ ހުއްދައެއް ވެސް ނެތް ކަމަށް ފުލުހުން ވަނީ ބުނެފަ އެވެ.
ކުރީގެ ތިއް ރުއް ޕާކަށް ސުނާމީ ބިނާ ބަދަލުކޮށް ތަރައްގީ ކޮށްފައިވާ ސުނާމީ ބިނާ މައިޒާނަކީ ގާތްގަނޑަކަށް ތިން މިލިއަން ރުފިޔާ ހަރަދުކޮށްގެން ހަދާފައިވާ ތަނެކެވެ.