ޕަބްލިކް ސާވިސް މީޑިއާ (ޕީއެސްއެމް) އިން ބާއްވާ އެންމެ ބޮޑު ގުރުއާން މުބާރާތް ކަމަށްވާ "އެންމެ އަލިގަދަ ތަރީ"ގެ އޮޑިޝަން ޏ. ފުވައްމުލަކުގައި ފަށައިފި އެވެ.
ޕީއެސްއެމްގެ އޮފިޝަލަކު ސަން އަށް މިއަދު ވިދާޅުވީ މިއަދު ހެނދުނު އޮޑިޝަން ފަށާފައި ވަނީ ޏ. އަތޮޅު ކައުންސިލް އިދާރާގެ ހޯލްގައި ކަމަށެވެ.
ފުވައްމުލަކުގެ އިތުރުން ދެން އޮޑިޝަން ބާއްވަން ހަމަޖައްސާފައިވާ ރަށްތަކަކީ ގދ. ތިނަދު އާއި ހއ. އިހަވަންދޫ އަދި މާލޭ ސިޓީ އެވެ. މި މަހުގެ 25 ވަނަ ދުވަހު ތިނަދޫގައި ބާއްވާ އޮޑިޝަން އޮންނާނީ އެ ރަށު އަބޫބަކުރު ސުކޫލްގަ އެވެ. އަދި މި މަހުގެ 29 ވަނަ ދުވަހު އިހަވަންދޫގައި ބާއްވާ އޮޑިޝަން އޮންނާނީ އިހަވަންދޫ ސްކޫލްގަ އެވެ.
މިއީ އެންމެ އަލިގަދަ ތަރި ބާއްވާ ހަތަރު ވަނަ އަހަރެވެ. މިފަހަރު އެންމެ އަލިގަދަ ތަރިއަކަށް ހޮވޭ މީހަކަށް ކަނޑައަޅާފައިވާ އިނާމަކީ 500،000 ރުފިޔާ އެވެ.