ހ. ހިލްޓަން މުހައްމަދު އިންތިފް ރައޫފްގެ މައްޗަށް ދައުލަތުން އުފުލާފައިވާ، މަގުބޫލު ސަބަބެއް ނެތި ނުރައްކާތެރި ހަތިޔާރު ގެންގުޅުމުގެ ދައުވާ އޭނާގެ މައްޗަށް ސާބިތު ނުވާކަމަށް ކްރިމިނަލް ކޯޓުން ހުކުމް ކޮށްފި އެވެ.
އިންތިފްގެ މައްޗަށް ދައުލަތުން ދައުވާ އުފުލީ ފުލުހުންނަށް ލިބުނު މައުލޫމާތަކާ ގުޅިގެން މިދިޔަ އޮކްޓޯބަރު މަހުގެ 30 ވަނަ ދުވަހުގެ ރޭ ހިންގި ޚާއްސަ އޮޕަރޭޝަނެއްގައި މއ. ގޯލްޑަންބީމް ގެއަށް ފުލުހުންނާއި ސިފައިން ވަނުމުން އެގޭ ސިޑިގޮޅިން، އިންތިފް ވައްޓާލި ނުރައްކާތެރި ހަތިޔާރަކީ އެއިން ޝޫޓުކޮށްފިނަމަ މީހަކަށް ގެއްލުމެއް ލިބިދާނެ ފަދަ ހަތިޔާރެއްކަމަށް އެމްއެންޑީއެފްގެ އޯޑިނަންސް އިން ތައްޔާރުކުރި ރިޕޯޓުން އެނގެން އޮންނަ ކަމަށް ބުނެ އެވެ.
އެމައްސަލަ ނިންމައި މިމަހުގެ 15 ވަނަ ދުވަހު ކްރިމިނަލް ކޯޓުން ކުރި ހުކުމުގައި ބުނެފައިވަނީ ދައުލަތުން ހުށަހަޅާފައިވާ ހެއްކާ ގަރީނާތަކުން އިންތިފް ރައޫފްގެ އަތުން ފެނިފައިވާ ބަޑިއަކީ " އޭގެ ޒާތުގައި ނުރައްކާތެރި ހަތިޔާރެއްކަން ޝަރީއަތަށް ސާބިތުކޮށްދެވިފައި ނުވާ" ކަމަށެވެ.
އެހެންކަމުން އިންތިފްގެ މައްޗަށް، މަގުބޫލު ސަބަބެއް ނެތި ނުރައްކާތެރި ހަތިޔާރު ގެންގުޅުމުގެ ދައުވާ ސާބިތުނުވާކަމަށް ކަނޑައަޅައި ކްރިމިނަލް ކޯޓުން ވަނީ ހުކުމް ކޮށްފަ އެވެ.
އިންތިފް ރައޫފްގެ މައްޗަށް އެ ދައުވާ އުފުލާފައި ވަނީ ބިރުދެއްކުމާއި ނުރައްކާތެރި ހަތިޔާރާއި ތޫނުއެއްޗިހި ގެންގުޅުން މަނާކުރުމުގެ ގާނޫނުގެ ތިން ވަނަ މާއްދާގެ (ހ)އާ ހަވާލާދީ އެ މާއްދާގެ (ނ) ގެ ދަށުންނެވެ.