އޭސީ މިލާން ބަލިކޮށް، 11 ވަނަ ފަހަރަށް ޔުވެންޓަސްއިން ކޮޕާ އިޓާލިއާ ކާމިޔާބުކޮށްފި އެވެ.
ރޯމާގެ ސްޓޭޑިއޯ އޮލިމްޕިކޯގައި މިރޭ ކުޅުނު ކޮޕާ އިޓާލިއާގެ ފައިނަލު މެޗުގައި މިލާނުގެ މައްޗަށް ޔުވެންޓަސް ކުރި ހޯދީ 1-0 ލަނޑުގެ ނަތީޖާއަކުންނެވެ.
މިލާން ކޮޅަށް ލަނޑުޖެހުމަށްފަހު، ޔުވެންޓަސްގެ މޮރާޓާ އުފާފާޅުކުރަނީ: ކޮޕާ އިޓާލިއާގެ ޗެމްޕިއަންކަން ޔުވެންޓަސް ހޯދީ ފައިނަލުގައި 1-0 ލަނޑުން މިލާން ބަލިކުރުމަށްފަހު --- ފޮޓޯ: އޭޕީ
މިރޭ ކުޅުނު މެޗުގެ ފުރަތަމަ ހާފުގައި ލަނޑުޖަހާނެ އެންމެ ރަނގަޅު ފުރުސަތެއް ލިބިގެންދިޔައީ މިލާނަށެވެ. މެޗުގެ 23 ވަނަ މިނެޓުގައި އިޓަލީ މިޑްފީލްޑަރު ޖިއަކޮމޯ ބޮނަވެންޓުރާ އުފެއްދި ހަމަލާ، ޔުވެންޓަސްގެ ބްރެޒިލް ގޯލްކީޕަރު ނެޓޯ ވަނީ ހުޝިޔާރުކަމާއެކު މަތަކޮށްފަ އެވެ.
މެޗުގެ 31 ވަނަ މިނެޓުގައި ޔުވެންޓަސްއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ އެވެ. ފްރާންސް ޑިފެންޑަރު އުފެއްދި ހަމަލާ، މިލާނުގެ ޖަޕާން ކުޅުންތެރިޔާ ކެއިސޫކޭ ހޮންޑާ ގައިގައި ޖެހިފައި އަމާޒުވީ ގޯލުގެ ބޭރު ދާގަނޑަށެވެ.
މެޗުގެ 69 ވަނަ މިނެޓުގައި ޔުވެންޓަސްއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ އެވެ. ކްރިސްޓިއަން ޒަޕާޓާ އާއި ޑޭވިޑް ކަލަބްރިއާ ކައިރިން ނައްޓާލުމަށްފަހު ޕައުލް ޕޮގްބާ އުފެއްދި ހަމަލާ، މިލާނުގެ ކީޕަރު ޖިއަންލުއިޖީ ޑޮނަރުއްމާ ވަނީ މަތަކޮށްފަ އެވެ. މެޗުގެ 90 މިނެޓުގެ ކުޅުން ހަމަވިއިރު، ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެފައި އޮތުމުން ނަތީޖާ ނެރެން ޖެހުނީ އިތުރު ވަގުތުގެ ދެ ހާފު ކުޅެގެންނެވެ.
ކޮޕާ އިޓާލިއާގެ ފައިނަލުގައި ޔުވެންޓަސްއާއި އޭސީ މިލާން ބައްދަލުކުރި މެޗުގެ ތެރެއިން: ކޮޕާ އިޓާލިއާގެ ޗެމްޕިއަންކަން ޔުވެންޓަސް ހޯދީ 1-0 ލަނޑުން މިލާން ބަލިކުރުމަށްފަހު --- ފޮޓޯ: އޭޕީ
މެޗުގައި ފެނުނު ހަމައެކަނި ލަނޑު ފެނިގެންދިޔައީ 110 ވަނަ މިނެޓުގައެވެ. ހުއާން ކުއަޑްރާޑޯ ނަގައިދިން ރީތި ހުރަހަކުން ޔުވެންޓަސްއަށް އެ ލަނޑު ކާމިޔާބުކޮށްދިނީ އަލްވާރޯ މޮރާޓާ އެވެ. އޭނާ އެ ލަނޑު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނުކުތްތާ ދެ މިނެޓު ތެރޭގައެވެ.